Nasaan na ang pag-aalala at pagmamahal sa kasaysayan at sa inang bayan?
ni Fr. Robert Reyes - @Patakbo-Takbo | September 22, 2020
Narinig natin kamakailan ang pagninilay ni Obispo Socrates Villegas. Aniya, kailangan nating tandaan ang mahahalagang pangyayari sa ating kasaysayan.
Kaya’t binanggit ng Obispo ang tatlong mahahalagang taon—1898, 1946 at 1986.
Lumaya tayo sa mga Kastila noong 1898, samantalang, noong 1946 naman nang lumaya tayo sa mga Amerikano. At mahalaga rin ang 1986, Pebrero 23 hanggang 25, ang mga makasaysayang araw ng People Power Revolution. Samantala, bukas, ika-21 ng Setyembre ay ang ika-48 taong anibersaryo ng pagdeklara ng Martial Law o Batas Militar sa ating mahal na bansa.
Hindi natin malilimutan ang ika-21 ng Setyembre. Nasa unang taon tayo ng pag-aaral sa unibersidad noong araw na ito taong 1972. Nawalan kami ng pasok noong mga unang buwan ng 1972, mula Hulyo 17 hanggang 21 ay bumuhos nang walang tigil ang ulan.
Masaya ang mga mag-aaral dahil idineklara ng pamahalaan na walang pasok ang mga araw na iyon. Sa lakas ng ulan, lahat ay hindi makalabas ng bahay. Nakulong kami sa seminaryo at itinigil muna ang mga lektyur sa mga silid-aralan. Mabuti na lang at maunawain ang aming rektor. At dahil marami sa amin ay hindi alam kung ano ang dapat gawin, lumahok na lamang ang marami sa “relief operations” para sa mga apektadong residente ng Pampanga at iba’t ibang mga bayan ng Gitnang Luzon.
Pumasok na kami sa sumunod na buwan ng Agosto. Nang dumating ang kasunod nitong buwan, muling naulit ang isang buwan na walang pasok. Ngunit hindi bagyo ang dahilan, kundi ang deklarasyon ng Martial Law o Batas Militar ni ex-P-Ferdinand Marcos.
Hindi malilimutan ang petsang ito nang idinahilan ng dating Pangulo ang malaking problema ng paglago ng mga komunista sa bansa, kung kaya’t kailangang ideklara ang Batas Militar.
Sa kabilang banda, hindi rin malilimutan ng mga Aleman ang ika-27 ng Pebrero 1933. Ito ang petsa ng pagsunog sa Reichstag o ang Parlamento ng mga Aleman na ibinintang sa mga komunista ng kanilang kanselor na si Adolph Hitler. Naniwala ang mga Aleman, at ito ang simula ng pag-angat ni Hitler bilang diktador. Sa mga sumunod na buwan, unti-unting kinumbinse ni Hitler ang mga Aleman na kailangang wakasan na ang mga problemang idinudulot ng mga Hudyo.
Hindi ito malilimutan ng mga Aleman, lalo na ng mga Hudyo. Mula noon, dahan-dahang pumangit at naging mapanganib ang pagiging Hudyo sa Alemanya. Ito ay nagwakas sa pagtatayo ng mga Concentration Camps kung saan ipinapatay ni Hitler ang 6 milyong Hudyo.
Bukas, ika-21 ng Setyembre ay ang ika-48 anibersaryo ng pagdeklara ng Batas Militar, tulad ng hindi pagkalimot ng mga Aleman sa ika-30 ng Enero 1933, hindi natin dapat kalimutan ang ika-21 ng Setyembre 1972.
Tama si Obispo Soc Villegas, ‘wag nating kalimutan ang mahahalagang taon ng ating paglaya, gayundin ang kahalagang gunitain ang mga panahon ng ating pagkaalipin at pagkaapi.
Kung nais nating ganap na lumaya pagnilayan nating mabuti ang masasaya’t matagumpay na panahon sa ating kasaysayan. Gayundin, tingnan at pagnilayang mabuti ang madidilim, malulungkot at lubos na mapanghamong yugto ng ating kasaysayan.
Mula noong panahon ni ex-P-Marcos hanggang sa kasulukuyang panahon, maraming hindi tumitigil sumuri, umunawa at nakikibaka dahil sa mga nangyayari sa ating bansa’t mamamayan—ito ang kalayaan.