Hindi raw P19M… BAGONG BILING TESLA CYBERTRUCK NI ANNE, P6.7 M LANG

ni Beth Gelena @Bulgary | February 2, 2026

Photo: IG @annecurtissmith

Bina-bash si Anne Curtis sa pagkakabili niya ng bagong sasakyan na Tesla Cybertruck na nagkakahalaga umano ng P19 milyon. 

Maging ang kanyang kasuotan na denim Adidas jacket ay pinuna rin ng mga bashers.

Sey ng mga netizens… “Go lang, Anne Curtis, deserved mo magkaroon ng ganyan, kasi ang bait mong tao.”

“Go, Anne, afford mo naman ‘yan at bagay talaga sa awrahan mo. You look so pretty always, my lods (idol).”

“Mapapa-sana all ka na lang talaga, idol Anne. Sana po, i-share n’yo naman po sa amin ang yaman n’yo kahit konti. Hehehe! God bless po.”

May computation pang ibinigay ang isang basher, “Explain to me, how can a $175,000 cost P19 million sa ‘Pinas?”

“Tesla Cybertruck 2026 is only ranging from $79K (P4.6 M to $114,990 (P6.7 M) depending on trims. That’s not 19M pesos. If she bought it that much, she was cheated. Unless she bought 2!”

Hay, naku, mga netizens nga naman, sobrang mapanuri kapag ang isang artista ay nakabili ng mamahaling bagay. 

Hindi naman ipinangangalandakan ni Anne Curtis ang kanyang pinaghirapang ani, tanging mga Marites lang ang pumupuna sa nabili niyang sasakyan.

---

Una, si Ian…

THE KINGDOM, DEDMA RIN SA FAMAS

Tila nagiging kontrobersiyal ang Filipino Academy of Movie Arts and Sciences (FAMAS) ngayong taon kahit tapos na ang kanilang 73rd FAMAS Awards noong Agosto 2025. 

Nauna ang hindi pagtanggap ni Ian Veneracion para sa special award na Child Stars Icon, at ngayon naman ay ang tungkol sa hindi pagbibigay ng kopya ng pelikulang The Kingdom (TK).

Ayon kay Atty. Vince Tañada, artistic director ng FAMAS, simpleng dahilan lamang ang rason: hindi nag-submit ng entry ang production team ng pelikula.

“Sa FAMAS, kailangang mag-entry. ‘Yun ang mga pipiliin namin… May isa lang talaga, ayaw mag-entry. Kahit anong pilit namin, ‘Sige na! Kasi puwede talaga kayong manalo,’” paliwanag ni Atty. Vince sa mediacon ng inaugural ng FAMAS Broadcast Arts Awards.

Dagdag pa niya, ilang beses silang nag-e-mail at nakipag-communicate sa team ng TK, ngunit walang naging tugon mula rito. 

Naniniwala ang FAMAS na karapat-dapat sana ang pelikula sa mga nominasyon dahil sa kalidad ng production design at cinematography, pati na rin ng performance nina Vic Sotto, Piolo Pascual, Cristine Reyes, Sue Ramirez, Sid Lucero, Nico Antonio, Zion Cruz, Ruby Ruiz, Iza Calzado, at Cedrick Juan.

“‘Yung The Kingdom last year… ayaw nilang mag-entry. Naka-ilang e-mail kami, ayaw nilang mag-entry. Eh, ayaw, eh!” dagdag pa ni Atty. Vince.

Hmmm… Mukhang hindi maganda para sa kredibilidad ng FAMAS ang nangyayari ngayon. Tama ba na nawawalan na yata ng tiwala at respeto sa kanila ang ilang celebrities natin?

Bukas ang BULGAR sa magiging pahayag ng kabilang panig.

---

NAG-OATH-TAKING na ang mga bagong halal na 2026 Philippine Movie Press Club (PMPC) officers kung saan si Hon. Marcos Mamay ang nagsilbing inducting officer. 

Nanumpa sila ng kani-kanilang mga katungkulan sa harap ni Hon. Mamay nitong Enero 30, 2026.

Si Mamay ay vice-mayor ng Nunungan, Lanao del Norte, at isang movie producer. 

Pinangungunahan ang 2026 PMPC officers at board members ng newly-elected president na si Fernan de Guzman, na nagbabalik sa kanyang pang-apat na beses na pamumuno sa grupo.

