Face mask, ‘di na kailangan sa mga open spaces — Cebu gov

ni Lolet Abania | June 9, 2022

Isang executive order ang inisyu ni Cebu Governor Gwen Garcia hinggil sa pagbawi sa mandato ng pagsusuot ng face mask sa mga open spaces sa lalawigan.

Sa Executive Order 16 na inisyu nitong Miyerkules, ayon kay Garcia ang mga face masks ay kakailanganin na lamang sa mga closed at air-conditioned areas.

“The use of face masks shall be optional in well-ventilated and open spaces,” nakasaad sa order.

Gayunman aniya, ang mga indibidwal na may sintomas ng COVID-19 gaya ng lagnat, ubo o runny nose ay required pa rin na magsuot ng mask kapag aalis ng kanilang bahay. Binanggit naman ni Garcia na ang pag-improve ng probinsiya sa sitwasyon ng COVID-19, ang dahilan kaya pinaluwag na ang mandato ng face mask.

“Other countries, including Singapore, have already directed the wearing of masks and other personal protective equipment be optional in outdoor settings,” ani Garcia sa kanyang order.

Batay sa latest health bulletin na ini-release ng Central Visayas health office, nakapag-record ang Cebu ng average na 36 kaso ng COVID-19 kada araw mula Mayo 29 hanggang Hunyo 4, habang tinatayang 4 milyong mamamayan sa rehiyon ay fully vaccinated na.

Una nang sinabi ng Department of Health (DOH) na ang mandatory na paggamit ng face masks ang magiging anila, “last to go” o huling aalisin sa transition ng bansa sa new normal.

Marami na ring beses na hinimok ni Pangulong Rodrigo Duterte at ng Inter-Agency Task Force (IATF) ang probinsiya na sumunod sa national mandates ng COVID-19 response.

Cebu at Manila Chooks, sasabak sa Mongolia

ni Anthony E. Servinio - @Sports | May 6, 2022

Hahanapin ng Cebu Chooks ng Pilipinas ang kanilang ikalawang sunod na kampeonato sa kanilang pagsabak ngayong Biyernes at Sabado sa FIBA 3x3 Ulaanbaatar Super Quest sa Sky Resort sa Mongolia. Kasama ng Cebu ang Manila Chooks na susubukang makamit ang isang tiket para sa World Tour Manila Masters sa Mayo 28 at 29.

Ganado sina Mark Jayven Tallo, Zachary Huang, Brandon Ramirez at Mike Harry Nzeusseu matapos ang tagumpay sa Asia-Pacific Super Quest noong Sabado sa Solenad sa Santa Rosa City, Laguna. Natalo ang Manila sa Cebu sa semis at tiyak na babawi ang kombinasyon nina Mark Yee, Chico Lanete, Dennis Santos at Henry Iloka.

Hinati ang walong kalahok sa dalawang grupo kung saan napunta ang Cebu sa Grupo A kasama ang Ulaanbaatar MMC Energy at Amgalan MMC Energy ng Mongolia at Yokohama Beefman ng Japan. Tatlong kinatawan ng Mongolia ang haharapin ng Manila sa Grupo B na Zavkhan MMC Energy at ang mga lumaban sa Asia-Pacific Super Quest na sumegundang Sansar MMC Energy at pumangatlong Zaisan MMC Energy.

Dalawang tiket ang nakataya para sa Manila Masters. Pasok na sa torneo ang Cebu, Sansar at mga naunang naihayag na Ub Huishan NE at Liman Huishan NE ng Serbia, Antwerp ng Belgium, Warsaw Lotto ng Poland at UIaanbaatar.

Dahil sa kampeonato ng Cebu at pagpasok sa semis ng Manila sa Asia-Pacific Super Quest, umakyat ng isang puwesto ang Pilipinas sa ika-28 sa FIBA 3x3 World Ranking. Layunin pa rin na paabutin sa ika-24 o mas mataas ang bansa upang magkaroon ng pag-asa na mapabilang sa 2024 Paris Olympics.

Mapapanood nang live ang lahat ng laro ng Ulaanbaatar Super Quest sa opisyal na YouTube at Facebook ng FIBA 3x3. Magsisimula ang unang laro sa 4 p.m. habang ang mga laro sa Sabado ay nakatakda para sa 2 p.m.

2 Chinese inaresto ng NBI sa pagbebenta ng mga pekeng gamot

ni Jasmin Joy Evangelista | March 23, 2022

Arestado ang dalawang Chinese nationals matapos mahuli ng National Bureau of Investigation (NBI) Central Visayas dahil sa umano’y pagbebenta ng mga pekeng gamot na nagkakahalagang P500,000 sa dalawang magkaibang shop sa Mandaue City, Cebu.

Kinilala ang mga suspek na sina Shi Wenpai, may-ari ng Hua Long Supermarket; at Wu Xiao, store manager ng Laoxiang Supermarket, na kinasuhan na ng violation of Republic Act 8203 o ng Special Law on Counterfeit Drugs.

Kasalukuyan namang pinaghahanap ngayon si Alexine Rapunzel Ong Dy, may-ari ng Laoxiang Supermarket, na wala sa lugar kung saan nagsagawa ng operasyon ang mga awtoridad noong March 18.

“This (operation) was conducted in the wake of President Rodrigo Duterte’s call to hold accountable establishments or individuals caught trading fake medicines or selling medicines without proper documents,” ani NBI-7 sa isang written statement na ipinadala sa mga reporter.

Nakumpiska sa mga Chinese shops ang Amoxicillin Capsules 0.25 grams, OCT Lianhua Qingwen Jiaonang; at, CSPC Arbidol Hydrochloride tablets 0.1g WT 2015009 label in Chinese characters. Ang mga gamot na ito ay pinaniniwalaang ginagamit bilang gamot sa COVID-19.

Naglabas na ng search warrant si Executive Judge Allan Fransisco Garciano ng Regional Trial Court sa Mandaue City na siyang gagamitin ng NBI sa pagsasagawa ng operasyon.