BF ng anak, nakakasama na… MONCHING, BOTO KAY ECHO PARA KAY JANINE

ni Melba R. Llanera @Insider | January 13, 2026

Photo: File / Janine at Echo IG

Sa premiere night ng pelikulang Breaking The Silence (BTS), nakapanayam si Ramon Christopher Gutierrez kung saan kinuha ang kanyang reaksiyon sa relasyon ng anak na si Janine Gutierrez kay Jericho Rosales. 

Ayon sa aktor, masaya siya kung saan masaya ang kanyang anak. Nakikita rin niyang masaya sina Janine at Echo at wala sa kanya ang pagpili kung sino ang mas okay para sa kanyang mga anak. 

Papuri pa ni Ramon Christopher, mabait si Echo at wala siyang masasabing hindi maganda sa Kapamilya actor sa mga pagkakataong nakasama niya ito.

Isa si Ramon sa cast ng BTS na tumatalakay sa bullying at mental health problems na kinahaharap ng mga nagiging biktima nito. 

Ayon sa aktor, ibang-iba na ang bullying ngayon kumpara noon dahil mas matindi na ang epekto nito at lubhang naaapektuhan ang mentalidad ng mga biktima. 

Iikot din umano ang istorya sa stress at anxiety ng mga kabataang nakararanas nito at kung paano nila haharapin at lalabanan ang ganitong sistema.

Ang BTS ay isinulat at idinirek ni Direk Errol Ropero at produced nina Ms. Ann Michelle Weber at Mr. Lawrence Weber ng Gummy Production.

Kasama sa cast sina Potchi Angeles, Bugoy Cariño, Shira Tweg, at ipinapakilala sina Gray Weber at Francis Saagundo. Mapapanood din dito sina Pinky Amador, Jeffrey Santos, Rob Sy, Pekto Nacua, Mark Herras, Gene Padilla, atbp..

Mapapanood ito sa mga sinehan sa darating na mga araw.

---

NAKAPANAYAM namin si Rica Peralejo kung saan inamin ng aktres na malaking tulong ang mga pinagdaanan niyang intriga at kontrobersiya sa showbiz kung kaya’t hindi siya gaanong naapektuhan ng isyung ipinukol kamakailan ng isang netizen sa kanila ng asawang si Joseph Bonifacio, kaugnay ng paratang na nagnakaw umano sila ng ‘ikapu’ o tithes mula sa kanilang dating kongregasyon.

Kinlaro rin ni Rica na walang katotohanan ang naturang paratang. 

Ayon sa aktres, may sarili siyang ipon mula sa kanyang kinita sa pag-aartista at may tatlong trabaho na pinanggagalingan ng kanilang pang-araw-araw na pangangailangan ng pamilya. 

Namuhay din sila nang simple at ibinahagi ni Rica na sa loob ng mahabang panahon ay masaya na sila kahit Tamaraw FX lamang ang sasakyang ginagamit ng kanyang asawa.

Sa tanong kung paano nila pinananatili ang financial transparency at accountability sa bagong tayong kongregasyon na No Other Name, ipinaliwanag ng aktres na may ginagawang financial report ang kanyang asawa at ang team nito. 

Ayon pa kay Rica, kahit noon ay mayroon na silang financial report, ngunit mas detalyado lamang ito ngayon. 

Dagdag pa niya, hindi rin sila nanghihingi ng ikapu sa kanilang church services dahil hindi naman money-making ang layunin ng NON. Maaari umanong magbigay ang sinumang nais magbigay at kung wala o ayaw magbigay ay hindi ito isyu.

Huling napanood si Rica sa Metro Manila Film Festival (MMFF) entry na Manila’s Finest (MF) kung saan gumanap siya bilang asawa ni Piolo Pascual. 

May ilang nagsabi na masyadong maigsi ang kanyang role para sa isang comeback movie, ngunit ipinaliwanag ng aktres na choice niya ito at ayaw niyang ang kanyang pagbabalik ay puro exposure lamang. 

Aniya, mas mahalaga na sa kanya ngayon ang kabuuan ng isang proyekto kaysa sa dami ng kanyang eksena.

Tinawag na fake news… KA TUNYING, MAS DUMAMI ANG KOSTUMER NANG BANATAN NI PINKY

ni Melba R. Llanera @Insider | December 16, 2025

Photo: File / FB Anthony Taberna

Para sa batikang broadcast journalist na si Anthony Taberna o mas kilala bilang Ka Tunying, maaaring balewalain nila ng asawang si Rossel Taberna ang anumang below-the-belt na pamba-bash sa kanila ng ilang netizens, ngunit ang pinakanaapektuhan sila ay nang idamay ang anak nilang si Zoey at hilingin pang bumalik ang sakit nitong leukemia.

