Pres. Putin, ipinaaaresto na ng ICC.. Ex-P-Du30, next

ni BRT | March 21, 2023

Naniniwala ang mga mambabatas na posible ring isyuhan ng warrant of arrest ng International Criminal Court (ICC) si dating Pangulong Rodrigo Duterte kaugnay ng madugong drug war sa ilalim ng kanyang administrasyon.

Una nang ipinaaaresto ng ICC si Russian President Vladimir Putin dahil sa war crimes sa Ukraine.

“Hindi miyembro ng ICC ang Russia pero nagawa ng ICC na maglabas ng desisyon laban sa war crimes in Russian President Vladimir Putin. Ibig sabihin, puwedeng-pwede talaga na imbestigahan din ng ICC ang mga krimen ni dating Pangulong Rodrigo Duterte kahit na inalis niya ang Pilipinas bilang miyembro ng ICC para makatakas sa pananagutan.

Kawawa naman ang mga biktima ng madugong giyera kontra droga at iba pang krimen sa ilalim ng administrasyong Rodrigo Duterte kung hindi siya maipapaharap sa anumang korte sa loob o labas ng bansa,” pahayag ni Kabataan Rep. Raoul Manuel.

Ito rin ang apela ng mga biktima at pamilya, ang imbestigahan at arestuhin si Duterte dahil sa hindi naman umano seryoso ang ginagawang imbestigasyon sa war on drugs sa bansa.

Pres. Putin, ipinaaaresto ng ICC

ni Jenny Rose Albason (OJT) | March 19, 2023

Naghain ng arrest warrant ang International Criminal Court (ICC) laban kay Russian President Vladimir Putin at kanyang Children Rights Commissioner na si Maria Lvova-Belova.

Kaugnay ito ng sapilitan nilang pagpapalikas mula Ukraine patungong Russia.

Ayon kay ICC President Piotr Hofmanski, responsable ang dalawa sa war crime, kung saan pinapalikas nito ang mga kabataan.

Iginiit ni Lvova-Belova na aampunin umano ang mga bata ng mag-asawang nasa Russia.

Samantala, responsable umano si Putin sa nasabing war crimes.

Ang nasabing anunsiyo na ito ng ICC ay ilang araw mula nang ilabas ang mga balita na plano ng korte na magbukas ng dalawang war crimes cases na may kaugnayan sa pag-atake ng Russia sa Ukraine.

ICC pansamantalang itinigil ang investigative activities hinggil sa Philippine war on drugs

ni Jasmin Joy Evangelista | November 20, 2021

Pansamantalang itinigil ng International Criminal Court (ICC) Office of the Prosecutor ang kanilang “investigative activities” sa alegasyong “crime against humanity” kaugnayan sa kontrobersiyal na war on drugs ng Duterte administration.

Ito ay upang magsagawa ng assessment sa scope at effect ng isinumiteng deferral request ng Pilipinas.

"The Prosecution has temporarily suspended its investigative activities while it assesses the scope and effect of the deferral request," ani ICC Prosecutor Karim Khan.

Sa sulat ni Philippine Ambassador to the Netherlands Eduardo Malaya kay Khan, sinabi nito na nadiskubreng mayroong administrative liability sa mga sangkot na police personnel sa 52 drug war cases.

Sinabi naman ni Khan na inaasahan na magbibigay ng karagdagang impormasyon ang ICC sa Pilipinas hinggil sa Rule 53 ng Rules of Procedure and Evidence na mahalaga upang mabalasa kung maghahain ba ng aplikasyon sa Pre-Trial Chamber sa ilalim ng Article 18(2) of the Statute para mabigyan ng authorization na ipagpatuloy ang kanilang imbestigasyon.

Sa kabila nito, ipagpapatuloy pa rin naman daw ng ICC ang pag-analisa sa mga hawak nilang impormasyon gayundin ang mga bagong datos na kanilang matatanggap mula sa third parties.

Matatandaang patuloy na iginigiit ng Malacanang na walang hurisdiksiyon ang ICC sa Pilipinas.