Pabahay at negosyo sa mga palaboy — DSWD

ni Mai Ancheta | July 1, 2023

Inilunsad ng Department of Social Welfare and Development (DSWD) ang Oplan Pag-Abot para sa mga pamilya at mga batang palaboy.

Layon ng programa na tulungan ang mga pamilya at mga batang naging tahanan ang lansangan.

Ayon sa DSWD, tutulungan ang mga palaboy sa pamamagitan ng medikal, suporta sa pagkain, transportasyon at relokasyon.

Bibigyan din ang mga ito ng pagkakakitaan at iba pang serbisyo upang hindi na bumalik ang mga ito sa lansangan.

Isasailalim sa assessment ng DSWD ang mga pamilya at batang palaboy at dito ibabase kung anong tulong ang ibibigay sa mga ito.

Magiging pilot operation ang Metro Manila at 24 oras ang operasyon ng Oplan Pag-abot sa pamamagitan ng social workers ng ahensya.

Makakatulong ng DSWD sa implementasyon ang Commission on Human Rights.

Mahihirap, nasasanay umasa.. Ayuda, pagtrabahuhan n'yo — DSWD

ni Mai Ancheta | June 5, 2023

Nagtakda ng panuntunan ang Department of Social Welfare and Development (DSWD) para sa mga mapapabilang sa food stamp program ng pamahalaan.

Ayon kay DSWD Undersecretary Edu Punay, kailangang mag-enroll sa mga programa ng Department of Labor and Employment (DOLE) at Technical Education and Skills Development Authority (TESDA) na lilikha ng trabaho ang mga benepisyaryo para makasama sa food stamp program.

Binigyang-diin ng opisyal na layon nito na matigil na ang kultura ng pagiging palaasa sa tulong na ibinibigay ng gobyerno.

"Itong design na ito para sa food stamp program ay multi-purpose. Hindi lang kami puro ayuda na kinalakihan ng ating mga kababayan. Kami ay nagiging developmental na," ani Punay.

Sinisiguro aniya ng DSWD na hindi nakadepende lang sa ayuda at tanggap nang tanggap ang mga tao.

Para manatili aniya sa food stamp program ang mga mahihirap, hihingan ng requirements ang mga ito na mag-submit ng sertipikasyon na naghahanap sila ng trabaho sa pamamagitan ng DOLE at TESDA.

Ang food stamp program ay popondohan ng P40 billion kung saan tig-tatlong libong piso ang ibibigay na allowance sa target na isang milyong pinakamahihirap na pamilya sa pamamagitan ng electronic benefit transfer (EBT) cards.

Ang EBT ang gagamitin ng mga benepisyaryo para ibili ng pagkain sa mga accredited local retailers ng DSWD.

P40B food stamp para sa mahihirap, pinag-aaralan pa — DSWD

ni Madel Moratillo | June 4, 2023

Pinag-aaralan pa ng gobyerno kung paano ang magiging implementasyon ng food stamp program ng Marcos administration.

Sa isang pulong balitaan, sinabi ni Department of Social Welfare and Development Undersecretary Eduardo Punay, ang tinatayang P40 bilyong pondo na kailangan sa programa ay pang-isang taon lang.

Layon ng Food Stamp Program na tinawag na "Walang Gutom 2027” na matulungan ang mga pamilyang nakararanas ng involuntary hunger o kumikita ng mas mababa sa P8,000 kada buwan.

Una rito, sinabi ng DSWD na P3,000 ang ibibigay sa pamilyang benepisyaryo kada buwan na ibibigay electronically.

Ito ay para may maipambili sila ng pagkain sa DSWD registered o accredited local retailers. Ayon kay Punay, nakikipag-ugnayan pa sila sa economic team ng administrasyon kung paano ang funding ng programa.

Nakikipag-ugnayan din aniya sila sa Asian Development Bank at World Bank na nag-alok na popondohan ang programa.

Una rito, sinabi ni DSWD Secretary Rex Gatchalian, na target masimulan ang programa sa unang quarter ng 2024. Sa ngayon ay nasa tinatawag na design stage pa rin kasi ang programa