Matapos ang putukan... Bato, wala na sa Senado

ni Mylene Alfonso @News | May 15, 2026

Photo: Sen. Ronald Bato Dela Rosa / Atty. Israelito Torreon - Facebook

Kinumpirma ni Senate President Alan Peter Cayetano na wala na sa loob ng Senado si Senador Ronald “Bato” dela Rosa para umano sa kaligtasan ng lahat.

“Long story short, the sergeant-at-arms confirmed that he’s no longer in the building. I’m waiting for the complete incident report, on what time he left,” wika ni Cayetano sa press conference.

Ayon sa pangulo ng Senado, base sa impormasyon mula sa Senate secretariat, umalis si Dela Rosa sa Senado, alas-2:30 ng madaling-araw, matapos ang naganap na barilan.

Kaugnay nito, ibinunyag ni Cayetano na nakausap niya ang misis ni Dela Rosa na nagpasalamat sa kanya at sa iba pang senador para sa lahat ng suportang ibinigay nila kay Dela Rosa.

Binasa rin ni Cayetano ang text message ng asawa ni Dela Rosa, na umaasa umanong hindi sasayangin ng 13 miyembro ng majority bloc ng Senado ang “sakripisyo” ng senador.

“I’d also like to ask for forgiveness for all the confusion and havoc it has created in the Senate,” ayon sa mensahe.

“It is for this reason, I am sure that Ronald made his ‘escape.’ He told me, habang tumatagal kasi siya diyan sa loob ay mas nadadamay pa kayo. Alam naming hindi lulusubin ng NBI at CIDG and police o sino pang mga militar ang Senate kung wala siya sa loob. Kaya kahit na gaano siya ka-safe d’yan ay mas nangibabaw pa rin para sa kanya ang safety ng lahat,” saad pa niya.

Ayon sa misis ni Dela Rosa, napagkasunduan nila na mananatili ang senador sa Senado dahil mas ligtas siya roon, lalo na’t pinagkokomento ng Korte Suprema ang ilang opisyal ng Ehekutibo sa loob ng 72 oras kaugnay sa petisyon nitong harangin ang warrant of arrest laban sa kanya mula sa International Criminal Court (ICC).

“Nagulat at natakot na lang kami for his safety nu’ng narinig namin nasa labas na siya. Wala sa plano but knowing him, I am sure he took the opportunity nu’ng nagkaguluhan at nagkaputukan na,” ayon pa sa mensahe.

Nauna nang isinailalim si Dela Rosa sa Senate protective custody simula noong Lunes matapos subukan ng mga ahente ng National Bureau of Investigation na magsilbi ng warrant of arrest na may kinalaman sa ICC laban sa kanya.

Nahaharap si Dela Rosa sa warrant of arrest mula sa ICC kaugnay ng imbestigasyon nito sa war on drugs na inilunsad ni dating Pangulong Rodrigo Duterte, na kasalukuyang nakakulong sa international tribunal sa The Hague.

Naghain ng mosyon sa SC... Digong, ibalik ng 'Pinas — Kitty

ni BRT @News | May 13, 2026

Photo: KItty Duterte - Harry Roque FB

Muling naghain sa Korte Suprema ang kampo ni dating Pangulong Rodrigo Duterte ng urgent motion para hilinging iresolba ang kanilang habeas corpus petitions.

Hinihiling ni Veronica “Kitty” Duterte na gawin ang lahat ng hakbang ng gobyerno para maibalik agad sa Pilipinas ang kanyang ama.

Giit pa ng kampo ni Duterte, labag sa Konstitusyon ang pag-aresto, pag-surrender, at patuloy na pag-detain sa dating Pangulo sa International Criminal Court (ICC).

Binanggit din sa mosyon ang nangyaring girian sa Senado kaugnay ng tangkang pag-aresto kay Sen. Ronald “Bato” dela Rosa bilang patunay umano na kailangan na ng agarang aksyon mula sa Korte Suprema.

Dela Rosa kay PBBM: ‘Wag mo akong isuko sa ICC

ni Mylene Alfonso @News | May 13, 2026

Photo: Ronald Bato Dela Rosa - FB

Umapela si Senador Ronald “Bato” dela Rosa kay Pangulong Ferdinand “Bongbong” Marcos Jr. na huwag siyang isuko sa International Criminal Court (ICC) sa gitna ng pagpapalabas ng arrest warrant laban sa kanya dahil sa kontrobersyal na war on drugs.

Kasalukuyang nananatili sa Senado si Dela Rosa na nasa ilalim ng protective custody sa gitna ng warrant of arrest ng ICC kaugnay ng kasong crimes against humanity na kinasangkutan ni dating Pangulong Rodrigo Duterte.

“Mr. President, alam kong wala kang personal na galit sa’kin. Sana naman bilang ama ng ating bansa, alagaan mo ang iyong mga anak. Alagaan mo ang lahat ng mga Pilipino,” wika ni Dela Rosa sa mga mamamahayag.

“Huwag niya ako ipadala sa The Hague... Pareho tayong Pilipino, kung meron akong pananagutan, panagutan ko sa ating local court, huwag sa banyaga,” saad ng senador.

Noong Lunes, tinangka ng mga ahente ng National Bureau of Investigation (NBI) na arestuhin si Dela Rosa sa loob ng Senado.

Makikita sa kuha ng CCTV ang pagtakbo ng senador sa hagdan at corridors patungo sa Plenary Hall para iwasan ang mga humahabol sa kanya na nakasuot ng sibilyan.

Matatandang lumutang si Dela Rosa sa Senado sa unang pagkakataon mula noong Nobyembre 2025 upang dumalo sa plenary session.

Hindi siya dumalo sa anumang sesyon sa Senado sa gitna ng sinasabing naglabas ang ICC ng warrant of arrest laban sa kanya.