Ipaubaya ang ROTC sa DepEd at AFP, huwag sa mga mambubudol

ni Ka Ambo - @Bistado | August 5, 2022

DUMALAW na si US House Speaker Nancy Pelosi sa Taiwan.

Malaking gulo ini.

◘◘◘

NAGBANTA ng resbak ang Mainland China.

Hintayin natin kung tototohanin nila.

◘◘◘

KAPAG nagkagulo sa Taiwan strait, damay ang Babuyan Islands, Batanes at Ilocandia.

Kinumpirma na nasa bisinidad ng Philippine Sea ang US warships.

◘◘◘

NABABANGKAROTE na ang maraming negosyo sa Germany at Europe.

Biktima rin sila ng giyera ng Russia at Ukraine.

◘◘◘

MATINDI ang energy crisis sa Europe, posibleng marami ang mamatay dahil sa heatwave.

Walang magagamit na fuel para sa air conditioning units.

◘◘◘

BINUHAY ang mga coal plants dahil sa kakapusan ng natural gas at petrolyo mula Russia.

Imbento lang ng tao ang krisis, pero gumagrabe pa.

◘◘◘

MAAARING tumatakas na mula Europe ang mga bilyonaryo para maging turista sa Asya.

Isa ang Pilipinas sa mga paboritong destinasyon.

◘◘◘

SUPORTADO ng ilang sektor ang pagbabalik ng ROTC.

Babalik din kaya ang raket na “grade for sale”, tulad sa sinaunang “Yado”?

◘◘◘

SANA ay maiayos ang implementasyon ng ROTC at ipaubaya ito sa DepEd at AFP imbes na sa mga “budol-budol”.

Maganda ang mithiin ng ROTC, palpak lang sa implementasyon.

Korupsiyon ang dahilan.

◘◘◘

TUMATAAS ang presyo ng mga gulay.

Palpak ang solusyon.

Kasi’y para bumaba ang presyo ay “mag-import” imbes na magtanim.

Kitam!

◘◘◘

SA malawakang pagtatanim, tulad ng Green Revolution o industrial farming, ang makikinabang ay magsasakang Pinoy.

Sa importasyon, ang makikinabang ay mga pusakal na ismagler.

Nagbabala nang pagbagsak ng ekonomiya, nakupo!

ni Ka Ambo - @Bistado | July 18, 2022

IBINABALA na ng mga eksperto ang global economic meltdown kung sakaling biglang pigilin ng Russia ang pag-export ng petrolyo at natural gas.

Unang makararanas ng pagguho ng ekonomiya ang buong Europe, partikular ang Germany.

◘◘◘

NGAYON pa lamang ay dumaranas na ng krisis maging ang U.S.

Sa Germany, inaasahang mababangkarote ang malalaking negosyo dahil sa kakapusan ng suplay ng enerhiya na nagmumula sa Russia.

◘◘◘

SIYEMPRE magdurusa rin mismo ang Russia dahil pag-e-export lang ng petrolyo at gas ang sumasagip sa kanilang ekonomiya.

Pero kapag nagipit si Vladimir Putin, posibleng masorpresa ang buong daigdig — sa oil boycott ng Moscow.

◘◘◘

SA ngayon ay partial lamang o hindi pa ganap ang pagpigil ng Russia sa energy supply.

Pero, nagpa-panic na ang Germany at kalapit na bansa.

◘◘◘

SIYEMPRE, damay ang Pilipinas.

Aktuwal nang nararanasan ang krisis sa matinding pagbaba ng halaga ng piso kontra dolyares.

Nangangahulugan ito ng mataas na presyo ng imported products tulad ng langis.

◘◘◘

MAAGANG paghandaan dapat ang oil crisis at ngayon lamang ay dapat magtipid o magsinop sa pagkonsumo ng petrolyo.

Mas mainam ay pondohan ang malawakang paggamit ng solar at wind energy.

◘◘◘

DAPAT magkusa ang malalaking korporasyon na mag-invest sa solar energy industry at mag-install ng solar panel sa lahat ng lalawigan.

Kailangan gumawa ng batas na magsusulong ng clean energy upang makatakas tayo sa krisis.

