DTI Sec. Lopez, nagpositibo sa COVID-19

ni Lolet Abania | December 9, 2020

Sumailalim na sa full isolation si Department of Trade and Industry (DTI) Sec. Ramon Lopez matapos na magpositibo sa COVID-19 test.

Sa isang statement ngayong Miyerkules, sinabi ni Lopez na sumailalim siya sa test noong weekend matapos na ma-expose sa isang indibidwal na nagpositibo sa COVID-19 noong December 2.

"Am asymptomatic naman but am on full isolation already," sabi ni Lopez subali't hindi na siya nagbigay pa ng detalye.

Si Lopez ang ika-apat na Cabinet official na tinamaan ng COVID-19. Ang mga nagpositibo sa test sa COVID-19 ay sina Department of Interior and Local Government (DILG) Sec. Eduardo Año, Department of Education (DepEd) Sec. Leonor Briones at Department of Public Works and Highways (DPWH) Sec. Mark Villar, gayunman, lahat sila ay nakarekober na.

Coastal road sa Sorsogon City, bukas na

ni Thea Janica Teh | August 30, 2020

Pormal nang binuksan ang Coastal road sa Sorsogon City ngayong Linggo. Ito ay malaking tulong sa mga mamamayan para maiwasan ang trapiko at maprotektahan ang komunidad sa storm surge, ayon sa Department of Public Works and Highways.

Maaari nang daanan ang 4-lane Sorsogon City Coastal Road na may habang 5.52 kilometers mula Rompeolas hanggang Barangay Balogo.

Madadaanan sa coastal road ang ilang barangay sa Sorsogon tulad ng Sirangan, Sampaloc at Balogo. Ayon kay Public Works Secretary Mark Villar, ito ay kumokonekta sa kalsada ng mga barangay Pangpang, Tugos, Cambulaga at Talisay.

Dahil sa malalakas na bagyong dumadaan sa Bicol region, makatutulong din ang coastal road na ito upang mabigyang proteksiyon ang komunidad mula rito ayon kay DPWH undersecretary for Luzon operations Rafael Yabut.

Bukod sa smooth ride, matatanaw din ang magandang view ng Sorsogon sa pagbiyahe rito. Ito rin ay itinuturing na “grandest” project sa ilalim ng “Build, build, build Program” ng gobyerno sa Bicol region.