Hindi pa umano siya target... Trump, pinalalakas ang kampanya kontra-ICC

ni Justine Berganio @World News | August 2, 2026

Photo: File

Nagbiro si US President Donald Trump na hindi pa siya target ng International Criminal Court (ICC), ngunit sinabi niyang posible itong mangyari sa hinaharap habang pinalalakas ng kanyang administrasyon ang kampanya laban sa international tribunal.

Sa isinagawang cabinet meeting sa Camp David nitong Biyernes, sinabi ni Trump na wala siyang impormasyon na hinahabol siya ng ICC, ngunit pabirong inamin na hindi niya isinasantabi ang posibilidad. Natawa naman ang mga miyembro ng kanyang gabinete sa naging pahayag.

Inihayag ito ni Trump habang nagsasalita si US Secretary of State Marco Rubio, na muling iginiit ang matinding pagtutol ng Estados Unidos sa ICC. Ayon kay Trump, hindi ang kanyang sarili ang ipinagtatanggol ng Amerika kundi si Israeli Prime Minister Benjamin Netanyahu at iba pang lider na nahaharap sa imbestigasyon ng korte.

Noong Nobyembre 2024, naglabas ang ICC ng arrest warrant laban kay Netanyahu kaugnay ng digmaan sa Gaza at mga alegasyon ng war crimes. Hindi kabilang ang Estados Unidos at Israel sa mga bansang lumagda sa Rome Statute, ang kasunduang lumikha sa ICC.

Samantala, sinabi ni Rubio na nagpapatuloy ang kampanya ng Trump administration upang hikayatin ang iba’t ibang bansa na kumalas sa ICC. Ayon sa kanya, limang bansa na ang nagpahayag ng planong umalis sa tribunal, kabilang ang Chad at Venezuela.

Iginiit din ni Rubio na itinuturing ng Estados Unidos ang ICC bilang isang “illegitimate international organization,” dahilan upang ipagpatuloy ng administrasyon ang panawagang i-boycott ang nasabing korte.

US-Iran war, tapos na — Trump... Strait of Hormuz, bubuksan na

ni Jenny Rose Albason @World News | June 18, 2026

Inanunsyo ni US President Donald Trump na ganap nang bubuksan sa Biyernes, Hunyo 19, ang Strait of Hormuz, isang mahalagang ruta para sa pandaigdigang kalakalan ng langis.

Ito ay matapos magkasundo ang Estados Unidos at Iran na wakasan ang digmaan sa Middle East, isang malaking hakbang tungo sa pagtatapos ng ilang buwang labanan at kaguluhang pang-ekonomiya sa rehiyon.

Ayon kay Trump, muli nang papayagang dumaan ang mga barko sa Strait of Hormuz at maghatid ng mga kargamentong langis sa iba't ibang bansa.

Sinabi rin ng US President na hindi niya inaasahang mangangailangan ng malaking pagsisikap upang muling mabuksan ang naturang lagusan.

Nitong Lunes, iniulat ng Iranian media na tatlong oil tanker at dalawang cargo ship na ang nakadaan sa lugar na dating isinailalim sa US naval blockade.

Samantala, nakatakdang lagdaan sa Biyernes sa Switzerland ang kasunduang pangkapayapaan sa pagitan ng Estados Unidos at Iran, sa pamamagitan ng Pakistan bilang tagapamagitan.

---

172 DRONE IBINAGSAK SA RUSSIA, OIL DEPOT, NASUNOG

NAGDULOT ng sunog sa isang oil depot sa timog na rehiyon ng Krasnodar sa Russia ang mga bumagsak na bahagi ng drone.

Dahil dito, isinara rin ang isang lokal na kalsada na nag-uugnay sa lugar patungo sa Crimean Peninsula.

Ayon sa mga opisyal, walang naiulat na nasawi o nasugatan sa insidente sa oil depot sa Poltavskaya, Krasnodar.

Isinara rin ng mga otoridad ang isang kalsadang konektado sa rutang patungo sa tulay sa Kerch Strait, na nagsisilbing mahalagang daanan ng mga suplay papunta sa Crimea.

Noong Lunes, tinamaan ng Ukraine ang dalawang tulay na nag-uugnay sa bahagi ng Kherson region na kontrolado ng Russia at sa Crimea. Pinaigting din ng Ukraine ang mga pag-atake sa mga rutang ginagamit sa paghahatid ng suplay sa tangway.

