Titser, 16 na beses sinaksak, todas

ni Mai Ancheta @News | August 18, 2023

Patay ang isang college teacher matapos tadtarin ng saksak ng hindi pa nakikilalang suspek sa Binalbagan, Negros Occidental.

Kinilala ng Binalbagan Police ang biktima na si Tony Lozaga, na nagtamo ng 16 na saksak sa katawan.

Nakita ang duguang katawan ng biktima sa labas ng kanyang boarding house at wala umanong nakapansin sa insidente.

Walang CCTV sa lugar na pinangyarihan ng insidente kaya walang makuhang lead ang mga awtoridad sa pagkakilanlan ng suspect at kung ano ang motibo sa pagpatay sa guro.

May teorya ang mga awtoridad na posibleng inabangan ang biktima kaya sa labas na ito ng kanyang boarding house pinatay.

Bebot, pinagsasaksak, ginilitan sa hotel, todas

ni Jeff Tumbado @News | July 18, 2023

Isang 27-anyos na babae ang nadiskubreng wala ng buhay na may saksak at malalim na hiwa sa kanyang leeg sa loob ng inuupahang kuwarto sa isang hotel sa Pagadian City, Zamboanga del Sur, kamakalawa.

Natagpuang duguan at nakahandusay malapit sa banyo ang biktimang si Janet Garay-on, naninirahan sa Bgy. Poblacion.

Ayon sa report ng pulisya, base na rin sa nakuhang CCTV footages ng hotel, makikita ang paglapit ng biktima sa front desk sa ikalawang palapag ng gusali.

Saglit na umalis ang biktima at pagbalik nito ay may kasama na siyang lalaki.

Kinabukasan, Hulyo 16, nang madiskubre ng isang roomboy ang insidente. Oras na umano ng checkout ng biktima subalit walang nagbubukas ng pinto kaya pinasok na ang kwarto at doon nadiskubre ang krimen.

Nagtamo ng tatlong saksak at hiwa sa leeg at dibdib si Garay-on.

Patuloy na inaalam ng mga awtoridad ang pagkakakilanlan ng lalaking kasama ng biktima na siyang itinuturong suspek sa brutal na krimen.

Ibinaon sa bakanteng lote.. 21-anyos pinatay sa sakal ng BF

ni Mai Ancheta | June 17, 2023

Nahukay ang bangkay ng isang 21-anyos na babae sa isang bakanteng lote sa Caloocan matapos umanong patayin at ibaon ng kanyang kasintahan sa Bagumbong, North Caloocan.

Batay sa imbestigasyon ng Caloocan Police, pinatay ng suspek na si Jeffrey Montales, 21, ang kanyang kasintahang si Argee Cabangunay, 21, dahil umano sa selos at pakikipag-chat sa isang lalaki.

Unang naiulat na nawawala ang biktima noong araw ng Linggo at sinamahan pa umano ng suspek ang kaanak ng kanyang kasintahan para i-report sa police station ang pagkawala nito.

Pero may nakapagsabi na si Montales ang nakitang huling kasama ni Cabangunay kaya itinuring itong "person of interest" ng mga otoridad.

Sa ginawang imbestigasyon ng Caloocan Police ay umamin si Montales na pinatay niya ang kasintahan matapos nilang magtalo na nauwi sa pananakal.

"Allegedly itong babae ay gusto nang humiwalay sa lalaki, nagkaroon ng pagtatalo hanggang sa masakal niya itong victim," ani Pol. Major Jose Hizon.

Araw ng linggo umano napatay ni Montales ang nobya pero Martes na ito ibinaon at siya na rin ang nagturo sa mga otoridad kung saan niya inilibing ang kasintahan.

Nahaharap sa kasong murder ang suspek na si Montales.