Aneurysm, ikinamatay ni Dacera — PNP

ni Lolet Abania | January 27, 2021

Inilabas na ng Philippine National Police Crime Laboratory ngayong Miyerkules ang resulta ng kanilang findings sa pagkamatay ng flight attendant na si Christine Dacera at ito ay ‘natural causes’.

Nitong Enero 11, lumabas ang isang medico legal report mula sa PNP crime lab subalit ngayon lamang Miyerkules naisumite sa isang Makati prosecutor na sinasabing si Dacera ay namatay dahil sa isang ruptured aortic aneurysm na nag-trigger sa pagtaas ng kanyang blood pressure.

"Manner of death as homicide is ruled out in Dacera's case because the aortic aneurysm is considered a medical condition. Rape and/or drug overdose will not result to the development of aneurysms," nakasaad sa report ng PNP.

"Even overdose and ruptured aneurysm are two different conditions and cannot be both included as cause of death of patient," ayon sa report.

Isinumite ng PNP ang report ngayong araw sa Makati prosecutor na nag-iimbestiga sa reklamong rape with homicide laban sa mga companion ni Dacera bago pa ito namatay.

Matatandaang si Dacera ay namatay noong Enero 1 matapos ang New Year's Eve celebration kasama ang kanyang mga kaibigan.

Naniniwala ang kanyang pamilya na siya ay dinroga at sexually abused subali't itinanggi ito ng mga nakasama at sinasabing hindi nila ito sinaktan.

Ayon pa sa medico legal report, ang "dilatation or aneurysm" sa aorta ni Dacera ay tinawag na "chronic condition that started long time ago or maybe years prior to her death."

"No alcohol or recreational taken the night prior to her death will cause that kind of dilatation or defect on her aorta," nakasaad sa report.

"If she did not die that fateful night, she will still die in any scenario that presents an activity that will increase her blood pressure strong enough to tear that aneurysm."

Sakaling may droga o alcohol na ma-detect sa katawan ni Dacera, ayon sa report, ito ay maituturing na "incidental finding because even by their absence, rupture can occur if blood pressure shoots up from different strenuous physical activities."

"Vomiting or retching may also increase blood pressure and trigger the ruptured aneurysm," dagdag pa ng report.

Ang enlargement o paglaki ng puso ni Dacera, sabi pa ng report ay maaaring dahil sa kanyang chronic hypertension.

Gayunman, ang preliminary investigation ng Makati prosecutor ang siyang magdedetermina kung ang kaso ay dadalhin sa korte na ipagpapatuloy sa Pebrero 3.

4 suspek sa Dacera rape-slay, todo-tanggi... "Bakla kaming lahat"

ni Ronalyn Seminiano Reonico | January 8, 2021

Iginiit ng apat sa 11 na itinuturong suspek sa diumano’y panggagahasa at pagpatay sa flight attendant na si Christine Dacera noong Bagong Taon sa isang hotel sa Makati na walang naganap na foul play sa insidente.

Humarap kahapon sa media sina Rommel Galido, John Pascual dela Serna III, Valentine Rosales at Clark Rapinan kasama ang kanilang abogado na si Mike Santiago upang sagutin ang mga akusasyong pananamantala diumano kay Dacera.

Pahayag ni Rosales, “It’s impossible that we raped her because we[‘re] all gay. There is no straight man in that party.” Ayon sa apat, natural causes ang ikinamatay ni Dacera katulad ng naitala sa medico-legal kung saan makikitang aneurysm ang dahilan nito.

Kuwento ni Rosales, late na siyang dumating sa year-end party at nakita niya si Dacera at iba pang roommates nito sa Room 2209 kasama sina Galido, Dela Serna at Rapinan.

Aniya, “She was holding a wine glass, while the others were already tipsy.” Ayon naman kay Galido na flight attendant din at kaibigan ni Dacera, lumipat sila sa Room 2207 matapos imbitahan ng “common friend” nila upang makipagkilala sa iba pang mga kaibigan nito.

Kuwento rin ni Galido, sinabihan siya ni Dacera na nag-iba ang pakiramdam niya at hinala nito, “Someone put something in my drink.” Ilang oras ang nakalipas, ayon kay Rapinan ay nakita niyang nasa harap ng toilet bowl si Dacera at nagsusuka kaya binigyan niya ito umano ng bath robe.

Bandang alas-8 AM, nakita pa umano ni Rapinan si Dacera na tila sumusuka sa bathtub at sinabihan niya ito na pumunta na sa higaan. Tumanggi umano si Dacera at nanatili lamang sa bathtub.

Nang makita naman ni Galido si Dacera na natutulog sa bathtub, kinumutan niya umano ang kaibigan. Bandang alas-12 ng tanghali, tiningnan muli ni Galido si Dacera at nakita niyang kulay blue na ang labi at mga daliri nito. Agad daw niyang sinuri ang pulso at paghinga nito at nalamang hindi na humihinga si Dacera.

Sinubukan din umanong i-revive nina Rapinan at Gregorio de Guzman si Dacera sa pamamagitan ng cardiopulmonary resuscitation hanggang sa magdesisyon silang humingi na ng tulong sa hotel management na nagbigay sa kanila ng wheelchair.

Naniniwala naman si Valentine Rosales na ang mga pasang nakita kay Dacera ay dahil sa “unsteady position” nito sa wheelchair. Dinala si Dacera sa Makati Medical Center kung saan ito idineklarang patay na. Pahayag ni Dela Serna, “Walang nangyaring foul play kasi mahal na mahal namin si Christine.”

Saad naman ni Rosales, “The last moments of Christine was sa room namin (2209) sa bathtub. For sure, lahat kami inalagaan siya dahil suka na siya nang suka.” Pinabulaanan din ni Rapinan ang akusasyong panggagahasa kay Dacera. Aniya, “Walang may kayang gumawa ng pambababoy kay Christine… Hindi namin kayang gawin iyon sa kanya kasi mahal na mahal namin siya.”

Siniguro naman ng kanilang abogado na makikipag-cooperate ang kanyang mga kliyente sa imbestigasyon. Samantala, nagsampa ng kasong rape and homicide ang Makati City Police laban sa 11 kalalakihan kabilang sina Rapinan, Valentine at Mark Anthony Rosales, Galido, dela Serna, de Guzman at Madrid.

Ngunit kalaunan ay ipinag-utos ng city prosecutor na palayain sina Galido, Dela Serna at John Paul Halili dahil umano sa kakulangan sa ebidensiya.