Sa Krasnodar, nagdulot ng pangamba sa kakulangan ng gasolina ang pagkaantala sa distribusyon ng suplay, dahilan upang magmadaling bumili at mag-imbak ng gasolina ang ilang residente.

Samantala, patuloy ang pag-apula ng sunog sa isang fuel depot sa lungsod ng Rybinsk sa Yaroslavl region matapos itong tamaan ng drone attack noong Linggo.

Ayon sa mga otoridad, karaniwang uling lamang ang mga nalalabing materyal mula sa sunog at hindi ito mapanganib sa agrikultura. Naglagay rin ng mga harang sa Rybinsk Reservoir upang maiwasan ang kontaminasyon ng tubig.

Sa magdamag na operasyon, iniulat ng Russia na nakapagpabagsak ito ng 172 drone na pinaniniwalaang mula sa Ukraine.

---

Guilty sa kasong rape, pang-aabuso, atbp.

STEPSON NG NORWEGIAN PRINCE, 4 YRS. KULONG

HINATULAN ng Oslo District Court si Marius Borg Høiby, stepson ni Crown Prince Haakon ng Norway, ng apat na taong pagkakakulong matapos mapatunayang guilty sa mga kasong rape, domestic violence, at iba pang krimen.

Sa desisyong inilabas nitong Lunes matapos ang pitong linggong paglilitis, napatunayang guilty si Høiby sa 34 sa 40 kasong isinampa laban sa kanya, kabilang ang dalawang kaso ng rape at ilang insidente ng pananakit sa dating kasintahan.

Isa sa mga kaso ng rape ay umano'y naganap sa basement ng tirahan ng Crown Prince.

Ayon sa korte, hindi nakapagsalita o nakapanlaban ang isa sa mga biktima dahil sa kanyang kalagayan nang maganap ang insidente.

Bukod sa rape at pananakit, napatunayang guilty rin si Høiby sa pagmamay-ari at pamamahagi ng ilegal na droga, paglabag sa restraining orders, at iba pang kaugnay na kaso. Gayunman, naabsuwelto siya sa dalawa pang kasong rape.

Sa paglilitis, iniharap ang iba't ibang ebidensya, kabilang ang electronic messages, video recordings, at mga testimonya na nag-uugnay sa kanya sa paggamit ng droga at marahas na pag-uugali.

Balak naman ng kampo ni Høiby na iapela ang desisyon ng korte.

Ayon sa prosekusyon, ipinakikita ng kaso na walang sinuman, anuman ang katayuan sa lipunan, ang nakahihigit sa batas.

Hindi na nagbigay ng pahayag ang Norwegian royal household at sinabing nasa kamay na ng korte ang usapin.

Bagama't wala siyang opisyal na titulo o tungkulin sa royal family, nagdulot ang kaso ng malaking kontrobersiya sa Norway at nakaapekto sa imahe ng maharlikang pamilya.

Proposal ng Iran, ibinasura ni Trump

ni Jenny Rose Albason @World News | May 13, 2026

Nagpadala ang Iran ng panukala sa Estados Unidos sa pamamagitan ng tagapamagitan na Pakistan, na layong wakasan ang umiinit na tensyon at mga kaguluhan sa iba’t ibang bahagi ng Middle East.

Sa nasabing proposal, iginiit ng Iran ang pagtanggal ng sanctions ng US Office of Foreign Assets Control (OFAC) sa pagbebenta ng Iranian oil sa loob ng 30 araw, gayundin ang pagwawakas ng naval blockade ng Amerika sa kanilang mga daungan.

Ayon sa mga ulat, kasama rin sa hiling ng Iran ang pagbigay ng kontrol sa Strait of Hormuz, sakaling matupad ng Estados Unidos ang ilang hindi ispesipikong kondisyon.

Gayunman, mariing tinanggihan ni US President Donald Trump ang naturang counter proposal sa pamamagitan ng kanyang Truth Social platform, at tinawag itong “totally unacceptable.”

Nagbabala rin ang Iran na hindi ito magpapaatras sa anumang posibleng ganting aksyon mula sa Estados Unidos, at tutol din ito sa pagpasok ng mas maraming foreign warships sa Strait of Hormuz.

Sa hiwalay na pahayag, binigyang-diin ni Iranian President Masoud Pezeshkian na hindi sila magpapasupil sa anumang kalaban, at ang pakikipag-usap o negosasyon ay hindi dapat ituring na pagsuko o pag-atras.