After ng holding hands sa Spain… BEA AT VINCENT CO NG PUREGOLD, MAGKASAMA SA AIRPORT SA THAILAND

ni Janiz Navida @Showbiz Special | May 11, 2025

Vincent Co at Bea Alonzo - Circulated, Fashion Pulis

May kasunod nang sighting kay Bea Alonzo at sa bago niyang boyfriend ngayong rich businessman na si Vincent Co na anak ng may-ari ng Puregold.

Matapos ngang mag-viral ang holding hands while walking photo nila sa Spain na bagama't nakatalikod ay nakilala pa rin ng mga netizens, sa Suvarnabhumi airport naman sa Thailand nakita ang bagong couple.

Marami ang na-happy para kay Bea sa bago niyang dyowa dahil at least ay magka-level na raw sila financial wise at bagay na bagay din ang kanilang heights and looks.

Ang ipinangangamba lang ng mga fans ay kung tanggap si Bea ng family ni Mr. Vincent Co na isang Chinese. It's an open book naman na mas gusto siyempre ng mga Chinese parents na kalahi nila ang maging karelasyon ng kanilang anak.

Well, according sa isang reliable source na close sa pamilya Co ng Puregold, nagulat man nu'ng una ang parents ni Vincent na si Bea pala ang bagong idine-date ng kanilang anak, so far ay wala pa naman daw pagtutol ang mga ito.

At bago pa pala ipinost ni Mr. Vincent Co sa kanyang IG account ang holding hands photo nila ni Bea na nagsilbing soft launch na rin nila, alam na pala ng pamilya niya ang relasyon nila.

Hmmm… too early to tell pero marami ang nagwi-wish na sila na nga ang endgame dahil pareho naman na raw silang nasa tamang edad na at puwedeng-puwede nang magpakasal.

---

ANYTIME ay puwede na sanang masundan ang 3-year-old daughter nina Dennis Trillo at Jennylyn Mercado na si Dylan dahil nakapagpa-freeze na nga ng eggs ng aktres sa Amerika.

Pero ayon kay Dennis nang makausap namin sa launch niya as the newest ambassador ng Beautederm Belle Dolls Zero Filter Sunscreen, ine-enjoy pa nila ni Jen ang kanilang bunso, bukod sa marami pa silang naka-lineup na projects na priority nilang matapos muna.

Gusto rin sana ng mag-asawa na muling makasali sa MMFF 2025 kaya naghahanap sila ng right project after Green Bones kung saan co-producer sila last year.

Medyo mapili ang DenJen sa mga projects na tinatanggap nila dahil mas gusto nilang may impact ang kanilang gagawin at hindi para may magawa lang.

Samantala, feeling blessed si Dennis dahil bukod sa mabenta pa rin siyang aktor sa TV at movies, may mga pumasok din sa kanyang endorsements this year at isa na nga rito ang pagiging ambassador ng Beautederm Belle Dolls Zero Filter Sunscreen.

Puring-puri siya ng CEO ng Beautederm na si Ms. Rhea Anicoche-Tan dahil kahit nu'ng hindi pa raw siya ambassador ng businesswoman, naglaan siya ng oras at sumama sa misis na si Jennylyn para dumalo sa intimate birthday party ni Ma'm Rei.

Sobrang touched ang CEO na totoong tao ang DenJen at hindi pera-pera lang.

Naku, sino raw ‘yung pera-pera, oh?!!! Char!!!

---

Iilan lang daw ang napili… IZA: ‘DI KAILANGANG 12 SENADOR ANG IBOTO KUNG ‘DI DESERVING

TAWA naman nang tawa si Iza Calzado nang biruin namin sa nakaraang media event nina Ms. Roselle Monteverde at Atty. Keith Monteverde ng Regal Entertainment para iendorso si Kiko Pangilinan na tumatakbong senador.

Humirit kasi si Iza na lantad ang pagsuporta sa mister ni Sharon Cuneta ng, “Isama po nating ilagay si Kiko sa ating balota.”

