Listahan ng mga kandidato sa BPE, inilabas ng Comelec

ni Jeff Tumbado @News | May 17, 2026

Photo: File / Comelec

Inilabas na ng Commission on Elections (Comelec) ang listahan ng mga kandidato at nominado para sa nakatakdang Bangsamoro Parliamentary Elections (BPE) sa Setyembre 14.

Ayon sa poll body, maaaring tingnan ng publiko sa opisyal na website ng Comelec ang listahan ng mga kandidato para sa parliamentary district representatives gayundin ang mga nominado ng Regional Parliamentary Political Parties (RPPPs) at Parliamentary Sectoral Organizations (PSOs).

Kabuuang 13 RPPPs ang kabilang sa listahan, kasama ang 30 nominado mula sa mga PSO.

Kabilang dito ang walong kinatawan ng settler communities, anim para sa kababaihan, tig-tatlo para sa kabataan at ulama, at sampu para sa traditional leaders.

Nasa listahan din ang 107 kandidato para sa parliamentary district representative na nahahati sa iba’t ibang lugar sa Bangsamoro region:

17 kandidato para sa apat na distrito ng Basilan;

10 kandidato para sa tatlong distrito ng Cotabato City;

33 kandidato para sa siyam na distrito ng Lanao del Sur;

11 kandidato para sa limang distrito ng Maguindanao del Norte;

16 kandidato para sa limang distrito ng Maguindanao del Sur;

pito para sa dalawang distrito ng Special Geographic Area; at

13 kandidato para sa apat na distrito ng Tawi-Tawi.

Hinimok naman ng Comelec ang mga kandidato, partido, at nominado na beripikahin ang kanilang mga pangalan na ilalagay sa opisyal na balota at tiyaking walang clerical o typographical errors.

Ayon sa Comelec, maaaring magsumite ng kahilingan sa kanilang Law Department para sa pagwawasto ng anumang clerical o typographical error sa pangalan na ilalagay sa balota hanggang Mayo 18, 2026.

Nilinaw din ng poll body na ang pagsasama sa listahan ay hindi nangangahulugang ligtas na ang mga kandidato o nominado sa anumang petisyong maaaring ihain laban sa kanilang kwalipikasyon sa Office of the Clerk of the Commission.

Dagdag pa ng Comelec, magsisilbi ring public notice ang inilabas na listahan kaugnay ng deklarasyon ng mga nominado hinggil sa kanilang kwalipikasyon.

Birth certificate, required na sa paghahain ng COC — Comelec

ni BRT @News | April 24, 2026

Inanunsyo ng Commission on Elections (Comelec) na kinakailangan nang magsumite ng kopya ng birth certificate bilang kalakip sa paghahain ng Certificate of Candidacy (COC) para sa 2026 Barangay at Sangguniang Kabataan (SK) Elections, pati na rin sa mga susunod pang halalan.

Ayon kay Comelec Chairperson George Garcia, layunin ng bagong patakaran na maiwasan ang mga kaso ng material misrepresentation at ang posibleng disqualification ng mga kandidato.

Bahagi rin umano ito ng paghahanda ng komisyon para sa mas maayos na pagpapatupad ng halalan sa 2028.

Escudero, dadalo sa imbestigasyon ng campaign donation — Comelec

by Info @News | October 2, 2025

Photo: Chiz Escudero / FB

Nagpadala na umano si Sen. Francis ‘Chiz’ Escudero ng liham sa Commision on Elections (Comelec) para iparating ang kanyang kahandaan na maimbestigahan sa pagtanggap ng umano’y ilegal na campaign donation noong 2022 election.

Ayon sa Comelec, “The candidate who received [donation] from a contractor sent us a letter expressing his intention to appear next week. He’s a senator. He already made an admission.”

Kasunod nito itinanggi ni Comelec Chairman George Garcia na pinupuntirya nila si Escudero sa pag-iimbestiga sa mga kandidato na tumanggap ng donasyon mula sa mga kontraktor ng gobyerno.

Idinagdag din niya na nagkataon lamang na si Escudero ang isa sa mga unang na-summon dahil umamin agad ang kontraktor na nagbigay sila ng P30 milyong pondo para sa kampanya kay Escudero.

“Let’s just wait for the candidate to tell us his side because based on the law, both the donor and the candidate are liable,” saad pa ni Garcia.