Hirit ni Pacquiao, siya ang ‘last man standing’, hmmm

ni Ka Ambo - @Bistado | May 4, 2022

NAUNGUSAN ni Sen. Manny Pacquiao si Meyor Isko bilang ikatlo sa huling resulta ng presidential survey.

Ibig sabihin, si Pacquiao ang dark horse?

◘◘◘

MALINAW na hinahanap ng mga observers kung sino ang dark horse na may posibilidad na makasilat kaninuman kina BBM at VP Leni.

Ayon sa kampo ni Pacquiao, last chance ng mga Pinoy na maipanalo ang isang seryosong kandidato na sasaklolo sa hanay ng nagdarahop.

◘◘◘

NAKATUTURETE kasi ang mga plataporma dahil pare-pareho lang lahat ng kandidato, pero si Pacquiao ay aktuwal niyang naipatupad nang walang pondo na nagmula sa gobyerno ang kanyang “housing project” sa Mindanao.

Aktuwal din siyang namimigay ng salapi kahit walang eleksyon.

◘◘◘

LUBOG ang bansa sa 13 trilyong pisong utang sa World Bank.

Sino raw ang tunay na nakakaramdam ng sitwasyon ng mga nagdarahop?

◘◘◘

HINDI dapat kutyain si Pacquiao dahil si dating Pangulong Ramon Magsaysay ay isang pobreng mekaniko lang.

Pero, si Magsaysay ay minahal ng mga Pinoy.

◘◘◘

AYON mismo kay Pacquiao, siya ang huling tumatayong pag-asa ng mga Pinoy.

Siya umano ang “last man standing” sa mga huling arangkadahan bago mag-eleksyon sa Lunes.

◘◘◘

WALANG nakikitang solusyon sa giyera ng Russia at Ukraine.

Imbes na humupa, gumagrabe pa ito nang todo.

◘◘◘

KAPAG hindi nagkaroon ng ceasefire o peace talk bago mag-Pasko, walang duda, lalawak ang digmaan.

Maaaring magkaroon na ng direct confrontation ang Russia kontra US-NATO tandem.

At alam na ninyo ang kasunod: Ikatlong digmaang pandaigdig.

◘◘◘

KAKAMBAL ng giyera-mundial ay krisis sa ekonomiya.

Ang lahat ng eksperto ay nagkakaisa: Babagsak ang world economy sa susunod na taon, 2023.

Ang lahat ng digmaang pandaigdig ay pinasisiklab ng krisis sa ekonomiya.

◘◘◘

SA Pilipinas, hindi pinag-uusapan ang krisis sa ekonomiya.

Bakit?

Sapagkat kapag pinag-usapan, magreresulta ito ng pagpapataw ng dagdag na buwis.

◘◘◘

BUWIS ng ordinaryong tao ang nagpapatatag sa gobyerno.

Direkta kasing susustentuhan ng ordinaryong mamamayan ang sariling gobyerno upang manatiling nakatindig.

Ganyan, kasimple ang pulitika.

Dignidad ng Comelec dapat ingatan alang-alang sa halalan

ni Ka Ambo - @Bistado | May 2, 2022

INIREKOMENDA ang pagsuspinde sa 2 ehekutibo ng Comelec dahil sa pumalpak na presidential at vice presidential debates.

Bistado naman talaga eh.

◘◘◘

INUULIT natin, ang mga debate kapag inilabas sa kahit anong plataporma ng media ay awtomatikong may “monetary agenda”.

May mga nagtangkang “kumita”.

Ganu’n lang kasimple.

◘◘◘

HINDI dumadalo sina ex-Sen. Bongbong Marcos at Meyor Sara dahil posibleng “gamitin” sila bilang “content” upang makahatak ng sponsors.

Eh, sino ang tatabo sa commercial placements?

D’yan dapat nakatutok ang imbestigasyon, wala nang iba pa.

◘◘◘

NAIS palabasin ng mga nasasangkot na Comelec executives na “kasalanan o paglabag sa batas, o immoral” ang hindi pagdalo sa “Comelec-sponsored debates”.

Kapag sinabing “Comelec-sponsored debate”, may konotasyon ‘yan na nakipagkutsaba ang Comelec sa isang kaduda-dudang “media ventures”.

