Feeding program, tuloy pa rin kahit pandemya

ni Grace Poe - @Poesible | January 11, 2021

Isa sa mga tinutukan nating maisama sa General Appropriations Act of 2021 na siyang batas na naglalaan ng budget ng pamahalaan para sa taong ito ang pondo para sa feeding program para sa mga batang undernourished. Humigit-kumulang P6-B ang inilaan natin para sa School-Based Feeding Program (SBFP) para mabigyan ang undernourished children mula kindergarten hanggang Grade 6 ng kahit isang fortified meal kada araw sa hindi bababa sa 120 araw sa isang taon. Bahagi ang SBFP ng Masustansyang Pagkain para sa Batang Pilipino Act na ating inakda.

Sa pagpapatupad ng Department of Education sa tulong ng mga local na pamahalaan, ang food packs ay inihahatid na sa bahay ng mga bata o inilalagak sa itinakdang lugar kung saan ito kukunin ng magulang o ng tagapangalaga ng mga bata. Kaya kahit walang pasok sa paaralan, tuloy pa rin ang nutrisyon ng mga batang undernourished na kailangan nating tutukan at pangalagaan.

Tiniyak nating mapopondohan ang pagpapatupad ng nasabing batas dahil naniniwala tayong higit kailanman, ngayon pinakakailangan ang feeding program. Maraming pamilya ang apektado ng pandemya, lalo pa ang mga nawalan ng trabaho o pagkakakitaan. Nutrisyon ang nakokompromiso kapag walang pera ang pamilya kaya malaking tulong ang food packs na matatanggap ng mga kuwalipikadong mag-aaral.

Samantala, pinaglaanan din natin ng mahigit tatlong bilyong piso ang Supplementary Feeding Program na ipinatutupad naman ng Department of Social Welfare and Development. Target naman nito ang mga batang dalawa hanggang limang taon para mabigyan ng isang fortified meal kada araw sa loob ng hindi bababa sa 120 araw.

Habang lahat tayo ay naghihintay ng bakuna, huwag nating kalimutang hindi lamang coronavirus ang karamdamang dapat pag-ingatan. Kailangan nating pangalagaan ang kalusugan ng mamamayan, lalung-lalo na ng mga bata. Ang feeding programs ang ating kontribusyon para lumaki silang malusog, masaya, at may laban sa kinabukasan.

Higit na pag-iingat sa bagong normal

ni Grace Poe - @Poesible | January 4, 2021

Hello, mga bes! Kumusta ang inyong Pasko at Bagong Taon? Sana’y naging masaya ang inyong pagdiriwang sa kabila ng lahat ng pagsubok na kinakaharap ng inyong pamilya.

Ang buong mundo ay alerto dahil sa panibagong variant ng COVID-19 na unang natuklasan sa United Kingdom dahil sinasabing mas mabilis itong kumalat. Nagsagawa na ang maraming bansa, kabilang ang Pilipinas, ng imposisyon ng travel ban sa mga maglalakbay mula sa UK. Bukod dito, nagtakda rin ng paghihigpit sa mandatory 14-day quarantine sa mga pasahero mula sa piling bansang nakapagtala ng kaso ng bagong strain ng nasabing virus. Kahit pa negatibo sa swab test, kailangan pa ring tapusin ang quarantine sa pasilidad na aprubado ng pamahalaan biglang dagdag na pag-iingat.

Samantala, nag-aabang ang lahat sa parating na bakuna laban sa COVID-19. Habang nakikita natin sa balita na nagsisimula na ang mauunlad na bansa tulad ng UK, Estados Unidos, at Canada sa pagbabakuna ng kanilang mamamayan, naghihintay pa rin tayo rito ng depinitibong sagot mula sa ating pamahalaan tungkol sa pagbabakuna. Mainit sa balita ang isyu ng pagbabakuna sa mga sundalong miyembro ng Presidential Security Group at ng ilang opisyal kahit pa hindi pa aprubado ng ating Food and Drugs Administration ang bakuna. Samantala, naghihintay ang taumbayan kung anong bakuna ang bibilhin ng pamahalaan at kung paano at kailan ito makararating sa kanila.

