Pramis ni P-BBM, bababa ang singil sa kuryente?!

ni Ka Ambo - @Bistado | June 12, 2022

KAYRAMI nang kinumpirma na itatalaga sa gabinete si President–elect BBM.

Kasama sa sumisingaw na pangalan ay si Rep. Rodante Marcoleta na sinasabing target ang maging hepe ng Department of Energy (DoE).

'Yun nga lang, dedma pa rin ang kampo ni Marcos.

◘◘◘

NAGLABAS naman ng emosyon si Marcoleta na tipong nagpapakipot at hindi interesado.

Tila ba kampante at walang makahihigit sa kanyang kuwalipikasyon.

Huh, 'di nga?

◘◘◘

PERO, may tsismis na ang orihinal na natitipuhan ni Marcoleta ay ang pagiging DOJ secretary.

Ang problema, nasapawan agad siya ni Rep. Boying Remulla.

◘◘◘

GAYUNMAN, higit na malalaking pangalan ang babanggain ni Marcoleta bago niya makopo ang DoE.

Kasi’y aspirante rin sa naturang posisyon ang anak ni ex-P-GMA na si Rep. Mikey Arroyo.

◘◘◘

HINDI lang ang ex-presidential son ang namumuro bilang DoE chief kundi maging ang hepe ng ERC, dalawa pang dating gabinete at isang teknokrat na walang padrino na si Benito Ranque.

Kumbaga, magdaraan pa sa butas ng karayom si Marcoleta bago niyang makuha ang premyo sa pag-atras bilang kandidatong senador.

At bakit naman siya pepremyuhan sa simpleng pagtanggap niya sa napipintong kabiguan, aber?

◘◘◘

PERO, in fairness, nilinaw naman ni Marcoleta, na hindi siya interesado sa puwesto sa DoE.

Hindi rin niya ipagpipilitan umano ang kanyang sarili sa naturang posisyon.

Huh, madrama kahit tapos na ang pilian sa “national artist” award.

◘◘◘

SA totoo lang, nagtatagal ang pagpili sa hepe ng DoE, dahil may pamantayan rin si P-BBM para sa mga taong itatalaga niya sa puwesto.

Dapat siyempre may sinseridad, paninindigan at kakayahang isakatuparan ang mga ipinangako niya noong panahong ng kampanya.

◘◘◘

NAIPANGAKO kasi ni P-BBM na maibaba ang singil sa konsumo ng elektrisidad na hindi nagawa ni ERC chief Agnes Devanadera.

Nais din ni Marcos na mapababa ang presyo ng petrolyo, kung saan tanging eksperto lamang o may karanasan at kaalaman sa pasikut-sikot sa DoE ang makagagawa nito.

◘◘◘

NAGBANTA na ang China sa Taiwan.

Sakaling magdeklara ng independensiya ang Taipei ay hindi silang mangingiming kubkubin ito kahit pa nagpa-bodyguard ang US at mga kaalyado nito.

◘◘◘

AYON sa mga eksperto, ang Taiwan ay ikinukumpara sa Ukraine na biglang sinakmal ng Russia.

Kapag ganyan, delikado ang Pilipinas, sapagkat “strategic territory” ang Maynila kaya’t hindi malayong kasama ang ating bansa sa sorpresang bobombahin.

◘◘◘

WALANG duda na dedepensahan naman ng US ang Taiwan ang unang estratehiya ay makontrol ang puwersa mula sa Pilipinas.

Mauulit ang sinapit na kapalaran ng Maynila sa panahon ng World War II, mawawasak ang Pilipinas—sa isang digmaang wala tayong pakialam dapat.

Dahilan na lang ang COVID para makapagnakaw ang mga korup

ni Ka Ambo - @Bistado | June 11, 2022

NASAKSIHAN natin ang groundbreaking ceremony ng Taguig city Science Terminal and Exhibit Center isinagawa kamakalawa.

Isang inobasyon ito na makatutulong sa mga mananakay o komyuter.

◘◘◘

ITATAYO ang naturang terminal complex sa loob ng DOST compound, General Santos Ave. Bicutan, Taguig city.

Bukod sa terminal ng mga bus, dyip at traysikel, ito ay magiging exhibit center ng mga programa at proyekto ng DOST na repleksyon ng talino at diskarte ng sambayanang Pinoy.

◘◘◘

PINONDOHAN ang proyekto sa pamamagitan ni dating Speaker Alan Peter Cayetano, kung saan nagsanib-puwersa ang DOST, DPWH at ang siyudad ng Taguig upang maisakatuparan ang proyekto.

Ayon kay Cayetano, ang bagong gusaling itatayo ay mayroon kinalaman sa Science, innovation at technology.

◘◘◘

LAYUNIN ng 5-storey building na mayroon basement at roof deck, upang maorganisa ang transport system sa lugar na maaaring mapaunlakan ang mga pasahero, commuters at pedestrians.

Maiibsan nito ang trapiko sa siyudad at magkakaroon ng pagkakataon ang ordinaryong tao na masulyapan ang inobasyon at imbensyon ng mga Pinoy sa nagdaang panahon.

◘◘◘

AALISIN na ang face mask sa Cebu.

Pero, kinokontra pa rin ng mga eksperto.

Killjoy!

