Huwag sisihin sa “bill shock”... 4Ps, walang appliances — DSWD Sec. Gatchalian

ni Mylene Alfonso @News | May 8, 2026

Photo: File / Rex Gatchalian - FB

Ipinagtanggol ni Social Welfare Secretary Rex Gatchalian ang mga benepisyaryo ng Pantawid Pamilyang Pilipino Program (4Ps) na nadadamay sa isyu ng pagtaas ng singil sa kuryente ng Manila Electric Company (Meralco). 

Giit ni Gatchalian, “fake news” ang pahayag na 4Ps ang dahilan ng mataas na bill noong Abril. 

“Hindi 4Ps ang rason kung bakit lumaki ang pagsingil noong April. ‘Yung bill shock na ‘yun nanggaling sa sarili nilang generation. Tumaas ang generation expense nila,” ani Gatchalian. 

Paliwanag pa niya, maliit lamang ang konsumo ng kuryente ng 4Ps households kumpara sa mga residential at commercial users. 

“‘Pag sinumatotal mo lahat, ang average n’yan, wala pang kalahati ng sentimo ang napupunta sa lifeline rate, P0.40 centavos. Ibig sabihin wala pang kalahati sa isang sentimo…Kasi nga ang 4Ps halos wala namang appliances sa bahay… To the most isang electric fan at ilang bumbilya. So hindi sila ang rason kung bakit sumipa ng ganu’n kalaki,” dagdag niya. 

Batay sa datos, nasa 135,411 lamang na 4Ps households ang kasali sa Lifeline Rate Subsidy Program, kumpara sa 8.11 milyong customers ng Meralco na binubuo ng residential, business, at industrial users. 

Sa usapin naman ng panukalang pagrebisa sa Expanded Lifeline Rate Law, bukas ang DSWD sa pagbabago basta’t hindi ipapasa sa consumers ang dagdag gastos.

P5.65B ayuda, naipamigay na sa jeepney drivers — DSWD

ni BRT @News | April 27, 2026

Umabot na sa mahigit P5.65 bilyon ang kabuuang halaga ng naipamahaging cash assistance sa mga jeepney driver.

Ayon sa Department of Social Welfare and Development (DSWD), alinsunod ito sa direktiba ni Pangulong Ferdinand Marcos, Jr., na tiyaking maiparating sa bawat transport driver ang P5,000 cash ayuda.

Kaugnay nito, as of April 25, nasa 1,130,333 PUJ drivers na umano ang nakatanggap ng tulong-pinansyal mula sa mga payout na isinagawa nitong mga nakaraang araw nationwide.

Rider, patay sa pila ng P5K ayuda

ni Jeff Tumbado @News | April 20, 2026

Nasawi ang isang motorcycle taxi rider habang nakapila para kumuha ng ayuda o cash assistance ng gobyerno sa Quezon Memorial Circle, sa Quezon City nitong Sabado.

Nabatid kay Department of Social Welfare and Development (DSWD) Secretary Rex Gatchalian na nakipag-ugnayan na ang mga tauhan ng ahensya sa pamilya ng biktima.

Dagdag pa ni Gatchalian na nakausap na nila ang anak ng nasawi at tiniyak na tutulungan ang pamilya sa maayos na pagpapalibing.

Sasagutin din ng DSWD ang iba pang pangangailangan ng pamilya, kabilang ang gastusin sa ospital, burol at libing, transportasyon ng mga kaanak mula probinsya, at maging ang patuloy na pag-aaral ng anak ng rider.

Personal ding binisita ni Gatchalian ang pamilya sa ospital kahapon ng umaga at tiniyak ang tulong ng pamahalaan.

Matatandaang dagsa ang mga motorcycle taxi at delivery riders na pumila sa Quezon Memorial Circle upang tumanggap ng tig-P5,000 cash relief mula sa DSWD, na ipinamamahagi bilang tulong sa gitna ng pagtaas ng presyo ng langis dulot ng giyera ng US-Israel at Iran.

Makikitang mahaba ang pila ng mga rider sa paligid ng Circle, habang ang ilan ay gumagamit ng karton upang pansangga sa matinding init ng araw.

Hinikayat naman ng DSWD ang mga benepisyaryo na personal na magtungo upang kunin ang ayuda, ngunit sinabi rin ng ahensya na planong ilipat sa digital system ang distribusyon ng tulong sa hinaharap upang maiwasan ang ganitong insidente.