Malaking hamon ang 2021 sa atin dahil kailangan natin itong harapin na may pagtanggap na ito ang ating bagong normal lalo pa’t walang indikasyon na maisasagawa na ang pagbabakuna laban sa COVID-19 ngayong taon. Kailangan nating pag-ibayuhin ang ating pag-iingat: pagpapanatili ng social distancing, pagiging metikuloso sa kalinisan lalo na sa paghuhugas ng kamay, pagsusuot ng face masks at face shields kapag lumalabas, at pagpapanitiling matibay sa ating immune system para labanan ang pagdapo ng karamdaman. Tuloy pa rin ang buhay kahit may COVID-19. Tuloy pa rin ang pagkalam ng sikmura kaya kailangang magtrabaho para mabuhay sa kabila ng panganib.

Binabalaan ang publiko na mag-ingat sa mga naglalako ng smuggled na COVID-19 vaccines. Hindi tiyak ang kaligtasan nito. Baka sa halip na makabuti ito, magdulot pa ito ng kapahamakan. Ni walang garantiya na bakuna nga sa nasabing virus ang mga ito. Ilegal ang mga ito hindi lamang dahil hindi pa aprubado ng gobyerno kundi dahil walang nakaaalam ng kaligtasan nito. Huwag patulan ang ilegal na aktibidad ng mga taong nagsasamantala sa takot ng mga tao ngayong pandemya.

Ibayo at maagap na pag-iingat, dapat ipatupad!

ni Grace Poe - @Poesible | December 28, 2020

Hello, mga bes! Kumusta ang naging pagdiriwang ninyo ng Pasko?

Ibang-iba ang selebrasyon natin ngayong taon dahil sa pandemyang dala ng COVID-19. Dahil sa panganib ng transmisyon ng nasabing virus, wala ang malalaking Christmas party at reunion.

Gayunman, sana’y naging masaya ang inyong simpleng pagdiriwang ng Pasko sa inyong mga tahanan kasama ang inyong pamilya o mahal sa buhay.

Noong unang nabalita ang coronavirus, marami ang nag-isip na tatagal lamang ito ng ilang buwan. Ngayon, patapos na ang taon pero wala pa tayong natatanaw na tiyak na katapusan nito. Bagama't positibo ang balita na mayroon nang bakuna para rito, wala pa ito sa ating bansa. Kung magkaroon man, hindi natin alam kung kailan ba talaga ito makakarating sa atin at maibibigay sa ating mga kababayan.

Dagdag na alalahanin pa ang kumpirmasyon ng United Kingdom ng panibagong strain ng virus na sinasabing 70% na mas mabilis kumalat kaysa sa una. Noon pa man, nagbabala na ang mga eksperto na posibleng magkaroon ng mutasyon ang virus, at nangyari na nga.

Kasama tayo sa mga nananawagan sa ating pamahalaan na bigyang-konsiderasyon na ang istriktong border control. Sa ganitong pagkakataon, hindi puwede ang patumpik-tumpik na aksiyon. Kung hindi natin ito gagawin, matutulog na naman tayo sa pansitan tulog ng nangyari noong unang bugso ng impeksiyon. Kailangan natin ng maagap na aksiyon.

Mga bes, kailangan ang kooperasyon ng lahat para sa kaligtasan natin. Maging maingat tayo sa lahat ng pagkakataon. Mapapakamot ka na lang ng ulo kapag nakita mo ang makapal na tao sa pamilihan dahil may sale. Huwag makipagsiksikan para makabili ng murang damit o pantalon. Sampung beses o higit pa ng natipid ninyo ang gagastusin sa pagpapagamot kapag dinapuan kayo ng coronavirus! Maraming pagkakataon para mamili at maglibang, huwag muna ngayon. Gawin nating prayoridad ang manatiling ligtas at buhay sa panahong ito.

Sa pagsalubong natin ng bagong taon ilang araw mula ngayon, sana’y maging mas maamo ang kapalaran at panahon sa ating lahat ngayong darating na 2021. Dalangin ko at ng aming pamilya na makahanap pa rin ng ipagpapasalamat ang bawat isa, sapat para masabi nating masarap pa ring mabuhay sa kabila ng lahat.

Manigong Bagong Taon sa inyong lahat!