Napoles, ex-DAR exec, guilty sa P50M ‘ghost projects’

ni Jeff Tumbado @News | July 25, 2026

Photo: File / Janet Napoles - Correctional Institution for Women

Hinatulan ng Sandiganbayan Sixth Division na guilty sina Janet Lim-Napoles at dating Department of Agrarian Reform (DAR) Undersecretary Jerry Pacturan sa 10 bilang ng malversation of public funds through falsification of public documents kaugnay ng mahigit P50 milyong halaga ng umano’y pekeng proyekto para sa mga magsasaka sa Luzon.

Nahatulan din si Napoles ng 10 bilang ng paglabag sa Anti-Graft and Corrupt Practices Act, habang napawalang-sala si Pacturan sa mga kasong graft dahil sa kakulangan ng ebidensya.

Nasentensyahan si Napoles ng hanggang 20 taon na pagkakakulong sa bawat bilang ng malversation at hanggang 15 taon sa bawat bilang ng graft. 

Si Pacturan naman ay hinatulan ng hanggang 19 taon, isang buwan at 11 araw sa bawat bilang ng malversation.

Ayon sa mga prosecutor, lumagda si Pacturan noong 2011 sa mga memorandum of agreement (MOA) sa pagitan ng 10 lokal na pamahalaan at 10 non-government organizations (NGOs) na umano’y konektado kay Napoles.

Nakasaad sa mga proyekto na tatanggap ang bawat LGU ng P5 milyon para sa farm inputs, ngunit lumabas sa paglilitis na hindi naipatupad ang mga proyekto.

Nagpatotoo rin ang walo sa 10 alkalde mula sa Bulacan, Batangas, Pangasinan, at Quezon na peke ang kanilang mga lagda sa mga liham na humihiling ng pondo.

Nilinaw ng prosekusyon na ang mga kasong ito ay hindi kaugnay ng Priority Development Assistance Fund (PDAF) kundi ng regular na pondo ng DAR.

Enrile, Napoles, at Reyes, absuwelto sa P172M pork barrel scam

ni Angela Fernando @News | Oct. 4, 2024

Pinawalang-sala ng Sandiganbayan Third Division nitong Biyernes sina dating Senate President at kasalukuyang Chief Presidential Legal Counsel Juan Ponce Enrile, kanyang dating chief of staff na si Atty. Jessica “Gigi” Reyes, at negosyanteng si Janet Lim Napoles sa P172-milyong kasong plunder na isinampa kadikit ng pork barrel scam.

Ayon sa korte, ang tatlo ay na-acquit dahil sa kabiguang mapatunayan ng prosecution ang kanilang pagkakasala nang walang kahina-hinalang batayan.

Nagpaabot ng pasasalamat si Enrile sa mga mahistrado sa isang interview habang nagpahayag ng kanyang kagalakan si Napoles sa isang hiwalay na panayam.

Gayunpaman, si Napoles ay mananatiling nakakulong dahil sa dalawa pang hatol ng plunder na may kaugnayan sa pork barrel scam. Samantala, tumanggi namang sumagot si Reyes sa paulit-ulit na mga tanong kung naniniwala siyang naihatid na ang hustisya.

Napoles at Cong. Olaño, guilty sa PDAF scam

ni Madel Moratillo | July 1, 2023

Napatunayang guilty ng Sandiganbayan sa kasong graft, malversation at direct bribery si dating Davao del Norte 1st District Rep. Arrel Olaño kaugnay ng Priority Development Assistance Fund (PDAF) scam.

Anim hanggang 10 taong pagkabilanggo ang ipinataw ng Sandiganbayan para sa bawat bilang ng kaso kay Olaño habang hanggang 16 taon naman sa kasong malversation at 4 hanggang 9 taon naman sa direct bribery.

Nahatulan ding guilty sina Janet Lim Napoles, dating Technology and Livelihood Resource Center manager Maria Rosalinda Lacsamana at iba pang indibidwal.

Mas binigyang bigat ng korte ang testimonya ng whistleblower na si Benhur Luy at iba pang documentary evidence kabilang ang daily disbursement reports, bank documents at report ng Anti-Money Laundering Council.

Sinasabing idinivert umano ni Olaño at mga kapwa akusado nito ang kanyang PDAF na nagkakahalaga ng P1.89 million, P4 million at P2.5 million sa non-existent projects noong 2007.

Sa pagdinig una nang sinabi ni Olaño na pineke ang kanyang pirma.