Habang wala pang napili si P-Du30... Inting, mamumuno bilang acting Comelec chief — spox

ni Lolet Abania | February 3, 2022

Pamumunuan muna ang Commission on Elections (Comelec) ngayon ng kanilang pinaka-senior commissioner na si Commissioner Socorro Inting, sa isang acting capacity, habang wala pang itinatalaga si Pangulong Rodrigo Duterte sa tatlong pangunahing nabakanteng puwesto sa poll body, ayon kay Comelec spokesman James Jimenez ngayong Huwebes.

Sa naunang pahayag, sinabi ni Presidential Spokesman Karlo Nograles, naghahanap na si Pangulong Duterte ng hihirangin niya para sa tatlong Comelec commissioners, “ASAP” sa nabakantehang posisyon.

Ayon kay Nograles, mayroon nang shortlist o listahan ang Pangulo, subalit tumanggi itong sabihin ang mga pangalan.

Nitong Miyerkules, sina chairman Sheriff Abas at commissioners Antonio Kho at Rowena Guanzon ay nagretiro na sa Comelec, kasabay ng pagtatapos ng kani-kanilang termino.

Naiwan sa Comelec ang apat lamang na mga commissioners na sina Socorro Inting, Marlon Casquejo, Aimee Ferolino at Rey Bulay.

Lahat silang apat ay appointees din ni Pangulong Duterte, kung saan tatlo sa kanila ay mula sa Davao, ang bayang pinagmulan ng Pangulo.

Samantala, bago ang kanyang appointment para sa 7-taong termino bilang Comelec commissioner noong 2018, si Inting ay isang mahistrado sa Court of Appeals (CA). Ang kanyang kapatid na si Henri Inting ay nauupo bilang associate justice sa Supreme Court (SC).

Nagmula sa Davao City, nagtapos si Inting ng Bachelor of Laws degree, cum laude, mula sa Ateneo de Davao University noong 1980.

Nagsilbi si Inting bilang Presiding Judge ng Branch 4, Regional Trial Court, Manila, ng mahigit sa 9 taon, at Presiding Judge ng Metropolitan Trial Court, Branch 63, Makati, ng halos 3 taon.

Naglingkod din siya bilang isang prosecutor ng 6 taon, at naging public attorney ng 7 taon.

Itinalaga si Inting sa Court of Appeals noong 2009.

Iginiit naman ni Jimenez na ang poll body “is not crippled” o hindi napilayan habang nananatili aniyang functional kahit apat lang silang en banc members.

Commissioner Guanzon, nabiktima ng fake food booking

ni Lolet Abania | February 2, 2022

Naging biktima rin si Commission on Elections (Comelec) Commissioner Rowena Guanzon ng fake food orders na naganap ngayong Miyerkules, Pebrero 2, ang huling araw niya sa kanyang opisina.

Sa ulat, anim o pitong food delivery riders ang dumating sa Palacio del Gobernador, ang main office ng Comelec sa Manila, kung saan doon lamang nabatid na mga ito na hindi si Guanzon o kanyang opisina ang umorder ng mga pagkain.

Batay pa sa report, nagkakahalaga umano ng P5,390 ang food na inorder sa pamamagitan ng isang app na ginamit ang pangalan ni Guanzon. Itinanggi naman ng opisina ni Guanzon ang booking ng naturang order.

Si Guanzon, kung saan ang kanyang retirement sa office ay magsisimula sa Pebrero 3, ay laman ng mga headlines kamakailan, matapos na akusahan ang kapwa commissioner na si Commissioner Aimee Ferolino ng sadyang paged-delay ng resolution ng consolidated disqualification cases laban kay presidential aspirant Ferdinand “Bongbong” Marcos Jr.

Gayunman, itinanggi ni Ferolino ang ibinabato sa kanya ni Guanzon, habang inakusahan naman niya ito na sinusubukan siyang impluwensiya sa ilalabas na resolusyon ng kaso ni Marcos.

Patuloy naman na iniimbestigahan ng mga awtoridad ang naganap na insidente ng fake food booking.

Background check sa presidentiables, tuloy-tuloy — PNP

ni Lolet Abania | January 26, 2022

Ipinahayag ng Philippine National Police (PNP) na sila ay nagsasagawa ng “continuous” background check sa lahat ng presidential aspirants kasunod ng naging statement ni Pangulong Rodrigo Duterte sa umano’y corrupt candidate na tatakbo sa 2022 elections.

“Continuous naman po ‘yun,” sabi ni PNP chief Police General Dionardo Carlos sa isang press conference ngayong Miyerkules.

“At the end of the day, we will not jump the gun. We are not directed to name names. We will just do our work. Submit our report to our command line, leadership,” paliwanag ni Carlos.

Sa isang pre-recorded na Talk to the People ng Pangulo na ipinalabas nitong Martes, binanggit ni Pangulong Duterte na ilalantad din niya sa publiko kung sino sa mga presidentiables ang aniya, “most corrupt.” “In due time, I will personally name the candidates, maybe what is wrong with them.

Kailangan malaman ng tao, because you are electing a president,” sabi ng Punong Ehekutibo.

“[I will tell you] kung sino iyong pinaka-corrupt na kandidato. Hindi ako namumulitika. I am talking to you as your president. There are things you must know,” diin pa ni Pangulong Duterte.

Sa naunang pahayag, inakusahan ni Pangulong Duterte ang isang hindi pinangalanang kandidato na aniya ay isang cocaine user. Ayon kay Carlos, wala pa rin silang ebidensiya na susuporta sa pahayag ng Pangulo.