Kaso ng dengue sa bansa, bumaba ng 27% ngayong taon

by BRT @News | October 9, 2026

Photo: File

Bumaba ng 27 porsiyento ang mga kaso ng dengue sa bansa ngayong taon kumpara sa kaparehong panahon noong 2025, ayon sa Department of Health (DOH).

Batay sa pinakahuling datos ng DOH, umabot sa 180,770 ang naitalang kaso hanggang Setyembre 30, mas mababa sa 246,082 noong nakaraang taon.

Gayunman, patuloy na dumarami ang mga kaso nitong mga nakaraang linggo, kasabay ng tag-ulan.

Nakapagtala ang DOH ng 21,768 kaso mula Setyembre 3 hanggang 16, mas mataas nang tatlong porsiyento kumpara sa 21,158 kaso noong Agosto 20 hanggang Setyembre 2.

Ayon sa ahensya, nananatili namang mas mababa sa alert at epidemic threshold ang mga kaso mula pa sa simula ng taon.

DOH, mino-monitor ang hinihinalang kaso ng pneumonic plague sa Russia

by BRT @News | October 8, 2026

Photo: DOH / FIle

Mino-monitor ng Department of Health (DOH) ang sitwasyon sa Russia kaugnay ng hinihinalang kaso ng pneumonic plague at sinabing handa ang Pilipinas na tumugon kung kinakailangan.

Ayon sa DOH, nakikipag-ugnayan din ito sa mga rekomendasyon ng World Health Organization (WHO).

Sinabi ng ahensya na patuloy na nagsasagawa ng screening ang Bureau of Quarantine (BOQ) sa mga biyahero, kabilang ang pag-check sa travel history at kalagayan ng kanilang kalusugan.

Isinasagawa rin ang surveillance sa mga daga at pulgas na maaaring magdala ng sakit sa mga papasok na kargamento at sasakyang-dagat.

Nauna rito, isang empleyado ng anti-plague institute sa Irkutsk ang namatay dahil sa pneumonia na hindi pa matukoy ang sanhi. Dahil dito, isinailalim sa quarantine ang isang ospital at halos 200 katao sa medical observation.

Bilang ng may leptos sa M. Mla., 562 na

by Sarah Muñoz (OJT) @News | September 6, 2026

Photo: File

Umabot na sa 562 ang bilang ng mga pasyenteng kasalukuyang naka-admit sa mga ospital ng Department of Health (DOH) sa Metro Manila dahil sa leptospirosis.

Ayon sa DOH, batay sa datos hanggang alas-6 ng gabi noong Setyembre 3, nasa 562 pasyente ang ginagamot sa kanilang mga ospital.

May kabuuang 20 DOH hospitals sa Metro Manila na may 602 beds na inilaan para sa mga pasyenteng may leptospirosis.

Dahil mataas ang bilang ng mga nangangailangan ng gamutan, patuloy ang koordinasyon ng DOH sa paglilipat at pagre-refer ng mga pasyente sa mga ospital na mayroon pang sapat at angkop na kapasidad.

Kabilang dito ang mga pasyenteng nangangailangan ng mas mataas na antas ng pangangalaga, gaya ng dialysis.

Samantala, sinabi ng DOH na nakapamahagi na ito ng 1,204,200 capsules ng doxycycline hanggang Setyembre 4 sa mga lugar na nangangailangan ng gamot laban sa leptospirosis.

May nakaimbak din na 2,624,089 capsules ng doxycycline sa mga Centers for Health Development, habang may karagdagang 40,812 capsules sa mga DOH-retained hospitals.

Kasabay nito, muling nagpaalala ang DOH sa publiko na umiwas sa baha, lalo na kung may sugat o galos sa balat, dahil maaaring makuha ang leptospirosis sa kontaminadong tubig.