Laguna Gov. Hernandez, positive sa COVID

ni Lolet Abania | August 23, 2021

Inianunsiyo ni Laguna Governor Ramil Hernandez kagabi, Linggo, na nagpositibo siya sa test sa COVID-19.

“Bahagi na ng ating trabaho bilang public servant ang pakikisalamuha sa maraming iba’t ibang tao sa araw-araw. Kaya nga po siguro kahit lubos ang aking pag-iingat ay hindi na rin naiwasan na ako ay magpositibo sa COVID-19,” post ni Hernandez sa kanyang Facebook page.

Sinabi ni Hernandez na natanggap niya ang resulta ng kanyang test nitong Sabado.

Kasalukuyang naka-home quarantine si Hernandez at nakakaramdam lamang ng mild symptoms.

Gayunman, tiniyak ng gobernador sa kanyang mga kababayan na sa kabila ng kanyang sakit, mananatili ang provincial government na operational, habang siya ay nagtatrabaho sa bahay.

“Sa kabila po nito ay sinisigurado ko po na hindi matitigil ang operasyon ng Pamahalaang Panlalawigan ng Laguna at tuloy-tuloy pa rin ang ating Serbisyong Tama kahit ako po ay naka-work from home,” post pa ni Hernandez.

Ayon pa kay Hernandez, patuloy siyang nakikipag-ugnayan sa kanilang police provincial director, provincial administrator, at mga department heads ng provincial government para matiyak na nagagawa nang maayos ang kanilang trabaho.

Hiniling naman ng gobernador sa kanyang mga constituents na ipagdasal ang agaran niyang paggaling, habang patuloy silang sumusunod sa mga health protocols at kung maaari ay magpabakuna.

Sen. Lito Lapid, nagpositibo sa COVID-19

ni Ronalyn Seminiano Reonico | August 23, 2021

Nagpositibo sa COVID-19 si Sen. Lito Lapid, ayon sa kanyang staff ngayong Lunes.

Saad ni Atty. Jericho U. Acedera, chief of staff ni Lapid, "We wish to confirm that unfortunately, Pinuno tested positive in his COVID-19 RT-PCR test.

"He is currently undergoing treatment at the Medical City Clark where his doctors consider his case as mild to moderate."

Samantala, sumailalim na rin umano sa tests ang mga nagkaroon ng close contact sa senador at ayon kay Acedera, nagnegatibo naman ang mga close-in employees ni Lapid sa isinagawang antigen test at wala ring nakitaan ng sintomas ng COVID-19.

Saad pa ni Acedera, "We shall be reporting progress of his recovery when needed and as we get the news from his doctors.

"We enjoin everyone to pray that his health and of all those infected continue to improve, and more importantly, for this pandemic to soon be over.”

Fully vaxx na… Iloilo Rep. Garin, positibo sa COVID

ni Lolet Abania | August 18, 2021

Nagpositibo sa test sa COVID-19 si Iloilo 1st District Representative at dating Department of Health Secretary Janette Garin.

Sa isang statement ni Garin ngayong Miyerkules, pinayuhan siya ng kanyang doktor na sumailalim sa home quarantine dahil ang kanyang sintomas ay mild lamang gaya ng sipon, ubo, lagnat at chills.

“Despite following the minimum health protocols and being extra cautious, I tested positive for COVID-19,” ani Garin. Gayunman, sinabi ni Garin, na fully vaccinated na, na sasailalim siya sa strict monitoring dahil siya ay isang tachycardic o nagtataglay ng mabilis na heart rate.

“It is fortunate that I am fully vaccinated. I can sleep soundly with the hope that this will not be severe despite my pre-existing conditions: asthma, hypertension and Raynaud’s disease,” sabi ni Garin.

Ayon sa mambabatas, pinayuhan na rin niya ang mga naging close contacts na mag-quarantine at magbantay sakaling makaramdam ng mga sintomas. “Maraming salamat po sa lahat ng nagdarasal para sa aking kalusugan at recovery. Stay safe, everyone,” saad pa ni Garin.