May ‘bumubuo’ ng civil-military junta, sinu-sino?

ni Ka Ambo @Bistado | November 22, 2025

Aktuwal nang ibinunyag ni Sen. Ping Lacson na dinedma niya ang alok na mapasama siya sa isang “civil-military junta”.

Hindi isyu rito kung sasali o hindi sasali si Lacson sa junta, bagkus ay isang kumpirmasyon ito na “may bumubuo ng civil-military junta”.

-----$$$--

MASELAN ang expose, kasi bakit ‘nakatakas’ sa ISAFP ang naturang highly confidential information?

May itinatago ba ang AFP?

Nasaan ang transparency?

------$$$--

OBLIGADO ngayon si Lacson na ibunyag kung sino at sinu-sino ang nag-alok sa kanya na makasali sa junta.

Sa totoo lang, sintomas na rin ng ‘pag-uulyanin’ ang estilo ni Lacson, dahil hindi niya “sinasadya” — nabubunyag ang highly confidential information.

-----$$$--

SINTOMAS ito ng paghina ng “cognitive” dahil hindi niya nakontrol ang sarili at ibinunyag ang lihim na usapan.

Tama lang ang ulat na hindi na dapat kumandidato pa si Lacson at kanyang tandem na si Senate President Tito Sotto sa mga susunod na eleksyon.

-----$$$--

NAUNA rito, inabsuwelto ni Lacson si PBBM sa isyu ng P100 bilyong budget insertion — nalimutan niya na hindi niya trabaho ang humatol o magdesisyon, bagkus — limitado lamang ang Blue Ribbon Committee sa pagkalap ng datos — “IN AID OF LEGISLATION”.

Masyadong premature ang “hatol” ni Lacson dahil nagsisimula pa lamang makakalap ng mga datos — at hindi pa nagbibigay ng testimonya ang ilang testigo.

-----$$$--

NAWAGLIT sa isip ni Lacson na hindi niya sinasadya — naikumpirma rin niya ang pagiging “guilty” ng executive branch ng gobyerno bilang main proponent ng P100 bilyong insertion.

Dahil hindi na makakaiwas pa si Lacson makaraang ituro niya sina ex-Executive Secretary Lucas Bersamin at Budget Secretary Amenah Pangandaman bilang mga posibleng “nagmaniobra” sa iskema.

Paano ngayon ‘yan?

-----$$$--

MALINAW ngayon na ang P100 bilyong insertion scam ay natukoy sa tanggapan ng Punong Ehekutibo — na ikinakatawan nina Bersamin at Pangandaman — kapwa alter-ego ni PBBM!

Indirectly, hindi maiiwasang maidawit dito ang mismong Chief Executive — dahil sa command responsibility!

Pero, hindi napapansin ng marami, inililigtas lamang ni Lacson bilang “mastermind” ang Kongreso — mga senador at kongresista.

-----$$$--

MALINAW na hindi patas ang kaliwat’t kanang imbestigasyon — dahil ang mga nag-iimbestiga ay nagmula sa “institusyong iniimbestigahan” mismo — ehekutibo at lehislatura.

Maging ang ICI ay nilikha gamit ang executive order — gayung ang isinasangkot ay mismong lumikha ng “executive order”.

Paano natin ipapaliwanag ‘yan sa mga kabataan, sa hukuman at sa mga eksperto sa batas?

----$$$--

ANG pagsisiyasat sa multi-bilyong pisong insertion ay ginagampanan dapat ng isang “COMPOSITE TASK FORCE” na bubuuin ng mga kinatawan ng constitutional bodies — gaya ng Civil Service Commission, Commission on Audit, Commission on Elections at Ombudsman — wala silang pananagutan sa Chief Executive, bagkus ay tanging sa KONSTITUSYON LAMANG!

Para maging patas at malinis — bigyan ng puwang bilang observers ang religious group, business sector, kabataan at maging ang “media community”.

-----$$$--

WALANG pasusulingan ang imbestigasyon — dahil aakusahang pamumulitika at “whitewash” ang imbestigasyon — dahil sa kaduda-dudang komposisyon ng mga imbestigador.

