Kaso ng Nipah virus, wala pa sa 'Pinas — DOH

by Info @News | February 1, 2026

Photo: File

Tiniyak ng Department of Health (DOH) sa publiko na wala pang records ng Nipah virus sa bansa at mahigpit nila itong binabantayan habang patuloy sila sa paghahanda rito.

Sa isang panayam ngayong Linggo, Pebrero 1, sinabi ni DOH Assistant Secretary Albert Domingo na ang Pilipinas ay kabilang sa mga bansa tulad ng Thailand at Taiwan na nagsusumikap na mapigilan ang naturang virus na makapasok sa mga hangganan nito.

Ayon kay Domingo, “For the record, wala tayong namo-monitor or nakikita na may sintomas o history ng exposure... Ang India ang nagsabi, na ang kumpirmado lang nila ay dalawang kaso... Ang kanilang contact tracing at isolation ay nakaabot na ng halos 200 kung saan lahat ay nag-test ng negative... Sa pananaw ng India, contained na ito.”

“Isa ‘yang zoonotic [virus]. Isang sakit na nagmumula sa hayop. Ito ay nakukuha lamang kung lalapit sa isang may sakit na paniki o fruit bat... o kung kumakain ng karne na hindi luto, nang hindi sigurado kung saan galing,” paliwanag ni Domingo.

Sinabi rin niya na, “'Yung mga sintomas ay pangkaraniwan. Puwede kang magkaroon ng lagnat, magkaroon ng pananakit ng katawan, sipon. Para siyang mala-trangkasong sakit at its mild side... Kung ito ay naging malala – ‘yung pamamaga ng utak.”

“Ito ba ay makakalipat sa ibang bansa, ‘yan ang pinaghahandaan natin ngayon,” dagdag pa niya

200 kaso ng tuberculosis, naitala sa South Cotabato

ni Lolet Abania | June 2, 2022

Nasa tinatayang 200 kaso ng tuberculosis (TB) ang nai-record ng mga health officials sa lalawigan ng South Cotabato.

Ayon kay John Codilla ng integrated health office ng probinsiya, ang mga kasong ito ay na-detect matapos na magsagawa sila ng active case finding sa lugar.

“Ang direction kasi ng Department of Health is hanapin lahat ‘yung ating mga pasyenteng nagkaroon po ng tuberculosis,” ani Codilla.

“So sa first quarter po ‘yan. ‘Yung 200 po na nai-declare or nai-report po natin nu’ng, ngayong buwan lang po ‘yan, ay gawa po ng ating active case finding o pagbibigay po ng mga libreng x-ray doon sa ating mga geographically isolated and depressed areas,” sabi ni Codilla.

Sa ngayon aniya, nagbibigay sila ng libreng gamut sa mga bagong natukoy na tuberculosis patients.

“Libre po ‘yan na binibigay. ‘Yung lahat po ng ating munisipyo ay meron ng TB-DOTS facility, na may kakayahan din po na mag-detect ng iba’t ibang klaseng tuberculosis, hindi lang po doon sa baga kundi sa iba-ibang bahagi rin po ng kanilang mga katawan,”

pahayag ng opisyal.

Gayunman, sinabi ni Codilla na nahaharap sila sa problema kaugnay sa supply ng ilang mga medisina.

Ayon kay ni Codilla, may pondo ang provincial government para bumili ng mga gamot, subalit kailangan nila ng tulong ng national government para makuha ang mga ito ng probinsiya.

“Isa din natin hinihingi ‘no sa Department of Health sa central office, na kung pwede din natin matulungan din kami sa pagbaba din po ng supply galing diyan po sa Maynila,” paliwanag pa niya.

Matapos ang outbreak sa Zamboanga City.. 4 rehiyon, tumaas ang dengue cases — DOH

ni Lolet Abania | April 12, 2022

Ipinahayag ng Department of Health (DOH) ngayong Martes na nakitaan nila ng pagtataas ng dengue cases sa Zamboanga Peninsula, Cagayan Valley, Western Visayas, at Davao Region matapos ang deklarasyon ng isang dengue outbreak sa Zamboanga City.

Sa isang media briefing, ipinaliwanag ni DOH Undersecretary Maria Rosario Vergeire na sa kabila na pagtaas ng dengue cases kamakailan sa bansa, ang lingguhang nai-report na kaso nito sa kabuuang ngayong taon aniya ay “still significantly lower” kumpara sa mga kaso na nai-record noong 2021.

“Sa ngayon, kapag tiningnan natin ang breakdown among different regions, doon natin nakikita ‘yung pagtaas. Aside from Zamboanga or Region 9, meron din tayong nakikitang pagtaas ng mga kaso ng dengue sa Region 2, sa Region 6, at saka Region 11,” sabi ni Vergeire.

Ipinunto rin ng opisyal na ang mga kaso lamang sa Zamboanga City ang nag-exceed sa naitalang epidemic nito, kung kaya ideklara ang isang dengue outbreak sa lugar.

Ayon sa local na gobyerno, ang mga kaso ng dengue sa Zamboanga City ay umabot na sa 893, kabilang na 11 nasawi, mula Enero 1 hanggang Abril 2. Anila, 85 dengue cases ang nai-record sa morbidity sa week 13, kung saan 963% mas mataas sa parehong panahon noong 2021.

“The most probable cause for this rise in cases would be nag-uulan na po. So, kailangan lang talaga ng masusing linisin ang mga backyard natin, ang ating mga tahanan, ang ating mga pwesto sa komunidad, public spaces para mawala ang pinagbabahayan ng Aedes aegypti o ‘yung lamok na nakakapag-cause ng dengue,” saad ni Vergeire.

Nitong Lunes, ang DOH ay nakipag-ugnayan na sa regional health at government offices sa Zamboanga City habang nagtakda na rin ng mga preventive measures upang labanan ang naturang sakit.