Astrolabio, babanat sa unang world title fight

ni Gerard Arce @Sports | March 24, 2023

Sasabak sa kanyang unang world title bout si rising Filipino boxer Vincent “Asero” Astrolabio kontra kay dating world title challenger Jason “Mayhem” Moloney ng Australia para sa bakanteng World Boxing Organization (WBO) bantamweight title sa Mayo 13 sa hindi pa matukoy na lugar.

Nakatuntong bilang number one challenger ang 25-anyos na tubong General Santos City sa IBF 118 lb belt na isa sa mga binakanteng titulo ni dating undisputed 118-lb titlist Naoya “Monster” Inoue matapos umakyat sa mas mabigat na super-bantamweight category.

Subalit napagdesisyunan ng kampo ni Astrolabio (18-3, 13KOs) na piliing harapin si Moloney, imbes na sa makakatapat nito sa IBF title na si dating world champion Emmanuel “Manny” Rodriguez ng Puerto Rico.

Tatayong co-feature ang harapan nina Astrolabio at Moloney sa WBO middleweight title fight nina title holder at dating World at Asian Championship winner Janibek “Qazaq Style” Alimkhanuly ng Kazakhstan at Steven “Bang-Bang” Butler ng Canada.

Matatandaang matagumpay na nakuha ng 5-foot-5 orthodox boxer ang karapatan na maging No.1 contender sa IBF matapos patumbahin si Russian brawler Nikolai Potapov sa kanilang title eliminator nung Disyembre 17 sa Las Vegas, Nevada sa bisa ng sixth round knockout, kabilang ang WBO Inter-Continental 118-lb title.

Nakapwesto rin bilang No.2 ranked si Astrolabio sa WBO na pinangungunahan ng two-time World challenger na si Moloney bilang No.1 contender, habang No.5 din ang Pinoy boxer sa WBC title na paglalabanan naman nina Nonito “The Filipino Flash” Donaire at Alejandro Santiago ng Mexico.

Kabilang ang panalo kontra Potapov sa anim na sunod na panalo ni Astrolabio na dinaig si dating two-time Olympic gold medalist at two-division champion Guillermo “Jackal” Rigondeaux.

Canino, Dela cruz at Gagate, nagmalupit sa Lady Bulldogs

ni Gerard Arce @Sports | March 24, 2023

Mga laro sa Sabado

(Philsports Arena, Pasig City)

Second Round Eliminations

9:00 n.u. – Ateneo Blue Eagles vs UE Lady Warriors

12:00 n.u. – UST Golden Tigresses vs Adamson Lady Falcons

2:00 n.h. – FEU Lady Tamaraws vs UP Lady Maroons

4:00 n.h. – DLSU Lady Spikers vs NU Lady Bulldogs

Nawala na ang gutom na manalo na siyang pangunahing napansin ng National University Lady Bulldogs matapos malasap ang masaklap na straight set pagkatalo sa undefeated na De La Salle University Lady Spikers sa 85th University Athletic Association of the Philippines (UAAP) women's volleyball tournament.

Matatandaang tinuldukan ng Lady Bulldogs ang 65-taong pagkagutom sa titulo, subalit sapol ng matikman ang 25-10, 25-15, 25-21 pagkatalo nitong Miyerkules, isa na umanong senyales na isang malungkot na paalala para kay reigning Rookie/MVP Mhicaela “Bella” Belen kasunod ng pangwawalis sa kanila ng La Salle. Hindi pinatikim ng panalo ng NU ang DLSU sa nagdaang 84th season sa 4-0 mula sa tig-dalawa sa eliminasyon at Finals.

“Siguro sa aming mga player, 'yung hunger namin sa paglalaro, medyo nawala po,” wika ni Belen sa nakuhang pagkatalo sa DLSU, kung saan tanging siya ang nakakuha ng double-digit puntos sa 12 mula sa 11 atake. “Makikita po sa La Salle na gusto nila makuha 'yung game, point by point, kumpara sa amin.”

Maagang ipinadama ng Lady Spikers ang kanilang bagsik at kawastuhan ng opensa at depensa ng ibaon ang Lady Bulldogs na pinagbidahan ng tatlong manlalaro sa pangunguna ni super-rookie Angel Canino na tumapos ng 14 puntos mula sa 11 atake, Fifi Sharma sa 12 pts mula sa 10 atake at Jolina Dela Cruz sa 11 pts, habang matinding depensa ang ipinakita ni Thea Gagate, Leila Cruz at Justine Jazareno, habang kapos sa suporta mula kina Alyssa Solomon sa walong puntos ni Finals MVP Princess Robles sa anim.

Lady Spikers nakaganti, Falcons binawian ang UP

n GA / Mabel Vieron-OJT @Sports | March 23, 2023

Matamis na paghihiganti ang inilista ng De La Salle University Lady Spikers laban sa last season tormentor na defending champions National University Lady Bulldogs ng walisin ito bisa ng 25-10, 25-15, 25-21, habang nilipad naman ng Adamson University Lady Falcons ang ikalimang panalo para tapusin ang first round sa panalo sa straight set kontra University of the Philippines Lady Maroons sa 25-18, 25-17, 25-23, Miyerkules ng hapon sa 85th season ng University Athletic Association of the Philippines (UAAP) women’s volleyball tournament sa SM Mall of Asia Arena sa Pasay City.

Baon na baon ang pagkakatudla ng atake ng DLSU Lady Spikers laban sa defending champions upang makuha ang matamis na tagumpay at malupit na paghihiganti kasunod ng pangwawalis rito noong nagdaang 84th season na kahit isang panalong set ay hindi nakatikim ang Taft-based squad para sa 0-4 tapatan mula sa dalawang laro sa eliminasyon at ang serye sa Finals.

“Syempre ang saya talaga namin kase ginawa naming motibasyon yung last season,” pahayag ng beteranong playmaker na si Mars Alba na tumapos ng 20 excellent sets kasama ang tatlong puntos para biyayaan ng magagandang mga atake ang kanyang mga kakampi.

Samantala, nakamit ng Adamson University ang unang panalo sa unang round ng eliminations ng UAAP Season 85 men's volleyball tournament kahapon.

Natuldukan ng Falcons ang kanilang 6-game slide sa pamamagitan ng pagwalis sa winless na University of the Philippines (UP), 25-16, 25-19, 25-22, sa MOA Arena.

Pinagbutihan ng Falcons ang rekord para sa 7th place, habang itinulak ang Fighting Maroons sa ilalim ng standings na may 0-7 card. Samantala, nanguna si Evander Novillo sa Adamson na may 11 puntos, habang nagdagdag sina Mark Coguimbal at Jude Aguilar ng 17 pinagsamang marka.