P500K tulong-pinansyal ng PCSO kay Lydia De Vega, ang ‘Sprint Queen' ng 'Pinas

ni Fely Ng - @Bulgarific | August 4, 2022

Hello, Bulgarians! Kamakailan ay napabalita ang kalagayan ng tinaguriang Asia's fastest woman in the 1980s, na si Lydia De Vega Mercado. Mabilis na inaksyunan ng Philippine Charity Sweepstakes Office (PCSO), nang malaman ang kanyang sitwasyon at agad na nagpaabot ng suporta sa atleta sa kanyang pakikipaglaban sa Stage 4 na breast cancer, ang pinaka-mapanghamong karera sa kanyang buhay.

Alinsunod dito, ang PCSO, sa pangunguna ni Chairperson Junie E. Cua at Vice Chairperson at General Manager Melquiades A. Robles ay nagpadala ng suportang-pinansyal sa pamilya ni De Vega-Mercado sa halagang P500,000 para sa kanyang pagpapagamot sa Makati Medical Center. Sa pamamagitan ng kanyang anak na si Stephanie Mercado de Koenigswarter na tumanggap ng tseke noong Martes, Agosto 2, 2022.

Ang track and field legend na si Lydia de Vega-Mercado ay tumakbo sa 1984 Los Angeles Olympic at noong 1986 Asian Games sa Seoul, Sout h Korea, na kauna-unahang nanalo ng back-to-back gold medal sa 100-meter dash. Ito ang nagtulak sa kanya sa katanyagan at tinawag siyang Asia's fastest woman at "Sprint Queen" noong dekada otsenta, gayundin ang unang babaeng Pilipino na tumakbo at nakipagkumpetensya sa Olympics. Ang kanyang mga nagawa ay nagsilbing tanglaw ng inspirasyon para sa bayan at palaging magsisilbing motibasyon sa mga Pilipino.

Kasabay ng pagbibigay-suporta sa atleta, nabanggit din sa kaganapan ang iba pang tulong ng PCSO sa mga lugar na dinaanan ng lindol kamakailan, kung saan nagpadala ang ahensya ng mga gamot, food packs at ambulansya na magagamit ng mga kababayan sa mga apektadong lugar.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Emergency loan ng GSIS sa mga biktima ng lindol

ni Fely Ng - @Bulgarific | July 30, 2022

Hello, Bulgarians! Ipinahayag ni Government Service Insurance System (GSIS) President at General Manager Wick Veloso na mag-aalok ang GSIS ng emergency loan para tulungan ang mga miyembro at pensiyunado ng GSIS na naninirahan o nagtatrabaho sa mga lugar na naapektuhan ng 7.3-magnitude na lindol na tumama sa hilagang bahagi ng bansa.

“Titiyakin natin na ang ating mga miyembro at pensiyunado ay makatatanggap ng tulong-pinansyal sa pamamagitan ng ating emergency loan upang maitawid sila sa panahon ng kagipitan. Nakikipag-ugnayan din kami sa lahat ng pampublikong opisina ng gobyerno na naapektuhan ng lindol na ipaalam agad sa amin kung may mga nasirang ari-arian ng gobyerno na maaaring mag-claim ng insurance mula sa GSIS,” paliwanag ni Veloso pagkatapos iutos ni President Ferdinand Marcos, Jr. ang agarang pagpapadala ng rescue at relief teams sa mga apektadong lugar.

Binanggit ng pension fund chief na may inilaang P5.4 bilyon ang GSIS para sa emergency loan program ngayong taon. Ang mga GSIS member na may kasalukuyang emergency loan balance pa ay maaring makahiram ng hanggang Php40,000 upang mabayaran ang kanilang natitirang emergency loan balance at makatanggap pa rin ng netong Php20,000. Ang mga walang existing emergency loan ay maaaring mag-apply ng Php20,000. Ang mga pensyunado rin ay makauutang ng Php20,000.

Maaaring mag-apply sa loan ang mga active member na naninirahan o nagtatrabaho sa mga lugar na apektado sa Hilagang Luzon matapos maideklara ang mga ito sa ilalim ng state of calamity. Ang mga pensioner na naninirahan sa mga nasabing lugar ay maaari ding mag-apply.

Ang GSIS emergency loan ay maaaring bayaran sa 36 equal monthly instalments na may 6% interest rate. Saklaw din ito ng loan redemption insurance, kung saan ituturing na fully paid ang loan sa sandaling pumanaw ang borrower sa kondisyon na updated ang bayad sa utang.

