Desisyon, ilalabas sa Hulyo — DOLE... P1,200 minimum wage sa NCR

ni Mylene Alfonso @News | May 2, 2026

Photo: File / DOLE

Inaasahang ilalabas sa Hulyo ang desisyon kaugnay sa mga petisyong humihiling ng P1,200 na daily minimum wage para sa mga manggagawa sa Metro Manila ayon sa Department of Labor and Employment (DOLE). 

Ayon kay DOLE spokesperson at Assistant Secretary Lennard Serrano, nakatanggap na ang Regional Tripartite Wages and Productivity Board (RTWPB)-National Capital Region (NCR) ng 16 na ganitong petisyon hanggang ngayong linggo. 

Ang pinakahuling petisyon ay inihain noong Miyerkules ng Business Process Outsourcing Industry Employees Network Philippines (BIEN) Philippines. 

Ayon sa opisyal, ang mga petisyon hinggil sa sahod sa NCR ay humihiling din ng exemption mula sa 12-month “uninterrupted” wage cycle, dahil sa epekto sa ekonomiya sa nangyaring sigalot sa Middle East. 

Binigyang-diin niya na natapos na ang wage cycle para sa taong 2025-2026 at kasalukuyan nang naghahanda ang mga regional wage boards para sa cycle ng 2026-2027. 

“Let’s see how they (the NCR wage board) will treat the petition (as being) urgent and based on reasonable grounds,” dagdag pa ni Serrano kung saan isinama ang naturang usapin sa pag-aaral para sa susunod na pag-iisyu ng board na inaasahang ilalabas sa Hulyo 18. 

Samantala, tumaas ang unemployment rate sa Pilipinas sa pagpasok ng taon.

Base sa datos ng Philippine Statistics Authority, umabot sa 5.8% ang unemployment rate. Katumbas ito ng 2.96 million na walang trabaho mula January 2026.

Sa Bicol Region naitala ang pinakamataas na unemployment rate (8.2%).

Marami ang nawalan ng trabaho sa agricultural sector. Dumami naman ang may trabaho sa administrative and support services at public administration and defense.

PUV drivers, pasok sa TUPAD — DOLE

ni Madel Moratillo @News | March 30, 2025

Photo LTFRB

Pinag-aaralan na ng Department of Labor and Employment (DOLE) ang tulong na puwedeng ibigay sa mga drayber ng public utility vehicle (PUV) na apektado ng patuloy na pagsirit ng presyo ng mga produktong petrolyo.

Sabi ni DOLE spokesperson Assistant Secretary Lennard Serrano, partikular na tinitingnan nila ang kanilang TUPAD program o Tulong Panghanapbuhay sa Ating Disadvantaged/Displaced Workers.

Isa itong 90 araw na cash-for-work program ng DOLE sa mga nawalan ng trabaho dahil sa kalamidad o nangyayaring energy emergency.

Ang mga PUV driver aniya ang isa sa pinakaapektado ng napakataas na presyo ng produktong petrolyo.

“Mahalaga ang mga driver especially ngayon. Pero nakikita rin natin na sila talaga ang one of the most affected dahil sa pagtaas ng presyo ng langis kaya tinitingnan natin, anong assistance ang maibibigay through the TUPAD program,” pahayag ni Serrano sa panayam sa radyo.

Nakikipagpulong na aniya sila sa mga ahensya ng gobyerno kung ano ang puwedeng itulong ng kanilang TUPAD program.

Aminado ang opisyal na hindi tatagal ang limanv libong pisong fuel subsidy na ibinigay ng gobyerno sa PUV drivers.

“Tinitingnan natin kung sino pa ang puwedeng makasama rito... Tinitingnan din natin--mga tricycle driver. Maaari pa ba silang makapasok, maging beneficiary sa ating programa?” pahayag pa ni Serrano sa panayam sa radyo.

P20 dagdag-sahod sa Davao, aprub

ni Madel Moratillo @News | February 26, 2025

Photo File

Inaprubahan na ng Regional Tripartite Wages and Productivity Board ang dagdag na 20 hanggang 30 pesos sa arawang sahod ng minimum wage earners sa Davao Region. 

Sa anunsyo ng Department of Labor and Employment (DOLE), ang wage hike ay ipapatupad sa 2 tranche. Ang una ay sa Marso 13 at sa Setyembre 1 naman ang ikalawa. 

Sa oras na maging epektibo, ang daily minimum wage na para sa mga nasa sektor ng agrikultura ay magiging P525 mula sa dating P505 habang mula naman sa P510 ay magiging P540 sa mga nasa non-agriculture sector. Dahil dito, ang buwanang sweldo ay nasa P13,693.75 at P14,085 na. 

Sabi ng DOLE, nasa 66,772 minimum wage earners sa rehiyon ang makikinabang dito. 

Kasabay nito, inaprubahan din ang P500 dagdag sa buwanang sahod ng mga kasambahay para sa nasa chartered cities at first-class municipalities sa Davao Region, at P1,500 naman sa nasa ibang munisipalidad. Dahil dito, magiging P6,500 na ang kanilang buwanang sahod.

Tinatayang nasa 64,111 domestic workers sa rehiyon ang makikinabang dito. 

Exempted naman sa wage hike ang mga negosyong wala pang 10 ang manggagawa at naapektuhan ng kalamidad. Pero dapat mag-aplay muna sila ng exemption sa DOLE hanggang sa Mayo 11.