Foreign ownership, daan para dumagsa ang direct foreign investors na magpapaunlad sa ‘Pinas

ni Ka Ambo @Bistado | February 3, 2023

Tumpak din na gamiting iskema ang Constitutional Convention (ConCon) imbes na ang Constituent Assembly.

Dahil sa demokrasya, dapat ay inihahalal nang direkta ng mga tao ang babago sa fundamental law.

◘◘◘

MALAKI rin ang tama na magpokus sa probisyon na magpapaunlad o magpapasigla ng ekonomiya.

Numero-uno dito ay ang pagpapahintulot sa “100% foreign ownership” sa mga negosyo.

◘◘◘

DAPAT nating aminin na walang sapat na capital ang mga negosyanteng Pinoy upang mapasigla ang ekonomiya.

Siyempre, ilalagay sa probisyon ng Konstitusyon ang proteksiyon o “safeguard” upang hindi mabastos ang soberanya ng bansa.

‘Yan mismo ang trabaho ng mga delegado sa ConCon.

◘◘◘

MAGIGING susi sa pag-unlad ng bansa ang foreign ownership upang dumagsa ang direct foreign investment na siyang susi sa pag-unlad ng malalaking bansa.

Lilikha kasi ito ng maraming trabaho at hindi na kailangan pang mangibang-bansa ang mga Filipino.

◘◘◘

WALANG duda na makakatulong din ang isinusulong na Maharlika Investment Fund (MIF) na siyang magbibigay ng kinakailangang puwersa para sa 2028 vision ni Pangulong Ferdinand Bongbong Marcos, Jr.

Ibig sabihin, ang Maharlika Fund ay magiging lehitimong probisyon sa Konstitusyon.

◘◘◘

NAIS ni P-BBM na kumbinsihin ang mga investors sa World Economic Forum na makilahok sa target na potential sustained at dynamic growth ng bansa.

Si Pangulong Marcos lamang ang nag-iisang ASEAN leader, at isa sa dalawang lider mula sa Asya na inanyayahan sa WEF na idinaos sa Davos, Switzerland.

◘◘◘

KATUWANG ang House of Representatives sa pamumuno ni Speaker Ferdinand Martin Romualdez na maisusulong ang economic agenda sa Konstitusyon.

Ayon mismo kay House Ways and Means Committee chair Joey Salceda, ang MIF ay magiging private sector-driven at ang seed money ay magmumula sa mga GOCCs.

◘◘◘

ANG mga dibidendo ng GOCC ay “real surpluses” at dapat gamitin bilang paunang pondo para sa MIF, na magiging isang listed company sa Philippine stock market.

Kinumpirma rin ni Finance Secretary Benjamin Diokno na mahihigop ng Maharlika Fund ang mga foreign investors.

◘◘◘

MALINAW na ang paninindigan ni P-BBM na ang “friend to all, enemy to none” ay maipapasok sa Konstitusyon.

Epektibo ang naturang motto, hindi lang sa international policy, kundi maging sa larangan ng ekonomiya.

◘◘◘

KUNG ang mga dayuhan ay pahihintulutang magkaroon ng 100% na pagmamay-ari, tiyak na dadagsa ang kapital sa bansa.

Noong 2021, ang Singapore ay may investments na tinatayang nasa PHP80.2 bilyon—pinakamalaki mula sa mga dayuhang kapitalista.

Inaasahang lolobo pa ang capital mula sa Singapore na susundan ng ibang bansa na magiging gulugod sa pag-angat ng Pilipinas.

Nagsulputan ang mga one day millionaire

ni Ka Ambo @Bistado | January 24, 2023

Pinalaya na pansamantala ang dating chief of staff ni ex-Senate President Juan Ponce Enrile na si Gigi Reyes.

Ang dahilan?

Mahabang proseso ng prosekusyon.

Sana’y mabiyayaan din ng ganitong “diskarte” ang libu-libong “akusado”, lalo na ang mga “walang kasalanan”.

◘◘◘

MAGAGAMIT nang precedent sa korte ang “justice delayed, is justice denied”.

Maraming abogado ang “tatabo”.

◘◘◘

WALA pang ulat kung tagumpay o hindi ang biyahe ni P-BBM sa Europe.

Tiyak na ibababad sa media ang “bilyong pisong pledges”.

◘◘◘

KASAMA ni P-BBM sa Davos, Switzerland ang mga multi-bilyuraryong Pinoy.

