‘Di kailangang bongga, besh! Mga simpleng paraan para maging masaya

ni Jersy L. Sanchez - @Life & Style| May 16, 2022

‘Pag sinabing “happiness,” karaniwang pumapasok sa isip natin ang mga goals. Bagama’t true naman ito, beshies, ang happiness ay puwede rin namang maliliit na bagay, ‘yung tipong, keri nating gawin araw-araw.

Nakakapagod din kasi ‘yung araw-araw nating pinagsisikapang ma-achieve ang isang bagay na pinaniniwalaan nating magbibigay sa atin ng kaligayahan. Pero sa totoo lang, ang happiness ay puwedeng maranasan sa iba’t ibang paraan.

For sure, curious ka sa mga paraan na ito, kaya naman narito ang ilang tips para maging masaya tayo araw-araw:

1. ALAGAAN ANG KATAWAN. Alam nating hindi madaling mag-maintain ng healthy lifestyle, pero knows n’yo ba na ang simpleng exercise tulad ng pag-i-stretching sa umaga o maiksing cardio workout ay nakatutulong upang mag-produce ng happy chemicals ang ating katawan? Yes, besh! Ayon sa mga eksperto, ang happy chemicals tulad ng endorphin at dopamine ay nakatutulong upang mapaganda ang ating sense of well-being. Ang kombinasyon ng pag-e-ehersisyo at healthy diet at regular sleep cycle ay nakatutulong upang magkaroon tayo ng magandang mood.

2. PALAKASIN ANG SELF-ESTEEM. Ang self-esteem ay ang kumpiyansa natin sa ating sarili. At ang pagkakaroon ng mataas na confidence ay mahalaga upang magkaroon ng healthy at happy relationship sa ating sarili. Pero paano nga iba ito ma-a-achieve? Maaari itong simulan sa pagkausap sa iyong sarili habang nakaharap sa salamin o kaya naman, alamin mo kung ano ang iyong mga kahinaan at kalakasan.

3. MAGING OPTIMISTIC. For sure, may mga pagkakataong hindi nangyayari ang inaasahan natin, pero besh, ‘di ito dapat makaapekto sa kung ano ang mararamdaman natin sa bagay na ‘yun. Sa halip na magpokus ka sa kabiguan, mas mabuting isipin na pagkakataon ito upang matuto at sumubok muli. Tandaan, kapag hinarap mo ang stressful moments sa ganitong paraan, mas makikita mo ang sitwasyon sa ibang perspective.

4. I-ENJOY ANG SARILI. Ang paggawa ng mga entertaining activities ay nakatutulong upang magkaroon ng magandang araw. Halimbawa nito ang pagbabad sa bubble bath o pakikinig sa mga pampakalmang musika. Sa ganitong paraan, mas name-maintain mo ang iyong sarili, gayundin ma-e-enjoy mo ang iyong sarili at ang iba pang mga bagay na karapat-dapat ma-appreciate at ma-enjoy.

Simple lang, ‘di ba?

Choice natin kung magiging masaya tayo. Tayo rin ang bahala kung sa paanong paraan natin ito gagawin. Basta ang mahalaga, wala tayong tinatapakang ibang tao, at nagiging inspirasyon din tayo sa iba upang maging masaya sila sa kanilang paraan.

Spread the good vibes, beshie! Keri?

Kulang sa tulog, pagiging iritable at malungkot, sign ng pandemic burnout

ni Jersy L. Sanchez - @Life & Style| May 9, 2022

Hindi maitatanggi na nagdulot ng trauma ang COVID-19 pandemic sa iba’t ibang aspeto ng ating buhay.

Bagama’t may ilang pagbabago sa ating sitwasyon matapos ang dalawang taon nang makapasok ang pandemya, nananatiling hamon para sa ilan ang mental health crisis.

At ayon sa mga eksperto, halos lahat ng age group at propesyon — bata, mga magulang, college students at frontline workers — ay hirap sa kanilang mental health sa nakalipas na dalawang taon, kung saan ang mga may preexisting physical and/or emotional challenges ay mas vulnerable sa stress na dulot ng social isolation.