Iyan ang dapat suriin.

◘◘◘

SINISISI diumano si Marcos dahil sa hindi pagdalo sa “Comelec debates kuno”, dahil napurnada ang diskarte ng mga kawatan?

Mabuti naman at patas ang mga Comelec commissioners at agad itong pinaimbestigahan.

Hindi nila kinukunsinte, kung sakali mang nagkaroon ng tangkang “corruption”.

He-he-he.

◘◘◘

MALINAW na ang mayorya ng komisyoner sa Comelec ay iniingatan ang reputasyon ng kanilang grupo.

Mahalagang maingatan ang dignidad ng Comelec, dahil d’yan nakasandal ang kredibilidad ng resulta ng halalan.

◘◘◘

HINDI ba kayo nakakahalata, pare-pareho lang ang plataporma ng lahat ng kandidato?

Nakatuturete na.

Walang bago, walang naiiba, panay generic.

Walang matinong plataporma ang mga kandidato.

◘◘◘

ANG mga nagwawagi sa eleksyon ay hindi nakabatay sa kuwalipikasyon at plataporma.

Suriin n’yo ang mga nasa Magic 12 sa resulta ng mga opinion survey.

May matitino bang plataporma ang mga ‘yan?

◘◘◘

ANO ang “common” sa mga nasa Magic 12 ng senatorial survey?

Lahat sila ay naglulustay ng milyun-milyong piso sa media ads — mainstream at social media.

Saan nanggagaling ang kanilang campaign budget?

Alam na n’yo ang sagot.

Ngayon, may mapapala ba kayo o may pagbabago bang magaganap kapag nahalal ang nasa Magic 12?

Waley.

Huwag gawing negosyo ang pagkandidato

ni Ka Ambo - @Bistado | May 1, 2022

MAYO na, buwan na ng ulan.

Walang nag-aayos ng mga kanal.

◘◘◘

BUWAN din ng bulaklak ang Mayo.

Kakambal ito ng Oktubre kung saan araw-araw din ang pag-usal ng Holy Rosary ng mga Katoliko.

◘◘◘

SA pulitika, ito naman ang buwan ng eleksyon.

Ang halalan ay siyang pinakasagradong okasyon sa isang demokratikong gobyerno.

Ang paghahalal ay siyang kaluluwa ng isang malayang bansa — ito ang pundasyon ng katatagan ng isang Republika.

◘◘◘

HINDI dapat ipagpaliban ang petsa ng eleksyon na itinakda mismo ng Konstitusyon.

No.1 dapat na prayoridad sa budget ang eleksyon — hindi ito dapat panghihinayangan dahil 'yan mismo ang dugo at buhay ng demokrasya.

◘◘◘

KAKAUNTI sa mga kandidato ang nakakaunawa sa esensiyon ng halalan.

Marami sa kanila ay ginagawang “negosyo” ang pagkandidato — 'yan ang nagpapabulok sa ating pamahalaan.

◘◘◘

DIGITAL environment na ang nararanasan natin, pero sino ang ganap na nakakaunawa nito?

Wala.

◘◘◘

TANGING ang mga kabataan ang may sapat na pang-unawa sa digital system.

Pero, hindi ito ganap na nauunawaan ng henerasyon, mayroon nang bagong teknolohiya na sumasapaw dito.

Ito ay ang metaverse.

◘◘◘

MULA sa digital world, maghuhunos ito tungo sa ganap na metaverse.

Sa metaverse, magsasanib-sanib ang pagkilos at galaw ng isang lipunan.

◘◘◘

ANG mga batas ay dapat iniaangkop na agad sa digital environment at metaverse system.

Pero, paano ito mauunawaan ng mga kandidatong walang inaatupag kundi ang magnakaw gamit ang pork barrel?

◘◘◘

DAPAT ipaubaya sa mga kabataan ang paghawak ng gobyerno.

Alisin sa gobyerno ang mga retiradong heneral at retirado sa gobyerno.

◘◘◘

KAILANGAN ng gobyerno sariwang-sariwang enerhiya ng mga kabataan.

Walang kandidato na tumatalakay ng ganyang plataporma at ideya na tunay na magsusulong ng ganap na pagbabago sa ating henerasyon.