PHL Kurash bitbit ang impresibong performance sa SEAG AT Asian Games

ni Gerard Arce @Sports | September 1, 2025

Photo: Sumabak sa magkasunod na event ang Kurash national athletes sa 2nd KUSEA Championship at 1st KUSEA Beach Kurash Championship para sa kabuuang 23 medalya sa indoor competition at 22 medals naman sa beach action.

Bumalibag ng sangkaterbang medalya ang Philippine National Kurash team kasunod ng magkakahiwalay na international tournament bilang paghahanda sa darating na malalaking torneo tulad ng 33rd Southeast Asian Games sa Disyembre sa Bangkok, Thailand at 2026 Aichi-Nagoya Asian Games sa Japan.

Patuloy na lumilikha ng impresibong performance ang national squad sa pangunguna ng mga national standouts na sina Asian Championship medalist Charmea Quelino (women’s 63kgs) at Gabriel Ligero, gayundin sina George Angelo Baclagan (men’s 90kgs), double gold medalist Zeus Babanto at 2021 SEA Games gold medalist Jackielou Escarpe (men’s -73kgs), habang sumabak din ang ilang grassroots athletes na matagumpay na nagbulsa ng medalya sa kambal na kompetisyon na ginanap sa Lombok, West Nusa Tengarra Barat sa probinsya ng Indonesia noong nagdaang weekend.

Sumabak sa magkasunod na event ang Kurash national athletes sa 2nd KUSEA Championship at 1st KUSEA Beach Kurash Championship para sa kabuuang 23 medalya sa indoor competition at 22 medals naman sa beach action. “Malaking blessing para sa buong team dahil matagal kase silang nasabik magkaroon ng exposure sa labas.

May iba kase na maglalaro sa 2025 SEA Games sa Judo at Jiu-Jitsu plus next year Asian Games na rin and need nila ng magandang record to qualify,” pahayag ni Kurash coach at dating SEA Games multi-medalists Jillou Mosqueda sa panayam ng Bulgar Sports. “We are getting closer na du'n sa laging nag-overall na bansa (which is Vietnam).

Usually kase sa kanila lahat gold, but we’ve seen so much improvement sa mga players right now,” dagdag ng dating judo at kurash national team athlete na pinasalamatan ng husto ang PSC at POC. Hinambalos ni Quelino ang 2 medalya sa magkahiwalay na bakbakan ng maitala ang gintong medalya sa beach at silver medal sa indoor sa kapwa seniors under-63kgs; dalawang tanso ang kinubra ni 2-time Asian champ bronze medalist Ligero sa under-60kgs, habang nangibabaw sa men’s -90kgs sa beach event si Baclagan at isang tanso sa indoor, gayundin si Escarpe na nakuntento sa 2 tanso sa kanyang kategorya.

Maningning ang dalawang ginto kay multi-athlete Babanto sa cadets under-83kgs sa parehong palaro, habang nasilayan din si 2019 Manila SEA Games champion Estie Gay Liwanen na sumabak sa women’s -78kgs beach na nakakuha ng bronze medal.

Bumira rin ang national mainstays na sina Helen Aclopen (2x bronze - 48kgs); Margaret Fajardo (2x silver -70kgs); Arthuro Llandino (2x bronze -55kgs); Ryan Christian Benavidez (2x silver -66kgs); Niko Ong (2x Bronze -81kgs); Ryan Donor (2x bronze -81kgs); at dating SEAG medalist Renzo Cazeñas (2x silver -90kgs).

Taduran hindi na sasabak sa Thrilla in Manila

ni Gerard Arce @Sports | August 30, 2025

Photo: Kid Pedro General Taduran Jr. - FB

Nilinaw ni reigning International Boxing Federation (IBF) minimumweight champion Pedro “Kid Pedro Heneral” Taduran na tuluyan na itong hindi mapapabilang sa pinakamalaking boxing event sa bansa na Manny Pacquiao: Blow-by-Blow Presents “Thrilla in Manila” 50th anniversary sa Oktubre 29 sa Smart Araneta Coliseum.

Ibinulgar ng two-time world champion sa Bulgar Sports kahapon na may ibang plano para sa kanya ang kampo ng MP Promotions at Elorde Promotions para sa hiwalay na world title fight na mas mapapa-aga ang laban sa darating ding Oktubre.

Inamin ni Taduran na inaasahan niyang magiging parte siya ng prestihiyosong boxing event na katatampukan ng mga pinakamahuhusay na boksingero ng bansa na nabibilang sa MP Promotions ng nag-iisang Filipino boxing legend at eight-division World champion Manny “Pacman” Pacquiao.

Ngunit sa hindi malamang kadahilanan ay mawawala ito sa naunang plano kasama sina World Boxing Council (WBC) mini-flyweight champion Melvin “El Gringo” Jerusalem at dating WBC featherweight titlist Mark “Magnifico” Magsayo. “Tinangal po ako doon. Diko din po alam kung bakit ako doon tinanggal.

