Pagpalag ng DND sa China, suportado ng iba't ibang grupo

ni Mylene Alfonso @News | June 9, 2025

File Photo: Gibo Teodoro, Jr. / FB

Nagdeklara ng suporta si Chairman Emeritus Dr. Jose Antonio Goitia kasama ang kanyang tatlong grupo ng Makabayang Pilipino sa pagpalag ni Department of National Defense Secretary Gilberto Teodoro sa mga tanong na ibinato ng dalawang mataas na opisyal ng militar ng Tsina, na maituturing umanong pambu-bully sa isinagawang taunang security forum na ginanap sa Shangri-La hotel sa Singapore.

Kasama sa mga sumuporta ang Alyansa ng Bantay Kapayapaan at Demokrasya (ABKD), Filipinos Do Not Yield (FDNY) Movement at Peoples Alliance for Democracy and Reform (PADER) na matagal nang nagpapakita ng kanilang pagtutol sa mga agresibong pag-atake ng Tsina sa Pilipinas na maituturing na paglabag sa kasunduan sa United Nations Convention on the Law of the Sea (UNCLOS) noong Disyembre 10, 1982.

Ayon kay Goitia, ang mga binitiwang tanong ng dalawang opisyal ng Tsina ay isang pakana kay Sec. Teodoro upang magbigay ito ng marahas na tugon sa problema ng maritime dispute sa West Philippine Sea (WPS).

Idinagdag pa na ang kanilang grupo ay sumusuporta sa pahayag ni Sec. Teodoro na bagama't ang Pilipinas ay kabilang sa Association of Southeast Asian Nations (ASEAN) ito ay isang sovereign country na may sariling territorial na integridad at soberanya na may respeto sa United Nations Convention on the Law of the Sea (UNCLOS). 

Samantala, pangungunahan ng PADER ang pagsusulong ng mass actions sa Mendiola at sa harap ng Chinese Embassy sa Makati City habang ang dalawang grupo ng ABKD AT FDNY-Movement ay magra-rally sa harap ng tanggapan ng DND.

Pinas, US, tinalakay ang maritime domain awareness

ni Angela Fernando @News | July 17, 2024

Tinalakay ng 'Pinas kasama ang United States ang tulong sa seguridad, maayos na paggamit sa mga lugar na nasa ilalim ng Enhanced Defense Cooperation Agreement (EDCA), at ang kahalagahan ng maritime domain awareness laban sa mga ilegal at delikadong pagkilos at agresyon.

Nakipagpulong si Gen. Charles Q. Brown, Jr., chairman ng US Joint Chiefs of Staff, kina National Security Advisor Eduardo Año, Defense Sec. Gilberto Teodoro Jr., at Armed Forces Chief Gen. Romeo Brawner Jr. sa Manila.

Sa isang ulat na inilabas nitong Miyerkules, sinabi ng US Joint Chiefs of Staff public affairs office na tinalakay ng mga lider ang patuloy na pagsusumikap na palakasin ang alyansa.

Samantala, nagpalitan din ng kanilang pagsusuri ang apat na opisyal tungkol sa sitwasyon ng seguridad sa rehiyon, kabilang ang mga marahas na insidente sa Ayungin Shoal o West Philippine Sea (WPS).

P-BBM: Pagsasanay ng Scout Rangers, pinaiigting

ni Angela Fernando - Trainee @News | November 25, 2023

Nagpahayag si Pangulong Ferdinand Marcos Jr. ngayong araw na sinusuri ng pamahalaan ang mga pangangailangan ng Scout Rangers regiment upang mabigyan ng mga dapat na kagamitan at suporta.

Itinalaga din ni Marcos ang Department of National Defense (DND) na bantayan ang Scout Rangers upang magkaroon ng bukas na opsyon na makakapagpabuti sa kakayahan at pagiging epektibo ng nasabing unit sa kanilang mga operasyon at makamit ang kanilang mga layunin.

Aniya, sa pagbibigay ng suporta at mga kakailanganin ng Scout Rangers, kasama ang Special Forces Units, mas matutulungan ang Armed Forces sa pagpapalakas ng depensa.

Dagdag nito, mahalagang bigyang prayoridad ang mas maaasahang proteksyon ng 'Pinas.

Saad ng Presidente, habang pinaiigting ang depensa ng bansa, hinaharap din ng pamahalaan ang pambansang suliranin ng pangmatagalang kapayapaan.