DPWH, magpapatayo ng mga imprastruktura sa Sulu

ni Eli San Miguel - Trainee @News | December 10, 2023

Nakipagtagpo ang Department of Public Works and Highways (DPWH) kasama ang iba't ibang stakeholders sa Sulu upang itala ang mga proyektong kalsada at iba pang imprastruktura na magpapalakas sa agrikultura at ekonomiya ng lalawigan.

Binigyang-diin ni DPWH Senior Undersecretary Emil K. Sadain na nakatuon ang pulong sa mga diskusyon at pagsasalitan ng ideya, na nagbibigay daan sa publiko na magtanong hinggil sa saklaw ng proyekto habang ito ay nasa yugto ng pagsusuri ng feasibility at detailed engineering design (DED).

Sinabi niya na nasa ilalim ang mga proyektong imprastruktura ng Improving Growth Corridors in Mindanao Road Sector Project (IGCMRSP) na sinusuportahan ng Asian Development Bank (ADB).

Kabilang sa mga proyektong ito ang P1.64 bilyong Paticul - Jolo - Indanan Coastal Bypass Road (na may viaduct structure at approach roads) sa Indanan at ang P8.22 bilyong Sulu Circumferential Road (na may mga exemption) sa Lalawigan ng Sulu.

“The projects mark the beginning of an effort towards unwavering peace and significant advancement as these projects heal the scars on the hearts of the Moro Muslim People of the South,” saad ni DPWH Unified Project Management Office (UPMO)-Roads Management Cluster 2 Project Director Sharif Madsmo H. Hasim.

DPWH, kinalampag sa P23B Samal-Davao Bridge project

ni Mylene Alfonso @Business News | July 19, 2023

Kinalampag ni Sen. Risa Hontiveros ang Department of Public Works and Highways (DPWH) at hiniling na aksyunan ang reklamo ng mga environmentalist at business group na kumukontra sa pagtatayo ng P23 billion Samal Island-Davao City Connector (SIDC) Bridge.

Ayon kay Hontiveros, tinalakay niya ang isyu sa deliberasyon ng DPWH budget noong 2023 matapos marinig ang reklamo ng mga maaapektuhan ng nasabing proyekto.

Aniya, dapat ibahin ng DPWH ang disenyo ng proyekto bukod sa dapat magsagawa rin ng konsultasyon sa iba’t ibang stakeholders. Aniya, kontra ang iba’t ibang grupo sa naturang proyekto dahil sa magiging epekto nito sa kalikasan partikular sa coral reefs at mangrove areas sa Samal Island.

Ang SIDC ay isa sa mga pangunahing infrastructure projects ng Duterte administration. Itinatayo ang proyekto sa Bgy. Limao sa Island Garden City ng Samal, at Bgys. Vicente Hizon, Sr. Angliongto at R. Castillo sa Davao City.

Ang proyekto, na pinondohan mula sa utang mula sa China, ay iginawad sa China Road and Bridge Corporation, isang state-owned construction company.

9 kalsada, sarado pa rin dahil kay ‘Karding’ — DPWH

ni Lolet Abania | September 26, 2022

Siyam na mga lansangan sa Luzon ang nananatiling sarado sa trapiko kasunod ng paghagupit ng Super Bagyong Karding, ayon sa Department of Public Works and Highways (DPWH) ngayong Lunes.

Sa isang advisory, sinabi ng DPWH na 4 na kalsada sa Central Luzon, 2 sa Cagayan Valley, at tig-1 sa Cordillera Administrative Region at CALABARZON ang hindi pa maaaring daanan, para na rin sa kanilang kaligtasan, dahil ito sa na-damage na pavement, mga pagguho ng lupa o landslides, pagbaha at pagbagsak ng electrical post sanhi ng super bagyo.

Ang mga apektadong kalsada ay ang mga sumusunod:

* Kennon Road (sarado sa mga hindi residente ng lugar)

* Manila North Road sa Sitio Banquero, Barangay Pancian, Pagudpud, Ilocos Norte

* Bambang-Kasibu-Solano Road, Antutot Section sa Nueva Vizcaya

* NRJ - Villa Sur San Pedro- Cabuaan- Ysmael- Disimungal Road, San Pedro Overflow Bridge sa San Pedro, Madella, Quirino

* Nueva Ecija-Aurora Road sa Aurora province

* Daang Maharlika Road sa Barangay Castellano, San Leonardo, Nueva Ecija

* Tarlac-Sta. Rosa Road sa Barangay Malabon Kaingin, Jaen, Nueva Ecija

* Concepcion - Lapaz road sa Tarlac

* Ternate - Nasugbu Road sa Cavite

Ayon din sa DPWH, tatlong kalsada sa rehiyon ang limitado naman ang accessibility nito. Kabilang dito ang Apalit-Macabebe-Masantol Road sa Macabebe, Pampanga; Olangapo- Bugallon Road, sections sa Sindol, San Felipe at San Rafael, Cabanang, Zambales; at Rizal Boundary-Famy-Quezon Boundary Road sa Laguna.

Una nang nag-deploy ang DPWH ng quick response teams sa mga typhoon-stricken areas upang ma-monitor nila ang galaw at sitwasyon, at suportahan ang relief operations ng gobyerno sa pagsasagawa ng mga clearing operations.