Titans vs. Cargo Movers sa PVL, 'Pinas, nangwalis sa AVC Cup

ni Gerard Arce @Sports | July 11, 2023

Sa dalawang panalo ng Choco Mucho Flying Titans, lumipad paibabaw ang kahusayan ni Cherry Ann “Sisi” Rondina upang dalhin sa malinis na 2-0 kartada ang koponan upang magsilbing bagong pinuno pagdating sa opensiba at atake na mas kakailanganin ng husto upang pataubin ang wala ring talong F2 Logistics Cargo Movers sa tapatan ng bigating koponan sa Group B sa pagbabalik ng aksyon ngayong Martes sa 2023 Premier Volleyball League (PVL) Invitational Conference sa Philsports Arena sa Pasig City.

Kapwa naghahangad na makuha ang liderato sa kanilang hanay upang mas lumaki ang tsansa sa semifinal round, kung saan tanging top-two teams lang ang inaasahang aabante sa magkahiwalay na grupo na nakatakdang kaharapin ang dalawang guest team na Kurashiki Ablaze mula sa Yokohama, Japan at Kinh Bac Bac Ninh galing Vietnam.

Magtatapat ang Flying Titans at Cargo Movers sa pinakatampok na laro ng 6:30 p.m. na kukumpleto sa quadruple-header na binubuo ng paghaharap ng Petro Gazz Angels laban sa Farm Fresh (Pool B) sa pambungad na laro ng 9:30 a.m. na susundan ng Cignal HD Spikers at Foton Tornadoes (Pool B) sa alas-12:00 ng tanghali, habang magpapatuloy ang bakbakan sa hapon sa tapatan ng Akari Chargers at Chery Tiggo (Pool A) ng 4 p.m.

Naging mainit ang panimulang laro ng Flying Titans ng kapwa nitong walisin ang ang mga baguhang Farm Fresh sa 25-14, 25-7, 25-16 at Foton sa 25-19, 25-19, 25-14 na parehong pinagbidahan ng 26-anyos na one-time UAAP MVP at multi-awarded beach volleyball queen mula University of Santo Tomas Golden Tigresses.

Samantala, nanguna ang Philippine men’s national volleyball team sa Pool D nang talunin ang Mongolia sa five sets sa 2023 Men's Asian Volleyball Challenge Cup nitong Lunes sa Taiwan. Nanguna sa Pinoy si Marck Espejo at ginapi ang Mongolian counterparts, 22-25, 25-21, 26-24, 23-25, 15-12 upang tuluyang lupigin ang group D matapos unang talunin ang Macau noong Linggo.

Ibinangko ng Magic si Sotto sa Summer League Opening

ni Gerard Arce @Sports | July 10, 2023

Dismayado ang fans, higit na ang mga Pinoy sa paghihintay na mabigyan ng playing time si Kai Zachary Sotto sa kanyang NBA Summer League debut para sa Orlando Magic na masaklap na yumuko sa balasadong Detroit Pistons nitong Linggo ng umaga (oras sa Pilipinas) sa Thomas and Mack Center sa Las Vegas, Nevada sa U.S.

Nalasap ng Magic ang 78-89 pagkatalo sa Pistons, kung saan nagisnang nakababad sa upuan ang 7-foot-3 Pinoy stalwart matapos hindi paglaruin ni coach Dylan Murphy, habang tinitingnang nilalamon ng big men ng Detroit duo na sina 2020 second overall pick James Wiseman at last year’s first round pick Jalen Duren ang koponan.

Ito ang pinakahihintay na pagkakataon ng mga Filipino na magisnan sa unang beses ang isang purong manlalaro galing sa Pilipinas na sumabak sa pinakamalaking basketball event sa mundo para maipakita ang kahusayan at kaalaman ng Gilas Pilipinas center sa harap ng NBA scouts at executives sa opisyal na unang laro nito, subalit kinakailangang maghintay muli ng ilan pang laro si Sotto para sa opurtunidad na maisabak sa kanyang debut game.

Dahil sa hindi pagpapalaro kay Sotto ay bumuhos ang kabi-kabilang mga reklamo at pambabash na natamo ng Magic sa social media na pinuntirya ang kakulangan ng big man ng Magic sa laro, kung saan pinulbos ng Piston sa rebounding ang Magic sa 46-30.

“Ya’ll need to stop acting like this is a regular season of the NBA keep pushing the small ball lineup, where obviously the Pistons out-rebounded you guys. You got a 7”3 center in your roster, u didn’t even use him once. U got a gem there, open your eyes Magic,” bulalas ng isang fan sa tweeter account ng Magic. “You just post Kai Sotto for clout,” wika ng isang Filipino-American fan sa social media.

Kai Sotto, handa na sa NBA Summer League

ni Gerard Arce @Sports | July 9, 2023

Nagsimula ng makapagsanay si Filipino big man Kai Zachary Sotto para sa Orlando Magic sa darating na NBA Summer League na nakatakdang ganapin ngayong Linggo ng umaga (oras sa Pilipinas) sa Las Vegas, Nevada, USA.

Inihayag ng 7-foot-3 na purong Filipino ang idinaos na pagsasanay na isinagawa ng kanyang koponan bilang paghahanda sa torneo sa kanyang social media account. “Hi guys, this is Kai Sotto from Orlando Magic's Summer League team. We just wrapped up our first practice in Vegas.

Game time is in July 8,” wika ni Sotto sa inilabas na video sa kanyang Twitter account na malugod na inimbitahan ang mga manonood higit na ang mga Filipinong tagasubaybay. “I hope to see you all there.”

Umaasa ang maraming tagasubaybay ni Sotto na makakakuha ito ng sapat na minuto upang makapaglaro at mailabas ang kanyang kahusayan at kaalaman sa unang laro kontra sa Detroit Pistons na makakatapat ang talentadong sophomore bigman na si Jalen Duren.

Maraming Filipino ang nagnanais na maging kauna-unahang homegrown player mula sa Pilipinas si Sotto na makapaglaro sa NBA. Kasalukuyang naglalaro ang mga may dugong Pinoy na sina Fil-American at Gilas Pilipinas leading guard Jordan Clarkson sa Utah Jazz, Jalen Green ng Houston Rockets at Raymond Townsend na naglaro sa Golden State Warriors at Indiana Pacers nung Dekada ‘80.

Kamakailan lang ay tinanggal ng Magic ang center-forward nitong si Bol Bol, na tila nagbigay ng malaking pagkakataon para kay Sotto. Nitong nagdaang buwan ay dumalo sa mini-camp ang 21-anyos na Gilas center sa koponan ng Utah at Dallas Mavericks.