Doon sila sa Europe nagkumpirensya imbes na sa MOA.

◘◘◘

HABANG bumibiyahe sa China at Europe si P-BBM, maraming ang “marites” ang umiintriga sa aberya ng liderato sa AFP at PNP.

Ngayon lang ito nararanasan.

Eh, bakit?

◘◘◘

LAHAT ay nagrereklamo sa sobrang taas ng mga paninda at serbisyo.

Hindi ito ordinaryong sitwasyon.

Ang negatibong epekto ng krisis ay mararanasan next year, 2024—at hindi ngayon.

◘◘◘

MAGING ang US, China, Europe at Russia ay aminadong gumagapang sa krisis.

Pero, ereng mga Pinoy—panay display ng kayamanan.

Kumbaga, nagsulputan ang mga “one-day-millionaire”.

◘◘◘

REVENGED spending ang tawag sa pagsigla ng ekonomiya.

Pero, sabi ng Tatang ko, bulagsak ang tawag d'yan.

Ang salapi raw ay parang tubig: kapag dumating ay parang tsunami na dumadaluyong, pero kapag nagbago ang isip ng hangin, ang salapi ay parang nawasak na dam, rumaragasang pabulusok.

◘◘◘

WALANG nakikinig sa payo ng mga eksperto: Magtipid at magsinop!

Kasi’y pati ang gobyerno ay walang programa sa pagtitipid sa konsumo ng elektrisidad, tubig at masinop na paggastos.

◘◘◘

NAGKALOOB ng bilyong pisong ayuda ang USAID para sa “digital industry”.

Pero, hindi ito nararamdaman, sa ngayon.

Baka dinambong na rin ng mga buwaya.

◘◘◘

MARAMI ang nagsasabi na ang P1,000 bill ngayon ay katumbas ng P100 bill noong dekada '60s at '70s.

Hay, buhay-alamang—paglukso, dedo!

Solb na ang suplay ng sibuyas, itlog naman ngayon

ni Ka Ambo @Bistado | January 13, 2023

NARESOLBA na raw ang kakapusan sa suplay ng sibuyas.

Siyempre, tapos na ang Kapaskuhan.

◘◘◘

TULAD ng bigas na ibinobodega, ang tone-toneladang palay, ganyan din sa sibuyas—iwine-warehouse rin ang tone-toneladang sibuyas.

Pinatataas ang presyo sa pagkontrol ng suplay.

Cartel 'yan.

◘◘◘

WALANG nagbubunyag ng kartel sa bigas at sibuyas.

Korupsiyon ang tawag d'yan.

May bendisyon ito ng mga tiwaling awtoridad.

◘◘◘

KUNG seryoso ang gobyerno na buwagin ang kartel, dapat pakilusin ang ISAFP.

Ang ISAFP ay nasa ilalim ng AFP.

Ito ay upang maibunyag ang modus-operandi ng cartel na kinunsinte mismo ng mga korup na awtoridad, siyempre ay kakutsaba ang intel community.

◘◘◘

DAPAT palakasin ang ISAFP—at ang datos na ibibigay nito—ang siyang dapat pagbasehan ng Malacañang sa kanyang mga desisyon.

Puwedeng paganahin ito sa isyu ng sibuyas at bigas.

◘◘◘

SA pinakahuling balita, ang kinakapos ngayon ng supply ay ang “itlog”.

Tama, kapos ng itlog ang 'Pinas.

Maging ang mga opisyal ng gobyerno at media—ay mahahalatang “walang itlog” na ibunyag ang mga korupsiyon sa pamahalaan at pribadong sektor.

◘◘◘

TALIWAS sa sibuyas at bigas, hindi puwedeng iistak nang matagal sa bodega ang itlog.

Nasisira ang itlog sa loob ng pito hanggang 15-araw.

◘◘◘

MADALING matukoy kung expired ang nabili ninyong itlog.

Kapag binasag ang itlog nang dahan-dahan at lumitaw na “hindi buo ang pula”—bagkus ay tunaw ito at hindi nakakorte nang bilog—bulok ang itlog.

◘◘◘

MALINAW kung gayun na ang kakapusan ng itlog ay hindi artipisyal.

Pero hindi itlog ang kapos, ang kapos ng suplay ay ang “inahing manok”.

Meaning kapag kapos ng itlog, kakaunti lang ang manok na nangingitlog.