Tigasin kunong gobernor sa norte...

akala mo kung sinong powerful, iyakin naman nang hindi napagbigyang maging senador

ni Chit Luna - @Yari Ka! | September 10, 2020

Kilalang tigasin at kinatatakutan ang isang gobernador sa norte dahil sa laki ng boses at katawan nito, bukod pa sa napakarami niyang kuwarta!

Pero knows n’yo ba na sa kabila nito ay iyakin pala ating bida, lalo na kapag “naagawan ng laruan”?

Sikat si Gov. na isang heneral sa larangan ng pagmimina sa kanyang probinsiyang pinamumunuan. Milyong piso umano ang kinikita ng mga nasa likod ng ilegal na pagmimina. Pero dahil din sa kanyang bisyo na pagsira ng kalikasan, natanggal ito sa kanyang puwesto. Sukang-suka sa kanya ang kanyang mga kababayan. Damang-dama ng mga tao na mas importante sa opisyal ang pera kaysa tugunan ang kanilang mga pangangailangan.

Gayunman, sa nakaraang panunungkulan ng ating bida, aba’y saku-sakong pera umano ang kinita nito. Tsk! May mga tauhan pa raw itong taga-bilad ng pera para lamang ‘wag amagin. ‘Yan ang pag-amin ng mismong tauhan na inuutusan sa gawing ito.

Aniya, bawal daw bumale at hindi rin puwedeng kumupit dahil may CCTV na maglalaglag sa ‘yo.

Ngunit dahil sa mga maling gawain, natanggal ito sa puwesto, at umarangkada nang husto ang mga kalaban niya sa pulitika.

Pero nagulat ang mga tao dahil muli na naman siyang manalo. Namayagpag siya kung saan kasabwat pa ang isang mayor ng probinsiya sa pagpapatuloy ng ilegal mining.

Muling nangamba ang mga magsasaka dahil paniguradong mamamatay ang kanilang mga pananim dahil sa makasariling mining business ng ating bida.

Pero bakit siya naging iyakin? Well, todo-asa kasi ito na magiging senador siya, pero nganga!

Sayang lang ang budget ng partido kung itataya sa kanya, kaya ang ending, hanggang iyak na lang! Mabuti nga sa ‘yo!

Ex-mayor na mula sa MM, sobrang babaero at wa’ paki sa dagdag na mga anak sa labas...

esmi pinatakbong mayor para maging busy, wa’ na paki sa mister basta ‘wag pahuhuli

ni Chit Luna - @Yari Ka! | September 8, 2020

Matapos ang kahihiyan sa social media, natutunan na ng ating bida na ‘ex-mayor’ ang pagtago sa kanyang mga karelasyon.

Isang malaking leksiyon sa dating alkalde mula sa NCR ang pagkalat ng kanyang litrato kasama ang girlfriend nito—at ang naturang litrato ay nagdulot ng malaking kahihiyan sa kanilang pamilya.

Bakit kanyo? Aba, makikita lang naman sa naturang larawan kung saan ang sobrang bagets na babae ay nakakandong kay ex-mayor na parang katatapos lang ng kanilang pagla-loving-loving.

Ilang araw lamang tumagal ang post sa social media at minabuti na ng kanilang pamilya na dalhin ang mga anak sa America upang hindi nila ito makita.

Upang tuluyan nang mawala ang isyu, minabuti ng PR man ni ex-mayor na patigilin ang patuloy na paglabas ng naturang litrato.

Napag-alamang mismong ina pala ng babae ni ex-mayor ang nag-post sa social media. Proud kasi si mommy na ang anak niya ay girlfriend ng dating alkalde. Ngek!

May kuwento rin sa kanilang lugar na noong kabataan ni ex-mayor nagkaroon ito ng karelasyong serbidora ng kanilang canteen kahit pa kasal na kay misis.

Ngunit dahil may mga loyal kay misis, nakarating sa kanya ang chismis, kaya surprise... nahuli sa akto si mister! Nakatikim ang ating chickboy na bida ng sapak sa kanyang misis.

Sa dami ng mga babae ni ex-mayor, sobrang pagtitiis ang ginawa ni esmi pero dumating daw sa punto na gusto na siyang hiwalayan ng asawa.

Ngunit para maisalba ang relasyon ng dalawa, nanghimasok na ang tatay ni ex-mayor na gawing mayor si misis.

Naging mayor na nga si misis at naging busy kaya nagkaroon na naman ng pagkakataon ang chickboy na mister na ipagpatuloy ang kalokohan at pambababae.