Gayunman, base sa Journal of General Internal Medicine, ang lebel ng mental distress ng healthcare workers sa simula ng pandemya ay maihahalintulad ng moral injury na naranasan ng mga sundalo sa combat zones.

Habang marami sa atin ang nakaranas at patuloy na dumaranas ng burnout o chronic trauma response, nilinaw ng mga eksperto na ang mga term na “burnout” at “trauma” ay hindi lamang ginagamit sa mga apektado ng COVID-19.

Samantala, ibinunyag ng isang doktor na may mga pasyenteng nakararanas ng exhaustion at frustration o pagkapagod at pagkabigo sa kabila ng kanilang preexisting mental health condition.

At bagama’t akala natin ay normal at hindi dapat ikabahala ang nararanasan nating hirap sa pagtulog o pagkairita, ipinaalala ng mga eksperto na ang sintomas ng pandemic trauma ay posibleng magsimula sa simpleng bagay. At ‘pag hindi ito natugunan, posibleng maging hadlang ang burnout sa ating daily activities.

Dagdag pa ng mga eksperto, ang distress sa loob ng mahabang panahon ay maaaring mauwi sa clinical diagnosis at anxiety treatment o Post-traumatic stress disorder (PTSD), ngunit ang burnout ay mas magaan at kayang solusyunan sa pamamagitan ng lifestyle changes.

Pero anu-ano nga ba ang senyales ng burnout?

1. FATIGUE. Kung inaalam mo kung gaano karaming oras ang kailangan mo para tapusin ang isang gawain, malamang na nakakaranas ka na ng burnout.

2. NAIIRITA. Sey ng experts, ang kawalan ng kontrol ay maaaring magresulta sa frustration. Kaya naman, inirerekomendang maging kalmado sa lahat ng pagkakataon, lalo na kapag may mga kausap na tao upang maiwasan ang pagkairita.

3. HIRAP MATULOG. Ang kakulangan sa tulog o sobrang caffeine intake ay isa na ring senyales.

4. MAS MARAMING INIINOM NA GAMOT. Tulad ng caffeine, ang alak at ilang gamot ay posibleng gamitin upang ‘matago’ ang ilang burnout-related behaviors. Gayundin, anumang ginagawa o ginagamit mo upang pagtakpan ang iyong distress ay posibleng warning sign.

5. WALANG SAYA. Tila tinanggal ng pandemya sa atin ang pakikisalamuha sa ibang tao. Bagay na naging dahilan ng kawalan ng interaksiyon sa mga bagong kakilala, gayundin ‘di na natin mabalikan ang mga bagay na nagpapasaya sa atin noon. Kaya kung feeling mo ay ‘di ka masaya at ito ang nagiging dahilan ng kawalan mo ng motibasyon, it’s a sign, besh.

Hindi naging madali para sa ating lahat ang pandemya dahil bukod sa krisis-pangkalusugan, naharap din sa krisis ang ating mental health.

Paalala lang sa mga may pinagdaraanan, ‘wag tayong mahiyang humingi ng tulong sa ating pamilya o mga kaibigan. For sure, nand’yan sila para sa atin at handang makinig sa ating mga hinaing. Tandaan, hindi pagiging duwag ang paghingi ng tulong, bagkus, isa itong senyales ng katapangan.

Gayunman, we hope you are doing well, besh! Fight lang!

Handa ka na bang bumoto? Alamin: dos and don’ts sa halalan

ni Jersy L. Sanchez - @Life & Style| May 5, 2022

Palapit na nang palapit ang halalan, kaya naman ang tanong, handa na bang bumoto ang lahat? Kung hindi pa, don’t worry dahil we got you!

Pero bago ang lahat, ipaalala muna natin na ang halalan ay hindi ordinaryong araw. Bagkus, napakahalaga nito dahil ito ang araw kung kailan tayo magluluklok ng panibagong mga lider na mamumuno sa ating bansa.

Dahil dito, hinihikayat natin ang lahat na bumoto at ‘wag sayangin ang pagkakataong ito upang maging bahagi ng pagpili ng mga bagong lider.

