Lady Chiefs at Cardinals, sakalam vs. LPU at JRU

ni Gerard Arce @Sports | March 2, 2023

Mga laro bukas (Biyernes):

(San Andres Sports Complex)

9:00 n.u. – Letran Knights vs San Sebastian Stags (men’s)

12:00 n.t. – Letran Lady Knights vs San Sebastian Lady Stags (women’s)

Hindi pinaporma ng dating 3-time champions Arellano University Lady Chiefs sa pangunguna ng kanilang kapitanang si Trina Marice Abay ang Lyceum of the Philippines University Lady Pirates sa bisa ng straight set 26-24-, 25-16, 25-16, habang nakuha ng Mapua University Lady Cardinals ang ikatlong sunod na panalo kontra sa kulelat na Jose Rizal University Lady Bombers sa 25-23, 27-25, 21-25, 25-23, Miyerkules ng hapon sa 98th National Collegiate Athletic Association (NCAA) women’s volleyball tournament sa San Andres Sports Complex sa Malate, Manila.

Nagawang makabawi ng Arellano sa huling pagkatalo upang makuha ang three-way tie kasama ang huling koponang tumalo sa kanila na University of Perpetual Help System Dalta Lady Altas at pinataob na Lady Pirates sa 3-1 kartada.

Naging maangas ang senior player na si Abay sa inirehistrong 11 puntos mula sa 5 atake at anim na blocks para segundahan ang pangunguna sa puntos ni Marianne Padillon sa 12pt mula sa walong atake at apat na blocks, gayundin si Laika Tudlasan na ibinuhos ang 10 sa 11 puntos mula sa atake at Janice Manuntag sa lahat ng puntos sa siyam na atake, kasama ang 10 digs at walong excellent receptions.

Pilit iniangat ni Joan Doguna ang Lady Pirates sa 13 puntos, habang may tig-7 puntos sina Janeth Tulang at Johna Dolorito at Jewel Maligmat na may 6 na puntos.

Cool Smashers, pakay ang tuktok ng standings sa PVL

ni Gerard Arce @Sports | February 28, 2023

Mga laro ngayon (Philsports Arena)

4:00 n.h. – Creamline Cool Smashers vs Army Black Mamba

6:30 n.g. – Akari Chargers vs PLDT High Speed Hitters

Planong sungkitin ng Creamline Cool Smashers ang solong liderato sa pakikipagtuos sa kulelat na Army Black Mamba Lady Troopers sa pambungad na salpukan, habang ipagpapatuloy ng PLDT High Speed Hitters ang mainit na laro kontra sa naghahanap rin ng winning streak na Akari Chargers sa main game ngayong Martes sa 2023 Premier Volleyball League (PVL) All-Filipino Conference sa Philsports Arena sa Pasig City.

Rumehistro ang 2019 Open Conference MVP na si Jessica Margaret “Jema” Galanza na bumuhos ng triple-double sa huling laro sa impresibong start line sa 25 puntos mula sa 22 atake, dalawang aces at isang block kasama ang 13 digs at 12 receptions para pagbidahan ang pananagasa sa Chery Tiggo Crossovers mula sa four-setter na laro, na paniguradong sasandalang muli ng Cool Smashers.

Inaasahang babanat muli ang 26-anyos na outside hitter na kinakailangang punan ang patuloy na kawalan ni team captain Alyssa Valdez na nagpapagaling pa sa knee injury, habang binabantayan pa ang sitwasyon ni Tots Carlos, na hinay-hinay rin sa paglalaro dulot ng hamstring injury.

Gayunpaman, malalim pa rin ang paghuhugutan ng mga manlalaro para sa back-to-back conference champions mula kina opposite hitter Michelle Gumabao, at middle blockers Celine Domingo at Jeanette Panaga, habang patuloy ang mahusay na pamamahagi ng opensiba ng koponan mula kay ace playmaker Julia Morado-De Guzman na nagbigay ng 34 excellent sets sa nagdaang laro at depensang hatid sa floor ni Kyla Atienza.

Lady Tams, nakaunang panalo kontra Maroons

ni Gerard Arce @Sports | February 27, 2023

Tila parang nagawang magkampeon ng Far Eastern University Lady Tamaraws sa kaligayahang nadarama ng maibigay ng grupo ni playmaker Christine Ubaldo ang unang panalo para kay coach Tina Salak para sahurin ang University of the Philippines (UP) Lady Maroons sa bisa ng four-set takedown 25-16, 23-25, 25-17, 26-24, sa unang laro ng women’s volleyball tournament sa ikalawang araw ng opening weekend ng 85th University Athletic Association of the Philippines (UAAP) sa SM Mall of Asia Arena sa Pasay City.

Namahagi ng mahusay na 16 na excellent sets ang sophomore setter na nag-ambag din ng tatlong atake at dalawang blocks upang makuha ang pambuwenamanong panalo ng koponan na umaasang mahihigitan ang masaklap na 1-13 rekord noong nagdaang 84th season noong isang taon.

“Sobrang saya namin sa dugout, tapos sinasabi namin na mananalo kami, kaya sobrang happy kasi nagawa namin,” pahayag ng 5-foot-6 setter. “Sobrang happy sa akin kase ‘di lang isang tao gumawa para sa amin, kaya sabi namin kanina para makakanta tayo ng sabay-sabay ng school hymn pagtrabahuhan natin.”

Nagbida sa hampasan para sa Morayta-based lady squad si Jovelyn Fernandez na kumana ng game-high 18 puntos mula sa 17 atake na sinegundahan ng kontribusyon ni Chennie Tagaod sa 13pts, galing lahat sa atake at Alyzza Devosora na may 12pts, kasama ang 12 digs at apat receptions.

Apat na manlalaro naman ang tumapos ng doble-pigura para sa Lady Maroons na nabigong ibigay ang unang panalo sa nagbabalik collegiate league na si coach Shaq Delos Santos, matapos pangunahan ni Alyssa Bertolano na tumapos ng triple-double sa 14 puntos mula sa 11 atake, kabilang ang 14 digs at 11 receptions, habang nag-ambag rin ng double-double si Jewel Encarnacion sa 12pts (10 atake) at 12 receptions.