Agrarian Act at Industrial Act makatutulong sa farmers

ni Ka Ambo - @Bistado | August 28, 2022

MATAGAL na nating isinusulong ang malawakang paglulunsad ng tinatawag na industrial farming.

Ito lang ang sagot upang magkaroon ng sapat na suplay ng produktong agrikultural.

◘◘◘

KUNG mayroon tayong agrarian act, dapat magkakaroon ng industrial farming act.

Kung ang agraryo ay nakapokus sa magsasaka, ang industrial farm act ay nakapokus naman sa mismong kapitalista.

◘◘◘

BIBIGYAN ng kaukulang insentibo—dayuhan man o Pinoy investors sa sinumang mangangapital sa industrial farming.

Masasakop nito hindi lang ang pagtatanim ng palay, bagkus ay isasama ang mais, sibuyas, cocoa, kape, papaya, pinya o kahit pa ang coconut, palm at iba pang produktong agrikultural, tulad ng gulay na aalagaan sa mga dambuhalang “green houses”.

◘◘◘

ANG malalaking korporasyon tulad ng SMC at Robina ay may investment sa piggery at poultry, bakit—hindi sila magkusang magtanim din ng palay at magbungkal ng mga panot na gubat at bundok sa Luzon, Visayas at Mindanao.

Napakalawak ng bakanteng lupain o idle land sa Pilipinas, pero hindi ito pinakikinabangan.

◘◘◘

SA gitna ng bagyo, ulan at baha, mas maganda pa rin ang klima ng Pilipinas, kaya’t puwedeng magtayo ng dambuhalang “greenhouse complex”, kung saan kontrolado ang temperatura at daloy ng tubig.

Bakit walang ganyang programa o proyekto ang gobyerno at malalaking korporasyon?

◘◘◘

KASABAY nito, hindi dapat nakapasan o nasa balikat lamang ng central government o Malacañang ang pagsusulong ng industrial farming.

Bigyan ng wagas na awtonomiya ang mga LGUs na maghikayat, mag-organisa at makipagnegosyon sa pribadong sektor upang maisulong ang industrial farming.

◘◘◘

MAKIKITA natin na ang sapat na suplay ay kasingkahulugan ng industrial farming.

Walang industrial farming, kaya’t kapos ng suplay.

◘◘◘

TIGILAN na ang paggamit ng dispalinghadong terminong “supply shortage”.

Ang kapos ay ang kapitalista na pumapasok sa industrial farming.

◘◘◘

ANG inobasyon sa agrikultura ay ang mismong industrial farming dahil kasama na rito ang inobasyon, teknolohiya at pagpapabuti ng kakayahan ng mga magsasaka na isasailalim sa maselang pagsasanay kasama na ang paggamit ng mga heavy equipment at modernong farm implement.

Sana ay maunawaan ito ng mga kinauukulan.

Kumpirmadong walang shortage sa suplay ng asukal

ni Ka Ambo - @Bistado | August 25, 2022

BATAY sa serye ng pagsalakay sa mga warehouses, nakumpirma na walang shortage sa suplay ng asukal.

Kinakartel ang supply at iniipit ang pagbebenta.

Bistado 'yan ng Malacañang at Senado.

◘◘◘

HINDI lang sa suplay ng asukal nararanasan 'yan, kundi maging sa kartel ng bigas, frozen meat at gulay.

Ganyan din, nasa warehouses lamang ang suplay kaya't pinalolobo ang presyo.

◘◘◘

SA totoo lang, ang mga grocery items ay ganyan din, ipinapasok sa loob ng bansa gamit ang modus ng “technical smuggling”.

Technical smuggling ito dahil may dokumento ng importasyon kakutsaba ang mga signatories na mga opisyal ng gobyerno.

◘◘◘

MATAGAL nang modus-operandi

'yan.

Kaya’t pinag-aagawan ang rekomendasyon sa sinumang mauupo sa Bureau of Customs at Department of Agriculture.

◘◘◘

MAKIKITA natin na tumpak na umaktong kalihim ng DA si Pangulong Marcos.

Malinaw na nabuwag agad niya ang sindikato sa asukal.

◘◘◘

MAS mainam sana ay si Pangulong Marcos din ang maupong komisyoner sa Adwana kahit one year lang.

Mahirap pagkatiwalaan ang mga rekomenda lamang dahil maaaring smuggling lords ang siyang nagrerekomenda.