Ito ay may kaugnayan sa nabanggit ni Ka Tunying na diumano’y may insertions sa 2025 national budget ang isang senadora, na pinalagan ng mga tagasuporta nito, kabilang ang aktres na si Pinky Amador. 

Naging viral ang video ng pagpunta ng aktres sa isang branch ng Ka Tunying’s at sinabing bibili siya ng fake news, kung saan pinararatangan nilang fake news peddler ang broadcast journalist. 

Sa panayam namin kina Anthony at sa asawang si Roselle, nabanggit ng huli na nais niyang magpasalamat sa ginawa ni Pinky dahil lalo pang dinayo ang mga Ka Tunying’s branches at tumaas ang kanilang benta.

Samantala, muling nasilayan ng entertainment press si Zoey na cancer-free at ipinakilala na rin sa nagdaang thanksgiving party ng Taberna Group of Companies bilang future ng kumpanya. Dito ay makikitang malusog siya at walang bakas na dumaan sa matinding sakit. 

Magde-debut na si Zoey sa susunod na taon at nagbigay din siya ng speech sa naturang event kung saan sinabi niyang magiging bahagi na sila ng kapatid na si Helga sa pagpapaunlad pa ng kanilang kumpanya. 

Hiling niya na manatiling bahagi ang mga taong kasama nila sa patuloy na pag-usad ng Taberna Group of Companies na kinabibilangan ng Ka Tunying’s Restaurant, Kumbachero Food Corp., Taste of the Town Catering at Outbox Media Powerhouse Corp..

Labis ang pasasalamat ng pamilya Taberna sa tuluyang paggaling ni Zoey, sa matatag na samahan ng kanilang pamilya, sa magandang takbo ng kanilang kumpanya, at sa patuloy na biyaya sa career ni Anthony bilang isa sa mga hosts ng Dos Por Dos kasama si Gerry Baja sa DZRH.

---

SA eksklusibong panayam namin kay Emilio Daez sa mediacon ng Bar Boys 2: After School (BB2AS) na isa sa official entries sa Metro Manila Film Festival (MMFF) 2025, tinanong namin kung may kompetisyon ba sa pagitan nila ng mga Pinoy Big Brother (PBB) housemates sa PBB Celebrity Collab Edition (PBBCCE). 

Ayon sa Kapamilya actor, hindi ito maiiwasan sa industriya, ngunit sa bandang huli ay pamilya pa rin sila at iyon ang kanyang pinanghahawakan. 

Para kay Emilio, kapatid ang turing niya sa mga dating housemates at masaya siya sa magandang takbo ng kanilang mga career.

Nilinaw din ni Emilio na wala silang sibling rivalry ng nakatatandang kapatid na si Mikael Daez. Aniya, numero unong supporter niya ang kanyang kuya at laging buo ang suportang ibinibigay nito sa kanya.

Masaya si Emilio na isa siya sa cast ng BB2AS. Bagama’t hindi sila nabigyan ng pagkakataong magkasama sa mga eksena nina Carlo Aquino at Ms. Odette Khan, labis pa rin ang kanyang paghanga at respeto sa dalawang artista dahil sa kanilang husay at passion sa trabaho.

Ang pelikula ay tinatampukan nina Carlo Aquino, Rocco Nacino, Kean Cipriano, Enzo Pineda, Glaiza de Castro, Sassa Gurl, Will Ashley, Emilio Daez, Therese Malvar at Ms. Odette Khan, sa ilalim ng produksiyon ng 901 Studios at sa direksiyon ni Direk Kip Oebanda.

---

NAGPAPASALAMAT din kami kay Honorable Vice-Mayor Marcos Mamay sa thanksgiving party na ibinigay niya para sa kanyang mga nakatrabaho at sa entertainment press noong Disyembre 4. Ito ay pasasalamat sa mga achievements at magagandang nangyari sa kanyang biographical film na Mamay: A Journey to Greatness – The Marcos Mamay Story (MAJTG), na nag-uwi ng 7 awards mula sa Filipino Academy of Movie Arts and Sciences (FAMAS). 

Nanalo rin bilang Indie Theme Song of the Year ang kantang Hamon, na theme song ng pelikula.

Dinaluhan ang naturang okasyon ng mga malalapit na kaibigan at katrabaho sa industriya tulad nina Ynez Veneracion, Lance Raymundo, Gerald Santos na siyang kumanta ng Hamon, Alma Concepcion, Atty. Vince Tañada, at iba pa. 

