Babaeng nagsampa ng kasong rape at robbery sa 11 pulis, pinatay

ni Ronalyn Seminiano Reonico | April 20, 2021

Patay ang 35-anyos na babaeng nagsampa ng kasong rape at robbery laban sa 11 pulis matapos pagbabarilin ng hindi pa nakikilalang salarin sa Barangay Basak-Pardo, Cebu City noong Lunes, bandang alas-7 nang gabi.

Ayon sa hepe ng pulisya ng Integrity Monitoring and Enhancement Group (IMEG) Visayas Field Unit na si Maj. Alejandro Batobalonos, nagtamo ng multiple gunshot wounds ang biktimang si Ritchie Nepomuceno na nagsampa ng kasong kriminal laban sa 11 police officers na na-assign sa Sawang Calero Police Station.

Naharap sa kasong robbery, arbitrary detention, grave coercion at grave threats ang 11 kapulisan sa Cebu Provincial Prosecutor’s Office. Sinampahan din ng kasong two counts of rape ang police team leader na si SSgt. Celso Colita dahil sa pangmomolestiya diumano kay Nepomuceno sa motel, ayon kay Brig. Gen. Ronnie Montejo, head ng Central Visayas police.

Tinanggal sa puwesto ang mga pulis habang nagsasagawa ng internal investigation.

Bukod kay Colita, kinilala rin ang iba pang pulis na sina Chief MSgt. Eric Edgar Ernia, Staff Sergeants Joseph Alcoseba at Michael Rhey Cabizares, Corporals Emmanuel Martinez, Rochelito Mabulay, Ejill Ferrolino, Carlo Irizari, Junel Pedroza, John Carl Aceron at Georny Abrasado.

Hindi naman kinasuhan ang hepe ng Sawang Calero police station na si Maj. Eduard Sanchez ngunit inalis siya sa puwesto dahil sa command responsibility.

Noong March 9, bandang alas-9 nang gabi, nagsagawa ng search operation ang grupo ni Colita sa bahay ni Nepomuceno sa Tungkil, Minglanilla, South Cebu dahil sa alegasyong possession of unlicensed firearms.

Ayon kay Nepomuceno, walang ipinakitang search warrant ang mga nasabing pulis at kinuha umano ng mga ito ang kanyang mga gamit kabilang na ang mga alahas.

Noong March 10, pinuwersa umano si Nepomuceno ng mga pulis na mag-withdraw ng P170,000 sa kanyang account. Bandang alas-2:45 nang araw ding iyon, dinala umano ni Colita si Nepomuceno sa motel sa Mambaling at ginahasa ang biktima.

March 11 nang pakawalan diumano ni Colita si Nepomuceno.

Samantala, noong Lunes nang gabi, natagpuan ding wala nang buhay at duguan si Colita sa loob ng comfort room ng Regional Police Drug Enforcement Unit Office.

Pahayag ng case investigator na si Police Senior Master Sergeant Jephthah Jumawan, “He was summoned to the DEU by his superior for an interview on his alleged involvement in drugs.

“Yet when he asked permission to go to the comfort room, they were shocked to hear a gunshot."

Kinukuha raw ang mga firearms sa mga opisyal na tinanggal sa puwesto ngunit gumamit umano si Colita ng .45 caliber pistol upang barilin ang sarili.

Saad pa ni Jumawan, “They were shocked why he had a firearm on him.”

Samantala, patuloy pa ring nagsasagawa ng imbestigasyon ang awtoridad sa insidente.

Taga-NCR Plus areas, Cebu at Davao City, bawal sa Region VI – IATF

ni Ronalyn Seminiano Reonico | April 5, 2021

Pansamantalang pinagbabawalan ang mga residente mula sa NCR Plus areas, Cebu City, at Davao City na pumunta sa Region VI hanggang sa April 10, ayon sa inilabas na pahayag ng Malacañang ngayong Lunes.

Ayon kay Presidential Spokesperson Harry Roque, ang desisyon ng Inter-Agency Task Force for the Management of Emerging Infectious Diseases (IATF) ay base sa inihaing rekomendasyon ng mga local officials ng Region VI dahil sa patuloy na pagtaas ng kaso ng COVID-19.

Ang NCR Plus ay binubuo ng Metro Manila, Bulacan, Cavite, Laguna at Rizal.

Samantala, noong Linggo, pumalo na sa 795,051 ang kabuuang bilang ng kaso ng COVID-19 sa bansa kung saan 646,100 ang mga gumaling na at 13,425 ang mga pumanaw.

Pagbebenta ng baboy sa labas ng Cebu, bawal

ni Ronalyn Seminiano Reonico | January 30, 2021

Ipinagbawal ng Cebu provincial government ang transportasyon ng mga buhay na baboy mula sa probinsiya patungo sa ibang lugar sa loob nang 6 na buwan dahil sa kakulangan sa suplay. Nilagdaan ni Cebu Governor Gwendolyn Garcia noong Biyernes ang Executive Order No. 8 Series of 2021 upang masiguro ang sapat na suplay ng baboy sa probinsiya sa kabila ng mataas na demand nito sa iba pang lugar sa bansa dahil sa African Swine Fever.

Saad din sa naturang order, “There is an urgent need to strictly regulate the [transport] of live hogs and sows to other areas of the country in order to protect the pig supply in the province of Cebu.”

Samantala, epektibo ang naturang order simula sa February 1 ngayong taon.