4 patay, 19 sugatan sa BARMM Election

by Mervin Reyes/Mai Ancheta @News | September 15, 2026

Photo: Philippine National Police

Apat ang patay at hindi bababa sa 19 ang sugatan sa dalawang magkahiwalay na insidente ng karahasan sa Cotabato City ilang oras bago ang pagbubukas ng unang parliamentary elections ng Bangsamoro Autonomous Region in Muslim Mindanao (BARMM) nitong Lunes.

Sa Brgy. Bagua 2, pinaputukan umano ng mga hinihinalang supporter ng isang hindi pinangalanang kandidato ang isang grupo na kinabibilangan ni Brgy. Chairman Fahad Singh at ilang lokal na opisyal.

Tatlo ang nasawi sa pamamaril, kabilang ang dalawang kasama ni Singh. Sugatan din sa insidente si City Councilor Marouf Ayunan Pasawiran.

Samantala, isang lalaki ang nasawi sa pagsabog ng granada noong Linggo ng gabi sa Amirol Elementary School sa Brgy. Kalanganan Mother.

Ayon sa Cotabato City Police at mga lokal na awtoridad, umabot sa apat ang nasawi at 14 hanggang 19 ang sugatan sa dalawang insidente.

Iniuugnay ng mga residente at opisyal ang karahasan sa matinding tunggalian ng mga grupo sa pulitika bago ang halalan.

Pre-shaded na balota sa BARMM Elections, fake news — Comelec

by Mervin Reyes @News | September 13, 2026

Photo: File / Comelec

Pinabulaanan ng Commission on Elections (Comelec) ang kumakalat sa social media na mga pre-shaded na balota ang gagamitin sa kauna-unahang Bangsamoro Autonomous Region in Muslim Mindanao (BARMM) Parliamentary Elections sa Lunes, Setyembre 14.

Ayon sa poll body, fake news ang post mula sa account na “Mapag Matyag” na nagsasabing may mga balotang inihanda at shaded na umano ng mga kawani ng munisipyo o guro bago ang halalan.

Nilinaw ng Comelec na ang mga balota ay nakatago sa mga Office of the Municipal o City Treasurer sa BARMM, naka-vacuum seal at bubuksan lamang sa araw ng eleksiyon.

Hinimok din ng poll body ang publiko na i-report agad sa Command Center sa Alnor Hotel and Convention Center sa Cotabato City ang anumang problema sa mga na-deliver na balota.

Samantala, tiniyak ng Comelec na handa ang mga Automated Counting Machine (ACM) sakaling magkaroon ng power outage. May baterya umano ang bawat makina na kayang tumagal ng mahigit 14 oras.

Sunud-sunod na pagpapatalsik sa mga lider... Thailand, nagbukas uli ng halalan

by Jenny Rose Albason @Overseas News | February 10, 2026

Photo FIle: Thai-PBS

Muling nagbukas ang mga presinto sa Thailand nitong Linggo para sa isang krusyal na halalan, habang patuloy na sinusubukang bumangon ng bansa mula sa sunud-sunod na pagpapatalsik sa mga lider at pagbuwag sa mga partidong pulitikal sa loob lamang ng nakalipas na dalawang taon.

Kabilang sa mga pangunahing hamon na kakaharapin ng susunod na pamahalaan ang matamlay na ekonomiya, ang tensiyon sa border laban sa Cambodia, at ang lumalalang banta ng mga transnational cyberscam network sa Timog-Silangang Asya.

Sa loob ng huling dalawang taon, nasaksihan ng Thailand ang mabilis at madalas na pagpapalit ng liderato bunsod ng mga desisyon ng korte at pagbagsak ng mga koalisyon sa gobyerno.

• 

  Photo File: Lillian Suwanrumpha / AFP

Si Srettha Thavisin ng Pheu Thai Party ay naupo bilang punong ministro noong Agosto 2023 matapos ang halalan kung saan hinarang ng Senado ang panalo ng Move Forward Party. Gayunman, pinatalsik siya ng Constitutional Court noong Agosto 2024 dahil sa isyu ng etika kaugnay ng kanyang pag-appoint ng isang opisyal.

Pumalit sa kanya si Paetongtarn Shinawatra, bunsong anak ng dating punong ministro na si Thaksin Shinawatra at miyembro rin ng Pheu Thai Party. Naupo siya noong Agosto 2024 ngunit napatalsik din ng korte makalipas lamang ang ilang linggo.

Noong Setyembre 2024, si Anutin Charnvirakul ng Bhumjaithai Party ang naging kasalukuyang punong ministro matapos makuha ang suporta ng parlamento kasunod ng pagbuwag ng mga naunang alyansa. Siya ang ikatlong lider ng Thailand sa loob lamang ng dalawang taon.

Sa ilalim ng konstitusyong binuo ng militar noong 2017, nananatiling makapangyarihan ang mga hindi inihahalal na institusyon tulad ng Senado at ng Constitutional Court, na patuloy na may malaking impluwensiya sa pulitika ng bansa.

Sa kasalukuyang halalan, inaasahan ang panibagong matinding negosasyon sa pagitan ng mga partido, dahil malabo pa ring may makakuha ng ganap na mayorya sa gitna ng kontroladong sistemang pulitikal ng Thailand.