DPWH, buwagin, magtayo ng bago — Sen. Gatchalian

by Info @News | October 11, 2025

File Photo: Win Gatchalian

Iginiit ni Senator Win Gatchalian na mas mabuti kung bubuwagin na lang at magtayo ng bagong Department of Public Works and Highways (DPWH) dahil sa tindi ng korupsiyon sa kagawaran.

Aniya, talagang mahihirapan at matatagalan si DPWH Secretary Vince Dizon na linisin ang ahensya.

“Ang aking philsopshy sa management, darating kasi sa punto na kung hindi mo maayos iyan gumawa ka na lang ng bago. I think it will take years and years for Secretary Vince to clean up,” ani Gatchalian.

Basurang plastic bottles, gagamitin sa kalsada — DPWH

ni Mai Ancheta @News | May 20, 2025

File Photo: Department of Public Works and Highways

May pakinabang sa basura partikular ang plastic bottles dahil hindi na lamang ito ibebenta para magkapera kundi maging sangkap sa paggawa ng mga kalsada.

Inaprubahan ng Department of Public Works and Highways (DPWH) ang paggamit ng mga basurang plastic bottle bilang dagdag-sangkap upang mas matatag at matibay ang buhay ng mga aspaltong inilalagay sa mga pangunahing lansangan.

Ayon sa DPWH, ang sangkap ng plastic waste ay bahagi na ng kanilang standard specification para sa mga ginagawang kalsada, tulay at maging sa mga ginagawa sa paliparan.

Ang plastic bottles ay ikinukonsiderang polyethylene terephthalate na maaaring sangkap sa paggawa ng mga kalsada.

Sinabi ng ahensya na bahagi ito ng inobasyon sa konstruksyon kung saan ang mga ganitong basura ay malaking bagay para sa paggawa ng mas maraming kalsada sa mga darating na araw.

Mga flyover, kinukumpuni na bilang paghahanda sa ‘The Big One’

ni Ryan Sison @Boses | April 24, 2024

Bilang antisipasyon sa isang malakas na lindol na tinaguriang “The Big One”, sinuri para patibayin ang ilang mga flyover sa Metro Manila ng Department of Public Works and Highways (DPWH).

Ayon kay DPWH Secretary Manuel Bonoan, kailangan na ang pagsasaayos o retrofitting ng EDSA-Kamuning flyover at mga katulad na istruktura sakaling magkaroon ng tinatawag na massive earthquake.

Sa isang panayam kay Bonoan, binigyang-diin niya na kailangan nilang gawin ito kaagad, at matagal na rin nila itong pinaplano. Mas mabuti aniyang maagap na naghahanda lalo na kapag pinag-uusapan ang “The Big One” para maging structurally fit ang mga flyover sa kahabaan ng EDSA.

Gayundin aniya, sinasamantala na ng DPWH ang “magandang construction weather” bago pa magsimula ang tag-ulan.

Nauna nang sinabi ng mga state seismologist, na ang Marikina West Valley fault line, isa sa mga active fault sa bansa, ay handa na para sa movement nito dahil anila, hindi ito gumagalaw sa loob ng 200 taon. Nagbabala naman si Philippine Institute of Volcanology and Seismology (Phivolcs) Director Teresito Bacolcol na sa magnitude 7.2 lindol sa Metro Manila, posibleng mag-iwan ng hindi bababa sa 34,000 ang mamatay at 114,000 sugatan sakaling mangyari ang sinasabing “The Big One”.

Ang retrofitting ng EDSA-Kamuning flyover ay nakatakdang simulan sa April 25, 2024 at tatagal ito hanggang October.

Paliwanag ng DPWH chief, ang mangyayari rito ay redecking. Papalitan ang mga konkreto sa taas, lane by lane, ang deck na mismong dinaraanan ng mga sasakyan.

Kukumpunuhin din nila at patitibayin ang mga girder sa ibaba.

Ang susunod sa pipeline ay ang pagsasaayos ng Guadalupe Bridge, na gagawin sa tulong at financial assistance mula sa Japanese government.

Kakailanganin din ng kagawaran na palitan ang expansion joints ng Magallanes Flyover, na maaaring gawin nila sa loob ng isang buwan.

Tinatapos na rin ng DPWH-NCR ang pag-curing ng EDSA-Pasay flyover habang bubuksan ang lahat ng lane ngayong Miyerkules, April 24.

Mainam ang ginagawa ng kinauukulan na paghahanda sa napakalakas na lindol na posibleng tumama sa ating bansa.

Hindi kasi biro ang bilang na maaaring mamatay at masugatan na sa isang iglap lamang mangyayari.

Marahil, tayo mismo ay dapat na maging handa sa ganitong panahon, kailangan nating i-check ang ating mga tirahan kung matibay at kakayanin pa rin ba nitong nakatayo sakali mang tumama na ang ‘The Big One’. 

Hiling lang natin sa pamahalaan na bukod sa pagkukumpuni ng mga flyover ay inspeksyunan na rin sana ang mga matataas na gusali, istruktura, mga kalsada at iba pang katulad nito para maisaayos agad at hindi lumala ang magiging pinsala. Gayundin, tiyakin natin ang suplay ng ating pagkain o food security para alam natin ang gagawin at mabilis na marespondehan ang mga apektadong mamamayan. Dapat din sigurong simulan nang makiisa ng lahat ng ahensya ng gobyerno upang planuhin at paghandaan na ito ngayon nang husto.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com