Gayunman, balewala na ito kay mayor, basta ‘wag lang mahuhuli.

Pero ang masaklap, tulad ng ibang babaero d’yan ay dumarami na raw ang anak nito sa labas. Paktay!

Mayor na dating mabilis, puyat na puyat dahil naka-tatlong babae kaya sobrang late...

pinaghintay ang mga reporter, pero kung gaano katagal dumating, sobrang bilis tinapos ang presscon na wa’ ‘wenta naman ang pinagsasabi

ni Chit Luna - @Yari Ka! | September 1, 2020

Taas ang kamay ng mga reporter sa isang babaerong mayor mula sa Cavite nang nagpa-schedule ito ng press conference. Bakit? Dahil pinaghintay lang naman sila nito ng siyam-siyam!

Nakiusap ang PR ni mayor sa mga reporters na dumalo sa press conference dahil mahalaga ang sasabihin ng alkalde. Dahil sa pakiusap, pumayag na dumalo ang mga reporter ng iba’t ibang pahayagan at radio station.

Ang usapan ay alas-8:00 ng umaga, American time. At dahil interesadong malaman kung ano ang sasabihin, ‘yung mga reporter na nasa malayong probinsiya, alas-4:00 pa lang ng umaga ay pumulas na papunta sa bahay ng alkalde.

Sa madaling salita, napuno na ng mga reporter ang receiving room ng alkalde, alas-7:00 pa lang ng umaga. Halos lahat, nagkape lang dahil sa pagmamadali.

Pero alas-8:00 na ng umaga, wala pa si mayor!

Ang dahilan ng kanyang alalay, “Napuyat si Mayor.” Inusisa ng isang tsikadorang reporter ang alalay kung bakit napuyat ang alkalde, “Tatlong chicks ba naman ang idineyt sa iba’t ibang lugar, sino ang hindi mapupuyat?”

Certified na matakaw sa chicks ang alkalde. Sa bawat labas niya, sinusulit niya ang oras sa mga batam-batang chikababes, kaya ang resulta ay parang gulay si mayor. Tanghali na, nakabaluktot pa siya. Naloko na!

Nag-announce ang kanyang tauhan, naghahanda lang daw ang alkalde at sisimulan na ang press conference, alas-10:30 na ng umaga!

Nagkukumahog ang mga tauhan niya sa paghahanda ng kakainin ng mga gutom nang mga reporter. Naglabas ng mga pinggan at kutsara sa isang luma at mahabang mesa na walang cover.

Ilang minuto pa, tig-isang planggana ang dala-dala ng tatlong alalay ni mayor.

Inilapag ang malalaking planggana na may laman palang mga ulam. Isinunod ang kanin at sinabihan ang mga reporter, “Kain na po tayo.”

Kahit alam ng mga reporter na ang planggana ay pinaglalabahan ng maruruming damit, wala silang choice dahil nagkukuluan na ang kanilang sikmura.

Pinilahan nila ang nakahaing pagkain na nakalagay sa mga lumang planggana.

Makaraang makakain, pumatak na ang alas-12 ng tanghali. Pero wala pa rin si mayor!

Gusto nang magsipulas ng mga naiinip na reporter. Pero inawat sila ng mga alalay ng alkalde, “May inihanda po para sa inyo si mayor.” Saglit na lang daw at darating na ang alkalde.

Makaraan ang isang oras, lumantad na ang alkalde na pupungas-pungas pa. Binati niya ang mga reporter. At pagkaraan, walang humpay niyang binanatan ang kanyang mga katunggali sa pulitika.

Kung gaano katagal siyang dumating, ganu’n niya tinapos ang kanyang presscon at dali-daling umalis si mayor para muling matulog. Nalokah ang mga reporter!

Pinapila sila sa isang kuwarto at may namimigay pala ng sobre.

Binuksan nila ang sinasabing handa sa kanila ni mayor—tumataginting na P300!

Napailing na lang ang mga reporter na galing pa ng malalayong probinsiya.

Mantakin mong madaling-araw pa silang bumiyahe, walang katorya-torya pala ang sasabihin ng tamad na alkalde at pinalala pa ng pakunswelo de-bobo niyang P300!

Clue: Anak siya ng kilalang pulitiko na naging alkalde at gobernador. Kung gaano kasipag ang ama, ganu’n naman katamad ang anak.

Kaya hindi na umaasa pa ang kanyang mga nasasakupan dahil alam nila, batugan ang kanilang alkalde.