National Land Use Act, panangga sa baha, landslide

ni Mylene Alfonso @News | October 5, 2026

Photo: Tukuyang gumuho ang malaking bahagi ng San Mateo-Arayat Pampanga flood control na kasalukuyang naka-kordon para sa gagawing rehabilitasyon. Wala namang nasaktan sa insidente. (Jeff Tumbado)

Iginiit ni Surigao del Norte 1st District Rep. Francisco “Lalo” Matugas ang pangangailangang magkaroon ng komprehensibong National Land Use Act upang maisama ang disaster risk sa pagpapasya kung saan dapat itayo ang mga komunidad at malalaking proyekto.

Ayon kay Matugas, chairman ng House Special Committee on Land Use, muling ipinapakita ng banta ng pagbaha at landslide sa ilang bahagi ng Visayas at Mindanao ang kahalagahan ng maayos na land use planning.

Layunin ng panukalang National Land Use Act na pagtugmain ang paggamit ng lupa sa disaster-risk reduction, environmental protection, agrikultura, pabahay, imprastraktura at economic development.

Binigyang-diin ni Matugas na mananatiling mahalaga ang papel ng mga lokal na pamahalaan sa land use planning, habang magsisilbing gabay ang pambansang polisiya.

Inaprubahan ng House of Representatives ang bersyon nito ng National Land Use Act noong Mayo 5, 2026, habang nakabinbin pa sa Senado ang mga kaukulang panukala.

“Ang disaster resilience ay nagsisimula bago pa man maitayo ang isang kalsada, subdivision o pampublikong pasilidad. Nagsisimula ito sa pagpapasya kung nagtatayo ba tayo sa tamang lugar,” dagdag ni Matugas.

Gen. Trias, Cavite, tinamaan ng buhawi

ni Lolet Abania | May 20, 2022

Isang buhawi ang tumama sa Barangay Buenavista Uno sa General Trias, Cavite nitong Huwebes ng hapon, ayon sa City Disaster Risk Reduction Management Office (CDRRMO).

Ilang residente ng lugar ang kumuha pa ng video, kung saan makikitang nagdilim ang kalangitan habang ang mga yero at dahon ay nililipad nang paikut-ikot ng malakas na hangin na may kasamang ulan. Sumiklab pa anila, ang isang poste ng kuryente matapos na dumikit ang isang yero sa kawad nito.

Gayundin, ayon pa sa mga nakasaksi, sumasayaw ang mga sanga ng puno sa tindi ng lakas ng hangin, habang may biglang lumalagapak umano sa ibaba.

Sa inisyal na record ng CDRRMO, ilang tirahan ang pinsala dahil sa buhawi. Gayundin, may naiulat na nasaktan sanhi ng mga nagliparang bagay.

“Natuklap ‘yung mga bubong, tapos ‘yung mga shanty ay mayroong ilan-ilan na nagiba, at pati ‘yung mga puno ay nabuwal dahil sa lakas nitong buhawi,” pahayag ni Fernando Olimpo, officer-in-charge ng General Trias CDRRMO.

Ayon kay Olimpo, bumuhos muna ang malakas na ulan sa kanilang lugar nitong Huwebes ng hapon bago tuluyang nabuo ang buhawi.

“Doon nagsimula sa Barangay Buenavista Uno, then nag-cross siya ng ilog tapos dumiretso sa Barangay Santiago,” saad ni Olimpo. Inaalam na rin ng mga awtoridad ang mga napinsalang kabahayan sa lugar.

5 patay, 60 bahay nasira sa tornado sa Alabama

ni Ronalyn Seminiano Reonico | March 27, 2021

Aabot sa limang katao ang namatay matapos tumama ang matinding tornado sa northern Alabama noong Huwebes at bukod sa marami ang sugatan, marami ring kabahayan ang nasira.

Ang limang nasawi ay mula sa Ohatchee town, ayon sa Calhoun County Emergency Management Agency.

Ayon kay Calhoun County Coroner Pat Brown, 3 sa limang pumanaw ang magkakamag-anak matapos tamaan ng tornado ang kanilang bahay.

Sa Pelham, Alabama naman, 60 miles southwest ng Ohatchee, ayon kay Fire Chief Mike Reid, tinatayang aabot sa 60 kabahayan ang nasira at wala namang naiulat na pumanaw o sugatan sa insidente.

Samantala, patuloy pa rin ang pag-aayos ng awtoridad sa mga apektadong lugar dahil sa insidente.