Kaya para sa smooth at iwas-aberyang pagboto, narito ang mga dapat at ‘di dapat gawin sa araw ng halalan:

1. ALAMIN ANG PRECINCT NUMBER. Bago pa man ang araw ng botohan, kailangang alam natin kung saang presinto tayo dapat magtungo. Sa ganitong paraan, maiiwasan ang pananatili nang matagal sa polling place. Para malaman ang precinct number, magtungo sa precinct finder ng Commission on Elections (Comelec). Kailangan lamang ilagay ang iyong pangalan at kung saang distrito at lungsod ka nakarehistro at makikita mo na kung saang presinto ka nakatakdang bumoto. Gayunman, kung hindi makikita ang pangalan sa precinct finder, maaaring magtungo sa opisina ng election officer para maberipika kung saan ang iyong presinto.

2. MAGDALA NG ID. Bagama’t hindi requirement sa pagboto ang ID, mabuti pa ring magdala nito upang mabilis na maresolba ‘pag nagkaroon ng problema sa pagkakakilanlan.

3. KODIGO. Sa dami ng kailangan nating iboto, oks lang naman na gumamit ng kodigo. Magandang paraan ito upang maiwasan ang pagkakamali sa pag-shade ng mga ibobotong kandidato, gayundin upang hindi magtagal sa pagpili kung sino ang iboboto sa mismong araw ng eleksiyon.

4. PROTEKTAHAN ANG BALOTA. Bago simulan ang pag-shade, tiyaking malinis ang balota at walang anumang sira o dumi. Ayon kasi sa batas, ang “spoiled” ballot ay hindi tatanggapin ng machine at kung ito ay kasalanan ng botante, hindi na maaaring magbibigay ng panibagong balota. Gayunman, kung nakatanggap ng spoiled ballot bago pa man ito i-shade, ipagbigay-alam sa poll officer nang sa gayun ay mapalitan ito. Isa pang paalala, tiyaking tama ang pag-shade at iwasang mag-over vote upang hindi masayang ang iyong boto. Samantala, puwede ang mag-under vote, ngunit hinihikayat ang mga botante na kumpletuhin ang listahan.

5. ITSEK ANG RESIBO. Pagkapasok ng balota sa VCM o vote counting machine, hintaying lumabas ang resibo at mamarkahan ang iyong daliri gamit ang indelible ink. Matapos makuha ang resibo, tingnang mabuti kung tugma rito ang mga ibinoto mo. Kung nagkataong hindi tugma ang nasa resibo at balota, lumapit sa election inspectors at ipaalam ang iyong complaint.

6. ‘WAG KUNAN NG LARAWAN ANG BALOTA. Base sa guidelines ng Comelec, hindi pinapayagan ang pagkuha ng larawan ng balota o resibo dahil maaari itong magamit sa vote buying o vote selling. Gayundin, isang election offense ang paglabag sa ballot secrecy.

7. OVER CAMPAIGNING. Ayon sa Comelec, walang restriksiyon sa dapat isuot ng mga botante sa araw ng halalan, pero nagbigay-babala ito na iwasan ang over campaigning. Bagama’t maaaring magsuot ng anumang kulay ng damit, dapat umanong iwasang magsuot ng damit na may pangalan o larawan ng kandidato dahil hanggang Mayo 7 lamang ang campaign period.

Simpleng paalala lamang ang mga nasa itaas, pero mga besh, ‘di dapat kalimutan ang mga ito para maging smooth o maayos ang ating pagboto. Gayundin, ‘wag natin kalimutang sumunod sa health protocols, partikular ang pagsusuot ng facemask at pagsunod sa social distancing.

Isa pang paalala, kung tutuusin ay isang araw lamang ang halalan, pero kung magluluklok tayo ng mga may “K” mamuno, anim na taon ng maayos at de-kalidad na serbisyo-publiko ang matatanggap natin. Bagay na ‘ika nga, eh, “deserve” ng bawat Pilipino.

Hangad natin ang malinis at payapang halalan at mangyayari lamang ‘yan kung gagampanan ng bawat isa ang obligasyon na maging responsableng botante.

Gets mo?