Pero po nung sinasabi dati lalaban ako kasama sina Magsayo at Jerusalem,” pahayag ni Taduran sa panayam ng Bulgar Sports sa telepono. “Parang ang sabi nila hindi daw pwede pagsamahin yung parehong world title namin. (Jerusalem),” dagdag ni Taduran, kung saan idedepensa ni Jerusalem ang kanyang korona kontra South African Siyakhowa Kuse.

Nakatakdang idepensa ng 28-anyos na tubong Libon, Albay ang kanyang 105-pound world title belt kontra No.3 contender at undefeated Filipino boxer Christian Balunan, na may tangang 12-0 rekord at may pitong panalo galing sa knockouts, kung saan hinahanapan ng lugar sa bansa ang bakbakan, na isang inaasinta ang Rizal Memorial Coliseum.

“Sinabihan lang ako nila sir Sean (Gibbons) na nakahiwalay daw yung laban ko dito sa bansa. Parang free admission ata siya para sa lahat,” paliwanag ng Pinoy southpaw.

Sa huling panayam rito ng Bulgar Sports sa laban ni Kenneth “The Lover Boy” Llover at Luis “El Nica” Concepcion nung Agosto 17 sa Winford Hotel Resort and Casino sa Maynila, kinumpirma nitong naghahanda na para sa nasabing bigating produksyon na gaganapin sa tinaguriang “Mecca of Philippine Sports.”

Nagawa na ring makipag-ugnayan ni Pacquiao, kasama si MP Promotions President at leading advisor Gibbons kay Pangulong Ferdinand “Bongbong” Marcos Jr. upang masuportahan ng gobyerno ang pagdiwang ng anibersaryo ng matinding bakbakan sa pagitan nina boxing legend Muhammad Ali at Joe Frazier na ginanap nung Oktubre 1, 1975 sa The Big Dome, kung saan nagtapos sa pagpapanatili ng undisputed heavyweight title kay Ali dulot ng retirement (RTD) matapos ang bugbugang 14th round.

Matagumpay na nadepensahan ni Taduran ang kanyang korona laban sa dating kampeon na si Ginjiro Shigeoka sa pamamagitan ng 12-round split decision nitong Mayo 24 sa Intex, Osaka, Japan, habang nakalikha ito ng four-fight winning streak upang makabangon sa pagkakawala ng IBF korona sa kababayang si Rene Mark “Mighty Mouse” Cuarto nung Pebrero, 2021 matapos mapagwagian ang korona kay Pinoy boxer Samuel Salva sa fourth round stoppage nung Setyembre 2019 sa Taguig City.

Makakasukat ni "El Gringo" sa 'Thrilla' isang Mexican?

ni VA @Sports | August 26, 2025

Photo: Melvin Jerusalem - FB

Masusing hinahanapan ng karapat-dapat na makakatapat si reigning World Boxing Council (WBC) minimumweight champion Melvin “El Gringo” Jerusalem sa world title defense na gaganapin sa 50^th anniversary ng “Thrilla in Manila” sa huling linggo ng Oktubre sa makasaysayang Smart Araneta Coliseum.

Kasalukuyang nagsasanay ang 2-time world champion sa Japan para sa kanyang strength and conditioning training kasama ang Japanese coaches bilang preparasyon sa itinutulak na boxing match sa bansa, kung saan parte rin sina reigning International Boxing Federation (IBF) mini-flyweight titlist Pedro “Kid Pedro Heneral” Taduran at mga dating world champions na sina Mark “Magnifico” Magsayo at dating unified super-bantamweight titlist Marlon “Nightmare” Tapales.

Ayon kay head trainer Michael Domingo, nauna nang sinipat ng Zip-Sanman Promotions na makatapat ni Jerusalem sa pinakamalaking boxing event sa bansa ang dating IBF 105-pound champion na si Daniel “Cejitas” Valladares ng Mexico, subalit nagkaroon ng pagbabago sa naturang plano at hinahanapan pa ng mas matinding katapat ang 31-anyos mula Manolo Fortich, Bukidnon.

“Una na talagang puntirya itong si Valladares, pero may pagbabago. Hinahanapan siya ng bagong kalaban na southpaw naman na pwedeng itapat para sa Thrilla in Manila,” pahayag ni Domingo sa panayam sa telepono ng Bulgar Sports, na nais ang mas matinding katapat din para sa prize-fighter “Ang gusto ko nga sana yung tipong Mexican ulit para matapang at hindi umaatras.”

Galing sa matagumpay na ikalawang pagdepensa sa korona ang 5-foot-2 boxer na dinomina ang dating kampeon na si Yudai Shigeoka ng Japan nitong nakaraang Marso 30 sa Aichi Sky Expo sa Tokoname, Japan sa pamamagitan ng 12-round unanimous decision. Ito ang ikalaawang pagkakataon na tinalo ni Jerusalem si Shiegeoka matapos maitakas ang 12-round split decision nung Marso 31, 2024 na ginanap naman sa Nagoya, Japan.