Kaya ang biro namin kay Iza, “Kung may ilalagay, sino ang ilalaglag?”

Nagpakatotoo naman ang aktres na iilan pa lang ang napili niyang iboto at hindi naman daw kailangang kumpletuhin ang 12 kung hindi naman deserving para maging senador.

Hindi na namin inalam kung sinu-sino ang kanyang iboboto dahil obyus naman kung sino ang kanyang mga ineendorso.

Anyway, bukas na, May 12, ang eleksiyon at sabi nga sa FB post, “‘Di ka man matalino, sana kahit sa pagpili na lang ng kandidato ay maging matalino ka.”

Boom!!!

Hindi si Sharon… IBINUKING NI KAKIE: SI KIKO ANG NAMAMALENGKE

ni Janiz Navida @Showbiz Special | May 10, 2025

Kiko at Kakie Pangilinan - IG

Napaka-sweet naman ng pangalawang anak ni Sharon Cuneta sa muling tumatakbong senador na si Francis “Kiko” Pangilinan na si Frankie.

Kahit wala sa ‘Pinas ngayon si Kakie (palayaw ng dalaga) at busy pa para sa nalalapit niyang college graduation sa USA, nakaisip pa rin ito ng paraan at talagang nag-effort maipakita lang na sinusuportahan niya ang pagbabalik-Senado ng ama.

Idinaan ni Kakie sa handwritten letter na addressed sa mga city mayors sa buong bansa ang suporta para maikampanya si Kiko, at dito niya ipinakilala ang pagkatao ng ama.

Proud na ipinost ni Megastar Sharon sa kanyang Instagram account ang mahabang handwritten letter ni Frankie.

Dito ay nabanggit ng dalaga na sa loob ng ilang taon ay nakaranas ang kanyang ama ng iba't ibang paninira sa pagkatao nito na aniya ay “heartbreaking” dahil ‘di naman totoo.

Idiniin din niyang “humble man” ang ama at napakasimple nitong tao na ang t-shirt nga raw ay dekada nang ginagamit at ang pinakikinggan ay disco music.

“Mahiyain po ang tatay ko,” aniya. “Siya po mismo ang namimili na mga household groceries at namamalengke para sa amin, and he attends all our sport meets, recitals, parent-teacher conferences. He's used the same watch and wallet for as long as I can remember, and wore the same pair of Converse sneakers for the 14 years. It took one of my cousins to notice at binilhan po siya ng bago, at ‘yun po mismo ang suot ni Daddy ngayon sa pagkampanya.”

Dagdag pa niya, “Habang buhay po siyang ganito. He has served the Filipino people for over 20 years with this consistency, this diligence and discipline. And I know for certain that, with your help, he will continue to advocate for that which he has always stood for: FOOD SECURITY and the Filipino farmer.”

Binanggit din ni Kakie na wala silang bilyong budget para sa kampanya ng ama, pero naniniwala siyang sa rekord na naitala nito sa ilang taon nang paglilingkod, lalo na para sa agricultural development, dapat makakuha ng suporta si Kiko mula sa ating mga kababayan nang maibalik din nito sa mamamayan ang tulong ‘pag ito'y muling naging senador.

Samantala, sa comment section ng IG post ni Mega ay mababasa na ikinagulat ni Kakie ang pag-post at pag-tag sa kanya ng ina ng kanyang handwritten letter. 

Aniya pa, 30 minutes na niyang tinatawagan si Sharon pero hindi ito sumasagot.

Sa reply lang ni Sharon kay Kakie sa IG nalaman na naka-DND (Do Not Disturb) mode pala siya kaya dedma sa mga calls ng anak.

Na-happy naman ang mga netizens sa convo ng mag-ina at touched na touched sila sa gesture ni Kakie para kay Kiko kaya nangako ring susuportahang muli ang senatorial bid ng ama sa Lunes, Mayo 12.

