Panukala, pampapogi lang ng mga mambabatas — JPE.. P64K sahod sa nurse, tablado

ni Mai Ancheta | May 16, 2023

Sinupalpal ni Chief Presidential Legal Counsel at dating Senate President Juan Ponce Enrile ang panukala sa Kamara na gawing P64,000 ang sahod ng mga nurse sa gobyerno.

Ani Enrile, masyadong mataas ang panukala kaya dapat na timbangin ng mga mambabatas ang suweldo ng mga manggagawang nasa gobyerno at pribadong sektor.

Kapag aniya nangyari ito ay tataas ang inflation at wala ring mangyayari sa idinagdag sa sahod sa government nurses.

Binanatan ni Enrile ang mga mambabatas na hindi aniya nag-iisip at hindi naiintindihan ang ginagawa basta makapagpapogi lamang sa publiko.

Nilinaw ng abogado ng Palasyo na hindi siya tutol sa pagtaas ng sahod ng mga manggagawa sa gobyerno subalit dapat pag-aralan din kung ito ba ay makakaapekto sa ibang sektor ng lipunan.

Drug war ‘pag inimbestigahan.. Taga-ICC, arestuhin — Enrile

ni Mylene Alfonso | January 31, 2023

Nagbanta si Presidential Chief Legal Counsel Juan Ponce Enrile na ipaaaresto ang mga imbestigador ng International Criminal Court (ICC) na magtutungo sa Pilipinas upang imbestigahan ang anti-drug war campaign ng dating administrasyong Duterte kung hindi sila hihingi ng pahintulot mula sa gobyerno.

Nanindigan si Enrile na hindi papayagan ng gobyerno ng Pilipinas ang sinuman sa mga opisyal na imbestigahan at litisin ng international court.

“We will not allow any of our officials to be investigated or tried by the International Criminal Court,” pahayag ni Enrile sa sidelines ng Philippine Development Plan Forum sa Pasay City kahapon.

Sinabi rin ni Enrile na walang dahilan para magimbestiga ang ICC dahil gumagana ang judicial system sa bansa.

“I’m telling you as lawyer of the President, I will not allow as far as I am concerned, I will not recognize the jurisdiction of the International Criminal Court of Justice. They have no sovereign power over us,” diin ni Enrile na dati ring nagsilbi bilang Senate President.

Kung magpupumilit umano ang mga taga-ICC ay kanya itong ipahuhuli. “If they will come here, if I were to be followed, I will cause their arrest. They interfere too much in our internal affairs,” hirit niya.

“We do not have an uncivilized judicial system. I will not allow them to come here to the country to investigate here.

They have to ask permission,” wika ni Enrile.

Dagdag ni Enrile, non issue ang usapin at hindi nila kailanman napag-usapan ni Pangulong Ferdinand Marcos, Jr. ang tungkol sa nasabing bagay nang tanungin kung

napag-uusapan nila ang naturang isyu.

“Hindi namin pinag-uusapan ‘yan,” ayon pa kay Enrile.

Enrile, Guevarra at Faustino, bagong napili sa Marcos’ Cabinet

ni Lolet Abania | June 17, 2022

Napili sina dating Senate president at beteranong mambabatas na si Juan Ponce Enrile, at outgoing Department of Justice (DOJ) Secretary Menardo Guevarra na maging bahagi ng gabinete ni President-elect Ferdinand “Bongbong” Marcos Jr.

Sa isang statement ngayong Biyernes, sinabi ni Press Secretary-designate Trixie Cruz-Angeles na si retired General Jose Faustino Jr. ay naidagdag din sa listahan ng mga opisyal ng Marcos’ Cabinet.

Ayon kay Angeles, si Enrile ang magiging Presidential Legal Counsel, si Guevarra bilang Solicitor General, at si Faustino ang siyang senior undersecretary at officer-in-charge, at sa kalaunan ay kalihim ng Department of National Defense (DND).

Sa Hunyo 30, nakatakdang maupong pangulo ng bansa si P-BBM. Sinabi ni Angeles na ang bagong nominasyon ang highlight ng commitment ni P-BBM hinggil sa aniya, “to encouraging economic development and inclusive growth.”

Si Marcos, anak ng yumaong dating Pangulong Ferdinand Marcos Sr., ay nangakong ipaprayoridad ang agrikultura, healthcare, edukasyon, infrastructure development, digital infra, job creation, at ang utilization ng renewable energy.