Bongga rin ang pamimigay ng mga papremyo kung saan lahat ay nanalo at walang umuwing luhaan. 

Sa nasabing event ay inilunsad din ang kanyang librong pinamagatang The Pugilist, isang inspirational book kung paano niya nalagpasan ang mga pagsubok at hamon sa ating lipunan.

13-anyos pa lang, assistant na… SACHZNA, NINAKAWAN NG P2 MILYON NG ITINURING NA INA

ni Melba R. Llanera @Insider | November 29, 2025

Photo: File / Sachzna Laparan - IG

Para kay Sachzna Laparan, hindi ang dalawang milyong piso na ninakaw diumano sa kanya ng assistant na kamag-anak niya ang ikinakasakit ng kanyang loob, kundi ang pagkasira ng tiwala niya lalo’t kadugo niya ito at itinuring talagang kapamilya. 

Ayon sa content creator-actress, itinuring niya na itong para niyang pangalawang ina. Ito ang gumagabay sa kanya at lahat ng pera niya ay ipinagkakatiwala niya rito. 

Thirteen years old pa lang si Sachzna ay kasa-kasama na niya ito, kaya’t naging malaking parte ito ng buhay niya. 

Kasama niya ito sa mga biyahe niya sa ibang bansa, at pati ang anak nito. Binilhan din pala niya ng sariling sasakyan ang kanyang assistant.

Tinanong din namin ang content creator kung paano niya nalaman na ninanakawan na siya nito. Pagkukuwento niya sa amin ay napansin niya ang madalas na pagbili nito ng mga branded na gamit. 

Umamin naman sa kanya ang assistant na naging gahaman siya kaya niya ito nagawa at nadiskubre lang ito ni Sachzna ngayong Oktubre gayung Hunyo pa lang ng 2025 ay ninanakawan na siya nito. 

Pagbabalik-tanaw din niya, noong nakaraang taon pa lang ay nahuli na niyang ninakawan siya nito ng P100,000, pero pinatawad niya ito at binigyan ng pangalawang tsansa dahil inakala niyang magbabago. 

May nakausap na rin siyang abogado para sa kasong puwede niyang isampa laban sa assistant, pero kung hihingi lang ng tawad at ibabalik nito ang mga ninakaw sa kanya ay hindi na siya magdedemanda, lalo’t alam niya na mahaba at mahirap na laban ang demanda.

Samantala, nang kumustahin namin ang relasyon niya sa non-showbiz boyfriend na si Mark Pascual, masaya at kuntento ito sa dalawang taong relasyon nila, pero sinabihan na niya pala ang boyfriend na hindi pa siya handang magpakasal ngayong taon at sa susunod na taon dahil gusto niya munang magpokus sa kanyang sarili, sa kanyang mga trabaho at endorsements.

Nakapanayam namin si Sachzna sa nakaraang Big Creator Expo 2025 Powered by M-Commerce and TikTok Shop. Para sa kanya ay malaking tulong ang pagdalo niya sa ganitong mga events na binuo para sa mga kilalang content creators ng bansa. 

Marami siyang natutunan dito tungkol sa e-commerce at pagbebenta lalo’t may business siya na sarili niyang mga brand at produkto.

---

MASASABI namin na nakaka-amazed at nagustuhan namin ang trailer ng Shake, Rattle & Roll: Evil Origins (EO), isang horror trilogy na handog ng Regal Entertainment. 

Ang unang istorya na iikot sa taong 1775 at idinirek ni Shugo Praico ay pagbibidahan nina Carla Abellana, Loisa Andalio, Janice de Belen, Arlene Muhlach, Ysabel Ortega at Ara Mina. 

Ang ikalawa naman ay umikot sa taong kasalukuyan o 2025 kung saan ang mga bida ay ang tambalang Francine Diaz at Seth Fedelin o FranSeth, Fyang Smith, JM Ibarra, Sassa Gurl, Karina Bautista, Alex Calleja at Kaila Estrada, sa ilalim ng direksiyon ni Joey de Guzman. 

Ang 2050 naman ay pagbibidahan nina Richard Gutierrez, Ivana Alawi, Manilyn Reynes, Matt Lozano, Sarah Edwards at Dustin Yu na idinirek ni Ian Lorenos.

Maganda ang mga special effects, nakakatakot ang tunog at musika bukod sa mahuhusay ang mga artistang kasama. 

Marami ang nagsasabi na malaki ang posibilidad na mapabilang sa tatlong mangungunang pelikula sa 2025 Metro Manila Film Festival (MMFF) ang SRR:EO lalo’t mahilig sa horror movies ang mga Pilipino at nasa puso natin ang mga pelikula na kasama sa SRR.