◘◘◘

ANG Pilipinas, batay sa geographical location ay angkop sa solar at wind energy taliwas sa ibang bansa.

Napakasuwerte ng Pilipinas dahil sa lokasyon nito sa mapa.

◘◘◘

SA totoo lang, may sapat na lugar din ang Pilipinas pakinabangan ang “wave energy” na gamit ang alon sa karagatan na pumapalibot sa ating archipelago.

Kasabay ng wave energy, puwede ring mabungkal ang deuterium o hydrogen energy na nakamina o nasa kailaliman lamang ng pusod ng karagatan.

◘◘◘

SAKALING hindi mapigil ang world economic meltdown, tanging ang dolyares mula sa higit 10 milyong Pinoy overseas ang magsasalba sa Pilipinas.

Dire-diretso lang ang pagpasok ng dollar remittances sa ating bansa.

Bulag, bingi at pipi na ba ang LGUs?

ni Ka Ambo - @Bistado | July 17, 2022

BUMABAHA nang todo ang mga bayan sa kahabaan ng MacArthur Highway sa Bulacan.

Walang solusyon dito dahil ang “high tide” ang nagpapabaha kahit umulan lamang nang bahagya.

Paano pa kapag nag-“siyam-siyam”?

◘◘◘

KABILANG ang mga bayang nakararanas nang walang solusyong baha ay ang Obando, Meycauayan, Marilao, Bocaue, Balagtas, Malolos, Guiguinto, Hagonoy at Calumpit.

Imbes na masolusyunan, inaasahang gagrabe ito nang todo dahil sa pagtatambak sa ipinagyayabang na Bulacan Airport sa Bulacan, Bulacan.

◘◘◘

ANG Bulacan Airport ay magpapabago ng landscape sa lalawigan dahil ang mga palaisdaan na karatig nito sa Malolos at Hagonoy ay pinapakyaw na rin ng mga real estate developer.

Ang buong dalampasigan ng Manila Bay na sakop ng Bulacan ay pinapakyaw upang tambakan ng lupa at gawing “Bulacan Aero City”.

◘◘◘

ANG tatambakang lupain ay pinapakyaw kung saan mababawasan nang malaki ang bukirin at palaisdaan na pinagkikikitaan ng mga magsasaka sa mangingisda.

Walang LGU executive na kumokontra dahil sa lihim na dahilan.

◘◘◘

BUMABAHA ng salapi sa nakaraang eleksyon sa Bulacan — at malaki ang posibilidad na ang salaping ginamit sa kampanya — ay siyang “tunay na ugat” kung bakit walang nangangahas na kontrahin ang Bulacan Airport.

Isisisi ng mga Bulakenyo ang pagbahang walang solusyon sa Inang Kalikasan, imbes na isisi sa mga LGU executives na yumuyukod sa “bagong Panginoon” sa lalawigan.

◘◘◘

NABAHAG na rin ng buntot ang sinasabing “Dugo ng mga Katipunero” dahil walang kumokontra sa Bulacan Airport kahit alam nilang ito ang sanhi ng “kalamidad sa paglubog sa baha” ng kanilang mga ari-arian.

Saan napunta ang kukote ng mga Bulakenyo?

◘◘◘

MARAMI ang lihim na natuwa nang ibasura ni Pangulong Marcos ang isinusulong na Bulacan Ecozone, kung saan ang mga buwitreng negosyanteng magtatambak at magpapabaha sa Bulacan ay hindi pagbabayarin ng buwis.

Ang mga buwitreng negosyante ay wala ring malinaw na proposal o plano kung paano mababayaran ng maayos at sapat ang mga lupaing masasakop ng kanilang negosyo.

◘◘◘

NAKAPAGTATAKANG bulag, pipi at bingi hindi lang ang mga LGU executives, bagkus ay maging ang ordinaryong tao na nabobola sa “hilaw na pangako” ng kaunlaran.

Nasaan ang mga sinasabing “Apo ng mga Rebolusyunaryong” naging bahagi ng pagtatag ng Malolos Republika.

Hindi tabak ang kanilang hawak ngayon, bagkus ay kumikinang na paldo-paldong polymer banknotes na hindi pwedeng tiklupin at dumihan mula sa mga bagong “dayuhan” sa lalawigan.