Sabagay, may sapat pang panahon — para maitama ito ng Malacañang — sa lalong madaling panahon, bago makaranas ng “credibility crisis” ang imbestigasyon.

-----$$$--

TANGGAPIN sana si PBBM ang mapait na katotohanang ito, bago mahuli ang lahat!

Kailangang “malinis” ang pangalan ni PBBM ng grupong walang bahid-pagdududa!

Nauunawaan kaya niya ito?

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

Sumasalimuot ang kaso dahil nahahaluan ng pulitika at personal

ni Ka Ambo @Bistado | November 22, 2025

Nagkakaproblema at sumasalimuot ang imbestigasyon sa talamak na katiwalian sa gobyerno dahil sa pagbanggit ng mga personalidad.

Ibig sabihin, isa-isantabi muna ang “character” o mga pangalan ng nasasangkot sa multi-bilyong pisong corruption upang makita nang maayos ang larawan o perspektibo ng sitwasyon.

----$$$--

NAGIGING pulitika at personal ang mga impormasyon at argumento kapag hinaluan ng personalidad.

Ibig sabihin, obhektibo at teknikal dapat ang mga pagtaya, opinyon o impormasyon na inilalabas.

-----$$$--

KAPAG walang personalidad na inililitaw, maiiwasan na akusahang “pulitika” o “personal” ang imbestigasyon o pagsisiyasat.

Halimbawa, magkasundo muna sa mga impormasyon kinakatigan ng bawat panig.

Ito ay upang mabilis na matukoy kung ano ang naganap, aktuwal na nagaganap — at magiging resulta sa hinaharap.

----$$$--

GANITO ang mas maayos na diskarte kaugnay ng masalimuot na katiwalian.

Una, nagkakaisa ang lahat ng panig — na may “aktuwal na pandarambong, technical man o hindi isang technical malversation na naganap, nagaganap at magaganap pa”.

Ikalawa, nagkakaisa ang lahat na sangkot ang ilang opisyal o kawani o tauhan ng DPWH (nagkakaisa rin na hindi 100 percent ng personnel ng DPWH ay sangkot para ingatan ang reputasyon ng department).

-----$$$--

IKATLO, dawit sa katiwalian ang Kongreso — Senado at Kamara ng mga Representante (hindi lahat ng senador at hindi rin lahat ng kongresista).

Walang debate r’yan!

-----$$$--

IKAAPAT, sangkot din at kakutsaba ang ilang personnel — high ranking at rank-and-file — ng Department of Budget and Management (DBM).

Ikalima, dawit din ang opisina ng Office of the President na ikinakatawan ng opisina ng Executive Secretary (hindi rin lahat ng personnel).

----$$$--

IKAANIM, sangkot ang ilang pribadong kontraktor.

Ikapito, involved din ang staff at opisyal ng Commission on Audit (COA) — partikular ang ilang resident auditor.

-----$$$--

IKAWALO, sangkot din ang ilang pribadong tao — gaya ng mga bodyguards, security o personal assistant o maging mga tsuper.

Ikasiyam, dawit din ang ilang staff ng mga bangko sa “pagtanggap at paglalabas” ng hindi ordinaryong bulto ng salapi.

-----$$$-

PANSAMPU, alamin ang mismong iskema o modus operandi — at tukuyin kung ang “kutsabahan” ay naganap din bago ang Marcos Jr. administration.

Sa 10 diskarte na tinukoy natin — nang walang binabanggit na “aktuwal na pangalan” — matutukoy natin nang mas malinaw at mabilis — ang ugat, iskema at solusyon ng problema.

-----$$$--

MAS makikita ang perspektibo ng talamak na corruption kapag wala munang tinutukoy na mga “pangalan” — markahan na lamang ito ng Mr. A, Ms. B o Madame X.