Just curious and asking, ano naman kaya ang ginagawa ng iba pang anak nina Sen. Kiko at Sharon para suportahan ang senatoriable, especially KC na milyun-milyon din ang supporters and followers sa socmed, ha?

---

KAUGNAY ng pagdiriwang ng Labor Day noong MAY 1, tinalakay ng CIA with BA hosted by Sen. Alan Peter Cayetano and Tito Boy Abunda (on leave ang isa pang host na si Sen. Pia Cayetano na tumatakbong senador) ang mahahalagang isyu ng mga manggagawa sa segment nitong Tanong ng Pilipino sa episode noong Mayo 4.

Isang manonood mula Quezon City ang nagtanong tungkol sa kanyang employer na walang ibinigay na pormal na kontrata.

Tatlong taon na raw siyang nagtatrabaho sa kumpanya pero wala siyang kontrata. Kaya ang tanong niya, “Saan puwedeng lumapit na Labor [office], sa main branch po ba?”

Sumagot ang legal expert na si Atty. Matt Cesa at ipinaliwanag na ang mga reklamo ukol sa labor ay maaaring idulog sa Department of Labor and Employment (DOLE) Regional Office na pinakamalapit sa lugar ng trabaho.

Sinang-ayunan din ni Atty. Cesa ang sinabi ng nagtanong na ang alam niya, 180 araw o katumbas lang ng 6 na buwan na pagtagal sa trabaho, dapat ay regular na siya.

Ani Atty. Cesa, “Tama [‘yon] na after six months or 180 days, regular na dapat ‘yung employee. Pero lagi nating tatandaan na ‘yung probationary employment, dapat sinasabi ‘yan at the time na pumasok ka sa trabaho mo.”

Binigyang-diin niya na dapat malinaw na sinasabi ng employer kung ang isang manggagawa ay nasa probation period, at dapat ipaalam din ang mga pamantayang kailangang matugunan ng empleyado.

Ang daming natututunan ng viewers tungkol sa batas sa CIA with BA kaya naman parami nang parami at patuloy na nadaragdagan ang mga tumututok sa programa na napapanood tuwing Linggo, 11:00 PM sa GMA-7, at may replay tuwing Sabado, 10:30 PM sa GTV.

Pareho raw sila ng misis na si Jennylyn… DENNIS, AYAW NG KAAWAY, ‘DI NAG-ENDORSO NG PULITIKO

ni Janiz Navida @Showbiz Special | May 9, 2025

Beautederm baby na rin ngayon ang magaling na aktor na si Dennis Trillo!

Ginanap kahapon ang official launch at contract signing ni Dennis bilang ambassador ng Belle Dolls by Beautederm ni Ms. Rhea Anicoche-Tan sa Solaire Resort North, QC.

Feeling loved naman si Dennis sa mainit na pag-welcome sa kanya ng mga Beautederm babies na bukod sa kanyang misis na si Jennylyn Mercado, bumati rin sina Maja Salvador, Sylvia Sanchez, Lorna Tolentino, Kakai Bautista, Sofia Pablo, Shaira Diaz, EA Guzman at marami pang iba.

Marami ang nagulat na napapayag na rin si Dennis na maging ambassador ng beauty product dahil sabi ng misis niyang si Jennylyn noon, hindi vain ang aktor at walang hilig magpahid-pahid sa mukha.

Pero dahil nagmo-motor ang mag-asawa, naengganyo na rin ni Jen si Dennis na gumamit ng Cristaux serum at Belle Dolls Zero Filter Sunscreen na ginagamit niya para ‘di masira ang skin nila sa sobrang init ng araw kapag nagra-rides sila.

At bilang celebrity nga si Dennis, alam niyang responsibilidad din niyang alagaan ang kanyang looks.

Biniro nga namin ito na dahil mas pumogi siya ngayon, baka dumami na naman ang tuksong lumapit sa kanya.

Natawa lang ito at ang sagot, hindi naman daw talaga nawawala ang tukso pero mature na raw silang pareho ni Jennylyn para pag-awayan pa ang mga ganitong bagay.

