Dahil sa krisis sa langis, kuryente — CHED... 100% Online class sa kolehiyo, aprub

ni Mylene Alfonso @News | April 9, 2026

Photo: Commission on Higher Education (CHED)

Inaprubahan ng Commission on Higher Education (CHED) ang polisiya na nagpapahintulot sa lahat ng higher education institutions (HEIs) na mag-100% online classes dahil sa krisis sa fuel at kuryente dulot ng nagpapatuloy na sigalot sa Middle East.

Ayon kay Chairperson Dr. Shirley Agrupis, ito’y pansamantalang hakbang ng CHED sa ilalim ng “Academic Sustainability Plan,” na pinalawig mula sa flexible learning na ginamit noong COVID-19 pandemic.

Naaayon din ito sa mas malawak na kampanya ng pamahalaan sa pagtitipid ng enerhiya sa ilalim ng Office of the President Memorandum Circular No. 114, na nag-aatas sa mga ahensya at institusyon na magpatupad ng energy-saving measures sa gitna ng pagtaas ng presyo ng fuel sa buong mundo.

Nilinaw ni Agrupis na ang mga paaralang lilipat sa full online setup ay hindi awtomatikong ituturing na accredited providers ng formal online distance education sa ilalim ng ODEL framework ng CHED.

“There are some procedures and requirements for a university to apply so that they will be recognized and credited as a school who can deliver pure distance learning,” paliwanag ni Agrupis.

Matatandaang noong COVID-19 pandemic, pinayagan ng CHED ang private HEIs na magpatupad ng 50% online at 50% face-to-face, habang ang state universities at colleges ay 75% face-to-face at 25% online setup.

Aniya, niluwagan ng CHED ang mga limitasyon, kaya pinapayagan na ang mga paaralan na mag-full online kung kaya nila.

“We just approved yesterday (April 6) that we are giving the full flexibility of all higher education institution to adhere to the previously issued COVID-19 pandemic CMO. But on top of that, depending on their perceived readiness to offer the pure online, sila na iyong mag-de-determine,” ani Agrupis.

“But it does not necessarily mean that if they offer na 100% online teaching and learning management system, ay hindi ibig sabihin na automatic na certified na sila for the ODEL program,” dagdag pa niya.

Long-term vision para sa sektor ng edukasyon

ni Kuya Win Gatchalian @Win Tayong Lahat | April 30, 2024

Inihain ng inyong lingkod ang National Education Council Act (Senate Bill No. 2017) para matugunan ang kawalan ng long-term vision o pangmatagalang plano sa edukasyon. 

Sa ating panukala, iminumungkahi natin na bumuo ng National Education Council (NEDCO) na lilikha ng national education agenda at paiigtingin ang ugnayan sa tatlong ahensya ng edukasyon sa bansa — ang Department of Education (DepEd), Commission on Higher Education (CHED) at Technical Education and Skills Development Authority (TESDA). 

Patuloy kasi ang pagbabago ng mga skills at ang pangangailangan ng mga industriya kaya kailangan natin ng long-term vision para iisa lang ang ating direksyon pagdating sa pagpapatupad ng mga programa sa sektor ng edukasyon. 

Sa ilalim ng naturang panukala, magiging mandato sa NEDCO na gawing institutionalized ang isang sistema ng koordinasyon sa buong bansa pagdating sa pagpaplano, pag-monitor, pagsusuri, at pagpapatupad ng national education agenda.

Layon nitong tiyakin na sumusunod sa isang estratehiya ang DepEd, CHED, at TESDA, at maiwasan ang mga posibleng overlap at kakulangan na magdudulot ng hindi magkakaugnay na mga polisiya, programa, at plano. 

Upang maiangat ang performance ng mga mag-aaral, kasama sa mga magiging mandato ng NEDCO ang pagpapatupad ng isang action agenda para matulungan ang bansa na magtagumpay sa edukasyon at magkaroon ng mataas na marka sa mga batayang tulad ng National Achievement Test, Programme for International Student Assessment, Education Index, Education for All Development Index, at iba pa. 

Mayroon naman nang nilikha noon na mga lupon, tulad ng National Coordinating Council for Education (NCCE) sa ilalim ng Executive Order (EO) No. 273 s. 2000 at ng Presidential Task Force to Assess, Plan and Monitor the Entire Educational System sa ilalim ng EO No. 652 s. 2007 — pero marami sa mga layuning ito ang hindi natupad nang hatiin sa tatlong sektor ang buong sistema ng edukasyon o ang tinatawag na Trifocalization of Education System. 

Inirekomenda na ng 1991 Commission on Education (EDCOM) ang paghahati sa tatlong ahensya ng sistema ng edukasyon sa bansa. Ngunit inirekomenda rin ng 1991 EDCOM na magkaroon ng isang national council para matiyak ang ugnayan sa polisiya ng tatlong mga ahensya. 

Kadalasa’y hindi natin napupuna o kinikilala ang mga teknikal ngunit mahahalagang hakbang upang gawing mas epektibo ang paghahatid ng edukasyon sa mga kabataan, tulad nitong national council para sa edukasyon. 

Kaya naman bilang chairman ng Senate Committee on Basic Education, patuloy nating titiyakin na maipapatupad ang mga patakaran, programa, at polisiya na makakapagpabuti sa sistema ng edukasyon sa bansa.

Upang magtagumpay tayo rito, walang patid tayong makikipag-ugnayan sa iba pang mga ahensya ng gobyerno, lokal na pamahalaan, sektor ng pagnenegosyo, akademya, at iba pang mga public at private stakeholders na may mahalagang papel sa sektor ng edukasyon.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

World-class education, isusulong sa 2024 — CHED

ni Eli San Miguel - Trainee @News | December 27, 2023

Nagbahagi si Popoy De Vera, ang Chairman ng CHED (Commission on Higher Education), ng magandang balita tungkol sa pagtaas ng bilang ng mga nag-apply sa mga pampublikong unibersidad, sa isang panayam sa "Bagong Pilipinas Ngayon" ng PTV ngayong Miyerkules.

Noong 2023, halos dalawang milyong estudyante ang nag-aaral sa mahigit 200 pampublikong unibersidad nang walang bayad sa matrikula o iba pang bayarin.

Ayon kay De Vera, masamang balita na maraming nais pumasok sa unibersidad na mula sa mga pamilyang may kakaunting kita ang nauunang apektado.

Sinabi niya na nauunawaan ng CHED na maaaring magkaproblema sa standardized admission tests ang mga mag-aaral na hindi mayayaman.

Binigyang-diin ni De Vera na kinakailangan ng CHED na magtuon sa "inclusive education," na nangangahulugang kinakailangan ang pagsusuri ng mga pamamaraan sa pagtanggap ng mga estudyante sa lahat ng pampublikong unibersidad.

"We will ensure that all degree programs in universities are world-class or up to the standards, requiring all of them to have a certificate of program compliance, qualified faculty, good curriculum necessary facilities," aniya.

Ipinahayag din ng chairperson na "Equity Inclusive Education" ang magiging gabay sa misyon ng CHED sa taong 2024.