◘◘◘

OPO, technical smuggling ang modus-operandi.

Madaling makalusot 'yan kasi'y kakutsaba ang mga signatories.

◘◘◘

HINDI pa rin tapos ang giyera ng Russia at Ukraine.

Matira ang matibay.

◘◘◘

HINDI magkandatuto ang mga eksperto sa depinisyon ng depression, recession, stagflation o krisis sa ekonomiya.

Bagumbago na kasi ang ating henerasyon.

Meaning, may bago nang halimaw.

Siyempre, may bago na ring “diyos” na lilitaw.

◘◘◘

KUMBAGA sa yin and yang at sa kilos ng negative at positive.

Kapag may bagong demonyo, awtomatik may bagong diyos.

◘◘◘

SA sinaunang kuwento ng mga kababalaghan ni Lola Basyang, ang aswang ay walang kamatayan.

Sa “The End” ng pelikula, biglang babagsak sa mesa ang “pusang itim”.

"Pricey at outdated" na laptop, tsikahan nina sir at ma'am

ni Ka Ambo - @Bistado | August 24, 2022

BALIK-ESKWELA na.

Klap-klap-klap!

◘◘◘

MASAYA si Ma’am sa faculty room, dami siya ka-'Marites'.

Hindi maubos ang tsikahan.

◘◘◘

PINAKAMAINIT na tsika ang P24 bilyong laptop ng DepEd na “pricey and outdated”.

Ayon sa COA, umaabot sa P58,300 bawat isa gayung ang laman nito ay low-end processor lamang.

◘◘◘

PLANO sana ng DepEd ay bumili lamang ng laptop na halagang P35,046.50 na aabot sa 68,500 public school teachers ang mabibigyan.

Pero umabot sa mahigit P58-K bawat isang laptop kaya 39,583 guro lamang ang nabigyan.

◘◘◘

NALAGAY sa alanganin ang kredibilidad ng supplier na LDLA Marketing and Trading Inc.

Nilinaw ng LDLA at ng partner na Sunwest Construction and Development Corp. at VSTECS Philippines Inc. ay hindi “pinaboran” kundi sila ang talagang nanalo sa bidding ng kontrata “fair and square.”

◘◘◘

SA pagsasabing overpriced, hindi umano binigyang-halaga ng COA ang iba pang factors na nakakaapekto para sa final price sa bawat laptop.

Ayon pa sa LDLA, sila ay nag-o-offer ng software business solutions para alalayan ang management system ng isang eskwelahan.

◘◘◘

KABILANG umano sa mga naging brand partners ng LDLA ang Globe, PLDT, Microsoft, Dell, Epson, Samsung, Huawei, Fujitsu at Canon.

Sila rin umano ang preferred partner ng Dell Computers at naging kliyente nila ang Mindanao State University (MSU),DICT, DOTr, DENR, BoC, BI, Pagcor at NTC.

◘◘◘

MASASABING ang LDLA ay hindi naman isang kompanya na parang kabute lamang sumulpot sa bidding.

Pero ganun ba talaga kamahal ang kanilang laptop o sadyang marami lamang naki-markup pa along the way?

◘◘◘

MAHABA-HABANG usapan ito na nangangailangan ng matinding balitaktakan at paliwanagan.

Walang duda, enjoy si Ma’am at Sir sa dami ng isyu sa loob at labas ng iskul.

◘◘◘

TEKA, kasabay ng school opening ay pagbubukas din ng mga perya-perya kuno sa iba’t ibang lugar na kinukunsinte ng LGU, barangay at PNP.

Marami ring media at hao shiao ang umo-orbit.

◘◘◘

NAIS nating ipabatid sa mga peryante na ipaaresto ang sinumang gumagamit ng pangalan ng inyong abang lingkod at umoorbit sa peryante.

Kailanman ma'y hindi tayo bahagi ng modus ng media na umoorbit sa mga perya.

◘◘◘

MAY natanggap tayong impormasyon na alyas tangkad at iba pang haoshiao ang nagda-drop ng ating pangalan sa mga perya.

Puwede ninyong ireklamo sa pulis at ipaaresto.

◘◘◘

GINAGAWANG gatasang baka ng ilang opisyal ng gobyerno at taga-media ang perya dahil may aktwal na sugalan dito tulad ng popular na color game.

Delikado na mabuyo ang mga estudyanteng tila nakawala sa kural.