Very vocal din si Dennis na ang birthday wish niya sa May 12 ay lagi lang maging buo ang kanilang pamilya, kaya for sure, hindi ito gagawa ng dahilan para ikasira ng pamilya nila ni Jen kahit ilang tukso pa ang lumapit sa kanya.

Samantala, tinanong namin si Dennis kung may mga pulitiko rin bang lumapit sa kanila ni Jennylyn para magpaendorso this midterm elections. Very open na kasi ang mga artista ngayon sa pagpapahayag ng kanilang mga sinusuportahang kandidato at ikinakampanya pa.

Sagot ng aktor, napag-usapan nila ni Jennylyn na gusto nila ay tahimik lang at ayaw nila na may mang-aaway sa kanila dahil sa pagsuporta nila sa mga pulitiko o dahil may pinapanigan sila, kaya mas pinili nilang maging neutral na lang para tahimik ang buhay.

In fairness, may punto naman talaga siya ru’n, kaya siguro kahit ilang milyones pa ang alok sa kanila para mag-endorso ng pulitiko ay tinanggihan nila.

Anyway, sobrang happy naman ni Ma’m Rhea Tan na finally ay Beautederm ambassador na nga rin si Dennis na aniya ay napakabait at napaka-humble tulad ng asawa nitong si Jennylyn na totoong tao at sobrang sweet daw kaya mahal na mahal niya ang mag-asawa.

Tiyak na magiging malaking tulong si Dennis para makabenta ng maraming products ang Beautederm at Belle Dolls dahil sabi nga ng mga lalaking kasamahan namin sa media, gusto nilang maging kasingguwapo ni Dennis Trillo na at the age of 43, mukhang bagets pa rin at fresh na fresh!

---

FIRST time naming nakita si Ria Atayde matapos itong manganak sa first baby nila ni Zanjoe Marudo sa premiere night ng Nathan Studios Mother’s Day offering na Picnic na palabas na ngayon sa mga sinehan.

Korean movie ang Picnic pero dahil gusto ni Ms. Sylvia Sanchez na mother dear ni Ria at siyang punong-abala sa Nathan Studios Productions na mas maging appealing ito sa mga Pinoy viewers ay nagdesisyon silang i-dub ito in Tagalog at kinuha nga nila para mag-dub sa mga boses ng mga bida sina Ms. Nova Villa, Ms. Ces Quesada, Bodjie Pascua, Fyang Smith at JM Ibarra.

Ani Ria nang makausap namin sa premiere, kahit naman nu’ng buntis siya ay gumagalaw siya bilang producer ng Nathan. Pero sa ngayon, dahil maliit pa ang baby nila ni Zanjoe, okay muna na itong kanilang business venture ang tutukan niya dahil hindi pa rin siya handang magbalik-acting since maliit pa nga ang anak nila.

Pero kapag may dumating naman daw na magandang project ay willing siyang umarte uli. ‘Yun lang, hindi sila puwedeng magsama ni Zanjoe sa isang project dahil walang magbabantay sa kanilang anak. Hands-on pa naman ang mag-asawa sa pag-aalaga rito kaya dapat, hindi sila sabay magtatrabaho.

Anyway, ang daming na-touched sa magandang kuwento ng Picnic na sakto talagang panoorin ng buong pamilya ngayong Mother’s Day dahil ang daming mare-realize rito lalo na ng mga anak na walang pagpapahalaga sa kanilang mga magulang.

Sabi nga ni Ms. Sylvia, kung sa Korean version ay 5 times siyang umiyak, nang i-tagalize nila ito, mas matindi ang suntok sa puso ng mga linyahan at eksena ng Picnic na tiyak na hahaplos din sa puso ng mga Pinoy viewers.

Kaya sa mga anak na gustong i-treat ang kanilang parents this Mother’s Day, sabay na kayong manood ng Picnic sa mga sinehan at for sure, magiging very memorable ang inyong bonding moment.