Grassroots sa fencing, susuyurin hanggang vismin

ni Gerard Peter - @Sports | May 05, 2021

Tiwala si Philippine national fencing head coach Roland Canlas na makakamit ng bansa ang inaasam na mataas na karangalan at magandang estado sa pandaigdigang kumpetisyon, higit na sa prestihiyosong Summer Olympic Games sa mga darating na panahon sakaling maging matagumpay ang pagpapatuloy ng magandang grassroots program ng kanilang national sports association (NSA).

Aminado ang dating national team member at Southeast Asian Games gold medalist na si Canlas na kailangan pa nilang makahanap at makapag-develop ng mga tulad ni Penn State University MVP at dating Juniors fencing champion Samantha Catantan na maaaring sumunod sa mga yapak nito at magpatuloy sa magandang programa ng Philippine Fencing Association (PFA) upang matupad ang pangarap na makarating ang isang national fencer sa Olympiad at kinalauna’y magwagi ng medalya rito.

“Ang nakita ko talaga na natutunan ko dun (Olympic Qualifying) is mas malaki ang chance natin na makapasok sa Olympics. Kaya nga ito sabi ko sa coaches na maghanap tayo ng kasing tapang ni Sam sa epee, sabre, mag-vision na tayo from now to Paris [Olympics], sundan natin yung iba,” pahayag ni Canlas, Martes ng umaga sa weekly PSA Forum webcast. “Sa Ormoc ang daming potential na bata. What if meron pala sa Mindanao, Visayas na magiging Olympians o Olympic champions.”

Nakikinita ni Canlas na darating ang panahon na mararating rin nilang makapagpadala ng atleta sa Olympiad, higit na ang sinisipat na 2024 Paris Olympics, kung saan malaki ang tsansa na mairepresenta ng mga Filipino, higit na si Catantan, na kinapos lamang ng bahagya sa Asia-Oceania Olympic Qualifying Tournament nitong nagdaang Abril sa Tashkent, Uzbekistan ng makuha ang bronze medal, na matupad ang matagal ng pinapangarap ng bansa, sa tulong ni PFA head Dr. Richard Gomez at ng yumaong si dating Philippine Olympic Committee (POC) president at pinuno ng Fencing Confederation of Asia Celso Dayrit.

Heroes, nanatiling matibay sa 2nd win ng Cebu Super Cup

ni Gerard Peter - @Sports | April 14, 2021

Nanatiling walang talo ang ARQ Builders Lapu-Lapu City Heroes ng kunin nito ang ikalawang sunod na panalo laban sa win-less na Dumaguete Warriors, 67-57, Martes ng hapon sa pagpapatuloy ng elimination round ng Visayas leg ng 2021 Chooks-to-Go Pilipinas VisMin Super Cup sa Alcantara Sports and Civic Center sa Cebu.

Pina-apoy ng 36-anyos na dating PBA at MPBL guard Reed Juntilla ang opensa ng Heroes sa third quarter ng ibuslo nito ang lahat ng 12 puntos sa third quarter upang tulungan ang koponan na dumistansya sa madikit na Warriors na nakuha ang pangalawang sunod na pagkatalo upang manatiling wala pang panalo sa kauna-unahang professional league sa katimugan.

Nag-ambag din ng 4 rebounds at 3 assists ang Carmen, Cebu-native na si Juntilla na huling beses naglaro sa Bataan Risers. Sumuporta sa pagbigay ng puntos si Ferdinand Lusdoc na may 14 points at tig-isang assist at steal, samantalang nasayang ang mainit na mga kamay ni John Monteclaro na bumitaw ng 6-out-of-11 sa three point line para pangunahan ang Warriors sa 20 points at 4 rebounds.

Naging mababa lamang ang scoring output ng dalawang koponan sa unang dalawang quarter, kung saan kumamada lang ng 8 at 6 na puntos sa second quarter ang dalawang koponan para magtapos sa 25-23 sa Halftime.

Sa third quarter nagsimulang mag-init si Juntilla katulong sina Lusdoc, Vincent Minguito, Dawn Ochea at Hofer Mondragon para ibigay ang malaking kalamangan sa Heroes sa 4th quarter sa 16 sa 61-45, sa fourth quarter.

Sunod na makakalaban ng Heroes para sa target na 3rd straight win ang Siquijor Mystics, ngayong araw sa unang laro sa 2:00 pm, habang pupuntiryahing makasikwat ng unang panalo ng Warriors laban sa powerhouse na MJAS Zenith Talisay City Aquastars sa main event sa 8:00pm.

50th Gold, naibulsa ni E-Karateka De Los Santos

ni Gerard Peter - @Sports | April 13, 2021

Nakamit ni dating two-time Southeast Asian Games medalist Orencio James “OJ” De Los Santos ang kanyang ika-50th gold medals sa virtual kata-competitions nang sipain ang kampeonato sa Katana Intercontinental League #3 ngayong Abril.

Ito na rin ang ika-14 na gintong medalya ng 31-anyos na dating national team member ngayong taon sa Individual Kata-Male Seniors event kung saan tinalo niya sa elimination round sina Remi Bonneau ng France (22.0), Cornelius Johnsen ng Norway (23.82) at Alfredo Bustamante ng U.S. (24.12) para sa leading score na may 25.0 points.

Sa final round ay tinalo ng International Shotokan Karate Federation karateka na si De Los Santos ang mahigpit na karibal na si Domont Matias Moreno ng Karate-Do Biel-Bienne ng Switzerland sa 27.4-26.38.

“I’m happy with not only the fact that I won my 14th Gold, but if I add the 36 from last year, this is already my 50th gold medal overall,” pahayag ni De Los Santos sa panayam ng Bulgar Sports sa online messaging. “This motivates me to join more tournaments and win as many gold medals as I can for this year. I also want to continue to keep the sport of karate alive, despite the trying times everyone is going through.”

Nasundan ito ng mga nagdaang panalo ng 8-time national games champion kasunod ng 2021 2ng leg ng Athlete’s E-Tournament, 2021 Kamikaze Karate E-Tournament, 2nd leg ng Budva Winner-Adria Cup, 2nd Leg ng E-Karate World Series, #2 Katana Intercontinental league Paris, 2nd leg ng Sportsdata e-tournament World series, Adidas US Karate Open E-Tournament noong isang buwan, habang nanalo rin ito ng gintong medalya sa Athlete’s E-Tournament Series #1, at Budva Winner-Aria Cup #1 eTournament, habang nakuha nito ang ang pinakamataas na puntos sa online-virtual competition sa 1st leg ng Katana International League.

Nakapagwagi na rin ng ginto ngayong taon ang multi-titlist na De La Salle University graduate sa E-Karate World Series 2021, 1st Inner Strength Martial Arts International eTournament at 2021 Sportsdata eTournament World Series #1 online competition.Noong isang taon ay kumana ito ng kabuuang 36 gold medals at makuha ang World No.1 sa e-kata male individual category.