◘◘◘

SA totoo lang, negosyo na lamang ang COVID-19 at ginagamit din katwiran dito upang makapandambong ng salapi ang mga korup sa pamahalaan.

Dapat iutos ni P-BBM ang malawakang imbentaryo at auditing sa lahat ng transaksyon na may kaugnayan sa COVID-19.

◘◘◘

KARANIWANG inaakusahan ang mga LGUs sa hindi maayos na paggastos sa emergency fund.

Kailangan maging transparent ang gobyerno sa paglalabas ng pondo, tulad sa kalamidad partikular sa COVID-19 crisis.

◘◘◘

MAGING ang WHO ay pinagdududahang nakikipagkutsaba sa mga dambuhalang multinational drug companies na nagbebenta ng vaccines at gamot.

Nagdarahop ang buong daigdig pero nagkakamal ng salapi ang mga multinational corporations.

◘◘◘

KRISIS sa ekonomiya ang agenda ng lahat.

‘Yan ang dapat prayoridad ni P-BBM.

Presyo ng petrolyo, ‘di malabong pumalo ng P100 sa first day ni P-BBM

ni Ka Ambo - @Bistado | June 10, 2022

MAHABA na ang listahan ni President-elect BBM ng mga bagong gabinete.

Kabilang sa natukoy na niya ang bagong kalihim sa Department of Education (DepEd); Department of Interior and Local Government (DILG); Department of Justice (DOJ); Department of Finance (DoF); at National Economic Development Administration (NEDA).

◘◘◘

ILAN ang pangalan ng aspirante ang inilalabas bilang nominado bilang kalihim sa Department of Energy (DoE), pero wala pa talagang kinumpirma.

Maselan ang ginagawang pagsala ni P-BBM sa mga nominado, kasi’y mahalaga ang kagawarang ito na makakaapekto sa ordinaryong mamamayan.

◘◘◘

PINALOBO na ngayong linggo ang presyo ng petrolyo at inaasahan itotodo pa ang dagdag-presyo sa susunod na linggo.

Sumasabay dito ang pagtaas sa singil ng elektrisidad na hindi naman mapigil din mismo ni Energy Regulatory Commission (ERC) chief Agnes Devanadera.

◘◘◘

KUNG ang sobrang taas sa singil ng Meralco at dispalinghadong billing ay nakalulusot, paano makatutulong si Devanadera sa pagpigil sa presyo ng petrolyo kung sakaling siya ang mahugot bilang kalihim ng DoE?

Kumbaga, walang landmark achievement si Devanadera sa ERC, paano niya maidedepensa ang konsyumer ng petrolyo laban sa abusadong oil companies?

◘◘◘

KUMOKONTRA sa appointment ni Devanadera ang ilang lider ng electric cooperatives sa kanayunan at mga consumer rights groups .

Kabilang ang Power for People Coalition (P4P).

Ayon mismo kay P4P Convenor Gerry Arances, walang pagsidlan ang kabi-kabilang isyu at kapalpakan ni Devanadera sa ERC at maging sa mga dating tanggapan kung saan siya dating itinalaga.

◘◘◘

KABILANG sa pumupuntirya sa DoE post sina Rep. Mikey Arroyo na anak ng isang dating Pangulo; at Sagip partylist Rep. Rodante Marcoleta na kasapi ng Iglesia ni Cristo.

Gayundin ang dalawang dating Kalihim – sina Vince Perez at Rene Almendras.

Pero, ano ba ang nagawang mabuti nina Perez at Almendras sa kani-kanyang ahensiya?

Waley!

◘◘◘

IPAGDASAL nating matumbok ni P-BBM ang angkop na kalihim para sa DoE dahil malaki ang tsansa na aabot ng higit sa P100 ang presyo ng diesel at gasoline kada litro sa unang araw ng kanyang pag-upo sa Hulyo 1.

Mahalagang matulungan ang taumbayan ng mauupong DoE secretary kontra krisis sa langis.

◘◘◘

SALA-SALABAT na ang trapik.

Nakapagtatakang kahit mataas ang presyo ng petrolyo ay marami pa ring motorista ang nasa gitna ng kalye.

Anong klase ito ng phenomenon?

◘◘◘

KUNG maraming motorista na lumalabas sa gitna ng oil price increase, nangangahulugan ba ito na may sapat na “cash” ang mga Pinoy?

Mahirap sagutin, pero totoo ‘yan.

◘◘◘

BATAY sa law of supply and demand, kapag malaki ang demand, talagang tataas nang todo ang presyo.

Ibig sabihin, indikasyon ba ito ng malusog na ekonomiya?

◘◘◘

SA kabilang panig, maaaring malakas ang demand sa petrolyo dahil ang sektor ng middle class ay may sapat pang “cash”, pero paano na ang sektor ng mga nasa ilalim o laylayan?

Malinaw na lumalayo ang “agwat” ng mayayaman sa sektor ng mga nagdarahop.

◘◘◘

MARAMI nang gumagapang sa hirap sa antas ng mga nagdarahop, nagbabalik muli sila sa mga lalawigan upang makatakas sa gutom.

Ang mga nasa siyudad nama’y sumusuweldo nang hindi sapat — bagkus ay makaraos lang ng maghapon.

Ang tawag d’yan ay “stagflation”, may tubig sa kanal, pero “burak at pusali” ang amoy.