BBM, dumalaw sa puntod ng ama sa Libingan ng mga Bayani

ni Lolet Abania | May 11, 2022

Binisita ni presidential candidate at napipintong lider ng bansa na si Ferdinand “BBM/Bongbong” Marcos, Jr. nitong Martes ang puntod ng kanyang ama, ang yumaong dating Pangulong Ferdinand Marcos, Sr., sa Libingan ng mga Bayani.

Naghandog ng mga bulaklak ang dating senador sa kanyang ama, kung saan nai-post ang mga larawan sa kanyang Facebook page ngayong Miyerkules. Wala namang iba pang detalyeng ibinigay kaugnay dito.

Matatandaang pinayagan ng administrasyong Duterte ang paglibing kay Marcos Sr. sa Libingan ng mga Bayani sa kabila ng malawakang oposisyon at mga kritisismo.

Ayon kay Bongbong, ang kanyang ama ay nararapat na mabigyan ng lugar sa Libingan ng mga Bayani dahil ito ay dating pangulo at isang sundalo.

Alas-11:02 ng umaga ngayong Miyerkules, patuloy na nangunguna si Marcos Jr. sa presidential race na mayroong 31,078,996 votes base sa partial, unofficial count, laban sa mahigpit niyang katunggali na si Vice President Leni Robredo, na mayroong 14,809,527 votes.

Sept. 11 bilang Marcos Day sa Ilocos Norte, aprub

ni Thea Janica Teh | September 2, 2020

Sa botong 197 ng mga mambabatas, inaprubahan na ang House Bill (HB) No. 7137 o pagdedeklara ng Setyembre 11 na non-working holiday sa Ilocos Norte bilang pagpupugay sa kapanganakan ni dating Pangulong Ferdinand Marcos.

Ang HB No. 7137 o “President Ferdinand Edralin Marcos Day” ay isinulat ng 3 Ilocano lawmakers kasama ang pamangkin ni Marcos na si Ilocos Norte 2nd District Representative Angelo Marcos Barba. Ito ay anak ng bunsong kapatid ni Marcos na si Fortuna Marcos Barba na namatay noong 2018.

Samantala, ang dalawa pang may-akda ng bill na ito ay sina Ilocos Norte 1st District Representative Ria Fariñas at Probinsiyano Ako Representative Rudys Caesar Fariñas I.

Si Marcos ay ipinanganak sa Sarrat, Ilocos Norte noong Setyembre 11, 1917. Matatandaan namang Setyembre 21 nang magdeklara ito ng Martial Law sa bansa.