Ano ang gagawin sa mga “personalidad na aktuwal na sangkot” sa katiwaliang ito?Iyan na mismo ang “trabaho at responsibilidad ng Ombudsman, hukuman, NBI at ibang ahensya: Kilalanin at kasuhan ang mga personalidad — batay sa ebidensya at testimonya na makakalap.

----$$$--

Nagkakagulo at sumasalimuot ang kaso — dahil nahahaluan ng pulitika at personal.

Malinaw na hindi kasama rito ang “isyu ng paggamit ng droga” — malayong-malayo iyan sa kaso ng katiwalian.

Kumbaga, “ibang usapan ‘yan”!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.

SP Sotto, competent pa ba na maging lider ng Senado?

ni Ka Ambo @Bistado | November 21, 2025

Nagulantang ang lahat sa pasabog ni Sen. Imee sa kilos-protesta ng INC sa Luneta.

Inakusahan niya ang sariling kapatid at First Family na gumagamit ng ipinagbabawal na gamot.

Nanangkupooo!

----$$$--

SARI-SARI ang opinyon sa social media sa eksena ni Manang Imee na isinapubliko na mismo ang “away” sa kanyang Ading.

Hindi makapaniwala ang marami.

----$$$--

PERO iisa ang malinaw, sinapawan nito ang expose ni ex-Rep. Zaldy Co kaugnay ng insertion at iskandalo sa flood control project.

Maging si Sen. Ping Lacson ay “bumigay” at inilarawan ang behavior ng kapwa-senador na “Un-Filipino”.

-----$$$--

Nasapawan din nito ang pag-aabogado ni Senate President Tito Sotto sa expose naman ni ex-DPWH Usec. Roberto Bernardo na direktang nagdadawit kina Sen. Mark Villar at ex-Sen. Grace Poe.

Ibig sabihin, imbes na maging “neutral” — idinepensa agad ni Sotto si Poe.

May mga nagtatanong: Competent pa ba si Sotto na maging lider ng Senado?

----$$$--

Nakababahala ang agarang pagkontra ni Sotto sa testimonya ni Bernardo.

Agad niyang sinabing “baligtad” at ang DPWH pa raw ang may utang sa pamilya ni Poe.

Huh, eh, bakit?

----$$$--

KUNG duda siya sa mga sinabi ni Bernardo sa latest Blue Ribbon hearing, dapat sana ay wala na ring bisa ang lahat ng pahayag niya mula pa noong umpisa.

Para na rin niyang sinasabing: “Walang maniniwala riyan, move on na tayo.”

-----$$$---

TILA lantarang idinedepensa ni Sotto ang mga kaalyado na nabanggit sa Senate hearing.

Kapag ganyan, si Sotto mismo ang sumisira at nagwawasak ng kredibilidad, dignidad at integridad sa proseso ng Blue Ribbon Committee.

-----$$$--

KUNG alam talaga ni Sotto ang pundasyon at esensiya ng responsibilidad ng isang presiding officer o mismo ng pangulo ng Senado — hindi siya dapat nagpapakita ng lantarang pagkampi sa iisang panig lamang.

Ang pagiging Senate president — ay hindi lamang umaakto para sa kapakanan ng mga miyembro ng “mayorya”, bagkus siya rin ang pangulo na dapat nangangalaga sa karapatan ng minorya — at sikaping igalang ang mga datos at impormasyong nakakalap sa mga pagdinig.

-----$$$--

MAAARING nagiging emosyonal lamang si Sotto, pero dapat ay sinasarili na lamang niya ito — at kailangan na maging “patas ang mga opinyon” na lumalabas sa kanyang bibig.

‘Ika nga ng high school teacher ko na si Ms. Pariscal: “Aba’y kahit pakitang-tao, ay magpakita ka”!

----$$$--

SABAGAY, madaling unawain si Tito Sen, hindi malayong tulad ni Manay Imee, maaaring “may pinagdaraanan” din siya.

May tsismis kasi na anumang oras o anumang araw ay maaaring maagaw din ang kanyang posisyon dahil sa “hindi maayos” na pagtrato sa mga miyembro ng Senado.

Ano sa pakiramdam ninyo?

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.