Maaaring mag-apply sa emergency loan ang mga miyembro na nasa active service at hindi naka-leave of absence without pay; mayroong paid premiums na hindi bababa sa tatlong buwan sa loob ng huling anim na buwan; walang nakabinbing kasong administratibo o kriminal; at may net take-home pay na hindi bababa sa Php5,000 pagkatapos maibawas ang lahat ng kinakailangang buwanang obligasyon.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Higit 1.5 milyong bakuna, mapapaso na sa katapusan ng Hulyo

ni Fely Ng - @Bulgarific | July 22, 2022

Hello, Bulgarians! Ibinahagi ni Go Negosyo founder Joey Concepcion, na may 1,516,040 na bakuna sa COVID-19 ang mapapanis na sa katapusan ng Hulyo. Muli siyang umaapela sa Health Technology Assessment Council (HTAC) na payagan na ang pribadong sektor na mag-second booster. Ito, aniya ay makatutulong sa pagkamit sa layunin ni Pangulong Ferdinand Marcos, Jr. na ma-booster ang hindi bababa sa 23 milyong Pilipino sa loob ng kanyang 100-araw sa panunungkulan.

“Kung titingnan mo ang mag-e-expire na vaccines, ang daming pera nito,” sabi ni Concepcion sa ginanap na Pandesal Forum kamakailan. Ang mga nasabing vaccine ay binili ng pribadong sektor sa pamamagitan ng tripartite agreement na A Dose of Hope. Ang bawat AstraZeneca ay tinatayang nagkakahalaga ng hindi bababa sa US$5 bawat isa, habang ang Moderna ay binili sa humigit-kumulang US$27. Sa mga ito, 628,680 ang AstraZeneca at 887,360 ang Moderna, sa ilalim ng tripartite agreement, kalahati ng mga bakuna ay ibinahagi sa gobyerno.

“Napatunayan na ng pribadong sektor na handa itong magpabakuna. Hindi na sila kailangang pilitin dahil ayaw nilang magkasakit at maubos ang kanilang mga sick leave,” sabi ni Concepcion. Dagdag niya, bagamat mahalaga pa rin ang pagtuon sa mga first booster, ang mga bakuna ay binili ng pribadong sektor. “Dito ako nanghihinayang,” sabi niya.

Hinihiling niyang payagan ang mga second boosters para maprotektahan ang mga empleyadong hindi pa rin pinapayagang mag-second booster. “Parang walang sense of urgency,” sabi ni Concepcion. “Sinisikap ng gobyerno na gawin ang makakaya nito, ngunit mayroong mga medyo mabagal kumilos,” aniya. Iminungkahi niyang dapat gawin ng National Vaccination Operations Center (NVOC) ang tungkulin ng HTAC pagdating sa mga bakuna.

Ang HTAC ang nagbibigay ng patnubay sa Department of Health (DOH) pagdating sa mga pangkalusugang interbensyon na popondohan ng gobyerno. Nauna na nitong inirekomenda na tanging ang mga healthcare worker, ang immunocompromised at mga taong higit sa 60 taong gulang ang maaaring mag –second booster laban sa COVID-19.

“Palagay ko ay dapat tayo ay lahat na nababahala para sa ating ekonomiya,” ani Concepcion. “Ang mga bakuna ay ang pinakamahalagang sandata rito,” sabi niya at ang pagresolba sa mga isyu sa patakaran sa second boosters ay makatutulong sa pag-unlad ng ekonomiya.

“Maraming empleyado at nagtatrabaho ang nasa labas ng edad na itinakda ng HTAC. Ngunit nahaharap sila sa panganib at nakalantad sa virus sa araw-araw nilang pagkayod,” sabi ni Concepcion.

Maraming bansa ang nagpahayag sa pakinabang ng second booster. Kabilang ang Australia at ang lalawigan ng Ontario ng Canada. Sa US, nagpaplanong payagan ang pangalawang COVID-19 boosters para sa lahat ng mga nasa hustong gulang. “Hindi ba dapat nating sundin ang mga bansang ito? Ang mga bakuna na ginagamit natin ay nanggaling sa mga bansang ito,” ani Concepcion.

Sa Pilipinas, ang second booster na gamit ang mga bakunang mRNA ay pinapayagan para lamang sa mga edad 60 pataas, healthcare workers at immunocompromised.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.