Building sumabog, gumuho, 5 missing

ni Justine Berganio @Overseas News | September 27, 2026

Photo: Ang sumabog at gumuho ang isang residential building sa Plaka, Athens, Greece. Yorgos Karahalis / AP

Limang katao ang nawawala habang tatlo ang sugatan matapos sumabog at gumuho ang isang residential building sa Plaka, Athens, Greece nitong Biyernes.

Hindi pa malinaw ang sanhi ng pagsabog sa dalawang palapag na gusali na malapit sa Acropolis at Temple of Zeus. Matinding pinsala ang tinamo ng mga katabing bahay, tindahan at sasakyan dahil sa lakas ng pagsabog.

Kabilang sa hinahanap ng mga rescue worker ang isang elderly couple na nakatira sa gusali. Bahagi rin nito ay pinaupahan umano sa mga turista.

Isang passer-by ang nasugatan habang dalawang babae na na-trap sa katabing gusali ang nailigtas at dinala sa ospital.

Patuloy ang search and rescue operation sa lugar na dinarayo ng mga turista dahil sa mga hotel, short-term rentals, cafe at souvenir shops.

23 patay sa gumuhong pader at landslide sa India

ni Lolet Abania | July 18, 2021

Tinatayang nasa 23 katao ang namatay matapos na maraming tirahan ang nawasak sanhi ng gumuhong pader kasabay din ng landslide dahil sa malakas na Monsoon rains sa capital ng Mumbai, India ngayong Linggo.

Ayon sa National Disaster Response Force (NDRF), ang bumagsak na puno ang nakasira ng pader sa eastern suburb ng Chembur nitong Linggo nang umaga, kung saan may mga residente na nalibing nang buhay.

Umabot sa 17 bangkay ang narekober ng mga awtoridad mula sa pagguho, habang patuloy ang mga rescuers sa paghahanap sa iba pang labi at sa posibleng survivors sa insidente.

Batay din sa NDRF, sa suburb ng Vikhroli sa hilagang-silangan ng lungsod, 6 katao ang nasawi matapos ang landslide habang limang kabahayan ang matinding tinamaan nito ngayong umaga rin ng Linggo.

Karaniwan na ang mga pagguho ng mga gusali sa India sa tuwing Monsoon season mula Hunyo-Setyembre kung saan maraming mga lumang istruktura ang nanganganib na gumuho dahil sa walang tigil na mga pag-ulan.

Una nang iniulat nitong Sabado na ang Mumbai na tirahan ng 20 milyon indibidwal ay labis na naapektuhan dahil sa walang tigil na pagbuhos ng ulan, habang apektado rin ang kanilang local transport services.

“There will be moderate to heavy rains or thundershowers for the next two days,” ayon sa forecast ng Indian Meteorological Department ngayong Linggo. Naghayag naman ng pakikiramay si Prime Minister Narendra Modi sa kanyang tweet at sinabing magbibigay sila ng financial compensation para sa pamilya ng mga biktima.

5 patay, 156 nawawala sa gumuhong gusali sa Florida

ni Ronalyn Seminiano Reonico | June 27, 2021

Umakyat na sa lima ang bilang ng mga namatay sa pagguho ng isang bahagi ng 12-storey oceanfront building sa Surfside, malapit sa Miami Beach, Florida kamakailan.

"Today our search and rescue teams found another body in the rubble and as well our search has revealed some human remains," ani Miami-Dade County Mayor Daniella Levine Cava noong Sabado nang gabi.

Aniya pa, "It means that the unaccounted is now gone down to 156, confirmed deaths are now at a total of five.” Inaasahan namang tataas pa ang death toll dahil nahihirapang magsagawa ng rescue operations ang awtoridad dahil sa dami ng gumuhong debris.

Gumamit na rin ng sniffer dogs at heavy machineries katulad ng mga cranes upang mahanap ang iba pang nawawala.

Sa ngayon ay hindi pa rin malinaw kung ano ang dahilan ng pagguho ng naturang gusali ngunit, ayon sa awtoridad, noong 2018 pa ay mayroon nang nakitang “major structural damage” ang mga engineers at inspectors.

Patuloy pa rin ang imbestigasyon ng awtoridad at ang search, rescue and retrieval operations. Samantala, dahil sa insidente, ipinag-utos ni Mayor Cava na magsagawa ng isang buwang safety audit sa lahat ng gusali sa bansa na 40 years nang nakatayo.