DepEd at Phivolcs, tulungan para sa kaligtasan ng mag-aaral

by Info @Editorial | October 17, 2025

Kasunod ng utos na suspendihin ang face-to-face classes sa ilang lugar dahil sa banta ng sunud-sunod na lindol, meron pa ring mga ‘di naiwasang magtanong at mangamba.

Paano na ang pag-aaral ng mga bata na bagama’t tuloy sa pamamagitan ng online at modular ay hirap pa rin.

Kaya ang hakbang ng Department of Education na makipagtulungan sa Philippine Institute of Volcanology and Seismology (Phivolcs) ay isang tamang desisyon.

Layunin ng pagtutulungang ito na mapanatili ang balanse sa pagitan ng pangangalaga sa kaligtasan ng mga mag-aaral at kawani, at ng layuning ipagpatuloy ang edukasyon kahit sa panahon ng kalamidad.

Nagkasundo ang DepEd at Phivolcs na palakasin ang koordinasyon sa pagpapalabas ng mga siyentipikong advisory at information materials upang mapanatili ang tiwala ng publiko at maiwasan ang maling impormasyon sa panahon ng krisis.

Plano rin ang pagtatayo ng DepEd Command Center para sa mas mabilis na monitoring at disaster response.

Hindi lang ito usapin ng edukasyon, kundi ng buhay. Kapag batay sa agham ang desisyon, nababawasan ang panganib at naliligtas ang mas maraming mag-aaral at guro. 

SALN na bukas sa publiko, wa’ ‘wenta kung ‘di totoo

by Info @Editorial | October 16, 2025

Ang Statement of Assets, Liabilities, and Net Worth (SALN) ay hindi basta-bastang dokumento. Isa itong sinumpaang salaysay ng katotohanan — isang salamin ng yaman, utang, at ari-arian ng isang lingkod-bayan. 

Kamakailan nang naglabas ang Office of the Ombudsman ng memorandum na nagtatalaga ng bagong guidelines para ma-access ng publiko ang SALN ng mga opisyal ng gobyerno.  Ito ay upang labanan ang katiwalian at pag-abuso sa kapangyarihan.

Kaya dapat na ang bawat detalye sa SALN ay totoo, tapat, at walang itinatago.

Sa tuwing may opisyal na nagsusumite ng SALN na may kulang, mali, o sinadyang paglihis sa katotohanan, hindi lang siya lumalabag sa batas — binibigo rin niya ang tiwala ng taumbayan. Ang SALN ay hindi para lang sa pagsunod sa requirement. Isa itong kasangkapan upang masiguro ang transparency at accountability. Kaya’t hindi sapat na magsumite lang — dapat ay totoo ang nilalaman. 

Sapagkat kung ang SALN ay nagiging kathang-isip, nawawala ang saysay ng batas, at nananaig ang kultura ng kasinungalingan at korupsiyon.

Dekalidad na edukasyon sa gitna ng kalamidad

by Info @Editorial | October 15, 2025

Kahit walang face-to-face classes, hindi dapat tumigil ang pagkatuto ng mga estudyante. Responsibilidad ng mga paaralan at guro na tiyaking naihahatid nang malinaw ang aralin, gamit man ang modules, online classes, o ibang alternatibong paraan.Batid nating hindi lahat ng bata may internet o gadgets, kaya dapat may printed modules o offline materials. 

Hindi rin sapat ang basta ipasa lang ang aralin — kailangan ng paliwanag, gabay, at malinaw na instruksyon para maunawaan ito.Masasabing ito’y hamon sa lahat. Kaya dapat laging bukas ang komunikasyon sa pagitan ng guro, magulang, at estudyante.

Kung may hindi naintindihan, kailangang may paraan para humingi ng tulong.Ang edukasyon ay karapatan ng bawat bata. Hindi dapat maging hadlang ang kawalan ng harapang klase para matuto. 

Sa pamamagitan ng tamang sistema at pagtutulungan, pilitin nating maihatid pa rin ang dekalidad na edukasyon saan mang lugar.