P20 dagdag-sahod sa Davao, aprub

ni Madel Moratillo @News | February 26, 2025

Photo File

Inaprubahan na ng Regional Tripartite Wages and Productivity Board ang dagdag na 20 hanggang 30 pesos sa arawang sahod ng minimum wage earners sa Davao Region. 

Sa anunsyo ng Department of Labor and Employment (DOLE), ang wage hike ay ipapatupad sa 2 tranche. Ang una ay sa Marso 13 at sa Setyembre 1 naman ang ikalawa. 

Sa oras na maging epektibo, ang daily minimum wage na para sa mga nasa sektor ng agrikultura ay magiging P525 mula sa dating P505 habang mula naman sa P510 ay magiging P540 sa mga nasa non-agriculture sector. Dahil dito, ang buwanang sweldo ay nasa P13,693.75 at P14,085 na. 

Sabi ng DOLE, nasa 66,772 minimum wage earners sa rehiyon ang makikinabang dito. 

Kasabay nito, inaprubahan din ang P500 dagdag sa buwanang sahod ng mga kasambahay para sa nasa chartered cities at first-class municipalities sa Davao Region, at P1,500 naman sa nasa ibang munisipalidad. Dahil dito, magiging P6,500 na ang kanilang buwanang sahod.

Tinatayang nasa 64,111 domestic workers sa rehiyon ang makikinabang dito. 

Exempted naman sa wage hike ang mga negosyong wala pang 10 ang manggagawa at naapektuhan ng kalamidad. Pero dapat mag-aplay muna sila ng exemption sa DOLE hanggang sa Mayo 11.

Patay sa gumuhong tulay sa Davao, 5 na

ni Jeff Tumbado @News | July 27, 2023

Umabot sa limang construction worker ang nasawi makaraang mabagsakan ng makapal na steel bridge habang nagkukumpuni ang mga ito sa Davao City.

Nakilala ang mga biktima na sina Rolando Abing, Jay Bangonan, Jimboy Liga, Cris Napao at Elmer Samson, na pawang binawian ng buhay habang isinusugod sa iba't ibang ospital ng lungsod.

Bukod sa mga nasawi, dalawa pa sa kanilang kasamahan ang malubhang nasugatan na tinukoy na sina Meljay Pero at Jonathan Dispo.

Nabatid kay Police Captain Hazel Tuazon, nagkakabit ng side panel ng tulay sa Bgy. Malamba, Marilog District ang mga biktima nang biglang bumagsak ang nasa 43 metro haba na steel bridge.

Tatlo pang manggagawa ang nakaligtas nang makaalis agad sa tulay bago ito bumagsak.

Sinasabing gumagamit umano ng boom truck ang mga biktima na nasa gitna ng tulay nang mangyari ang trahedya.

Inaalam pa ng mga awtoridad kung ano ang naging sanhi sa pagbigay ng tulay.

Napag-alaman na nasa 70 percent na tapos ang tulay na magiging kapalit sana sa hanging bridge na tatlong dekada na umanong ginagamit ng mga residente sa lugar.

Nangako umano ang contractor na sasagutin ang gastusin sa mga manggagawang nasawi at maging sa mga nasugatan.

Gun ban sa NCR at Davao City para sa inagurasyon nina P-BBM at VP Sara — PNP

ni Lolet Abania | June 15, 2022

Magpapatupad ng gun ban ang Philippine National Police (PNP) para sa magkahiwalay na inauguration rites nina President-elect Ferdinand “Bongbong” Marcos, Jr. sa Manila at Vice President-elect Sara Duterte sa Davao City.

Ayon kay PNP Director for Operations, Police Major General Valeriano de Leon, ang gun ban sa Davao Region ay magiging epektibo mula Hunyo 16 hanggang 21 para sa inaugural ceremony ni VP Sara sa Hunyo 19 habang sa Hunyo 27 hanggang Hulyo 2 sa Metro Manila para sa oathtaking ni P-BBM na nakatakda sa Hunyo 30.

“That [gun ban] is three days before [the event] and two days [after the event] because we have clearing areas... if ever there is an incident that warrants investigation,” pahayag ni De Leon sa isang press conference ngayong Miyerkules.

Ang June 19 event ay magaganap sa San Pedro Square sa Davao City, habang ang June 30 ceremony ay isasagawa sa National Museum sa Manila.

“The suspension (gun ban) covers the period of full preparations, deployment and implementation of the security measures for the oath-taking events of the two highest ranking officials of the country,” giit ni De Leon.

“That was our recommendation that was approved (by PNP officer in charge Police Lieutenant General Vicente Danao Jr.),” dagdag ng opisyal. Nang tanungin siya, kung ang gun ban ay senyales ng anumang nai-report na threat o banta kaugnay sa magaganap na mga inagurasyon, saad ni De Leon, mas makabubuting manatiling mapagbantay.

“We are validating raw information. We do not discount any information that reaches our office. We quickly send them to Directorate of Intelligence for validation,” sabi ni De Leon. “Be that as it may, we are ready for anything,” aniya.

Ayon pa kay De Leon, nasa tinatayang 3,700 pulis ang itatalaga sa seguridad ng oathtaking ni VP Sara habang humigit-kumulang sa 6,000 ang ide-deploy para sa oathtaking ni P-BBM.