Ang iba pang bagong opisyal ng PMPC na nanumpa ay sina Rodel Fernando (vice-president); Eric Borromeo (secretary); Mildred Bacud (assistant secretary); Boy Romero (treasurer), Jimi Escala (assistant treasurer), Joey Austria (auditor); Evelyn Diao (PRO - English); at Glen Sibonga (PRO - Filipino).

Board of Directors sina John Fontanilla, Leony Garcia, Melba Llanera, Mell Navarro, Rommel Placente, at Francis Simeon.

Ayon kay Mamay, “Malaking karangalan po na maimbita po tayo para mag-administer ng oath sa new officers ng PMPC. Maraming salamat sa PMPC at sa bagong president na si Fernan de Guzman. Sana, tuluy-tuloy na ito. Sana ay maganda ang pamamalakad para sa kabutihan ng buong PMPC, ng ating media friends and press, at sana, magtagumpay lahat ng mga adhikain natin.”

Inihayag din ni Mamay ang hangarin niyang masuportahan at matulungan ang PMPC lalo na sa pagsasagawa at pag-oorganisa nito ng taunang Star Awards for Movies, Music, at Television. Napili ng PMPC si Mamay na maging inducting officer dahil sa magandang imahe at kredibilidad niya bilang public servant, pati na rin ang naibibigay

niyang ambag sa showbiz industry bilang movie producer.

Si Marcos Mamay ay na-elect na vice-president for Operations ng Vice Mayors League of the Philippines (VMLP) noong 29th National Convention. Nagsisilbi rin siyang national vice-president of the League of Municipalities of the Philippines (LMP).

Panoorin lang… PRESYO NG TIKET SA MOVIE NINA ECHO AT ANNE, IBINABA NG VIVA

ni Beth Gelena @Bulgary | January 29, 2026

Photo: FB Anne Curtis

Ini-announce ng Viva Films na ibababa nila ang ticket price sa sinehan ng reunion movie nina Anne Curtis at Jericho Rosales na The Loved One at magiging P275 at P230 na lamang. 

Maging sa mga SM Cinemas sa mga probinsiya ay ganoon din ang presyo.

Ayon sa Viva Films, eksklusibo sa SM Cinemas sa Metro Manila at sa mga probinsiya ang presyong ito. Hindi ito ang unang pagkakataon na binawasan ng Viva Films ang presyo ng tiket para sa kapakanan ng mga moviegoers. Ginawa na rin nila ito nang magbukas sa mga sinehan ang Philippine adaptation ng A Werewolf Boy (AWB), ang launching movie ng love team nina Rabin Angeles at Angela Muji noong Enero 14.

Bilang tulong sa industriya ng pelikulang Pilipino, ipinatutupad ng Viva Films ang pagbabawas sa presyo ng cinema tickets upang mahikayat ang mga tao na bumalik sa panonood ng pelikula sa mga sinehan. 

Malaki ang epekto sa mga theater owners at movie producers ng mataas at hindi abot-kayang cinema ticket price.

Nakakapanghinayang nga namang gumasta ang mga manonood kaya mas pinipili na lamang nilang hintayin ang pagpapalabas ng mga Tagalog movies sa Netflix.

Ang pinababang presyo ng tiket sa mga sinehan ng SM ay isa lamang sa mga paraan upang matugunan ang problema sa nababawasan na bilang ng moviegoers na dahilan ng paghina ng industriya ng pelikulang Pilipino.

Komento naman ng ilang netizens, “Parang nakakapanghinayang pa rin magbayad ng P275 at P230 kasi pandagdag na rin ‘yun sa mga pamilyang kulang pa sa minimum ang kinikita.”

Sabagay, totoo naman ang komento. Isusubo na lang sa bibig ng isang pamilya, dapat pa bang unahin ang kapritso?

Sa Netflix nga naman, kahit magbayad ka ng P100, isang buong pamilya na ang makakapanood kahit ilang beses pa.

---

IPINAGDIWANG ni Shuvee Etrata ang kaarawan ni Xyriel Manabat sa pamamagitan ng pagbabahagi ng collage sa Instagram (IG) Stories na nagtatampok ng mga larawan nu’ng nasa Pinoy Big Brother Celebrity Collab Edition (PBBCCE) sila.

Makikita sa post ang mga hindi malilimutang sandali na kanilang pinagsamahan sa palabas at ang malalim nilang ugnayan bilang magkaibigan.

Aniya sa caption, “Happiest birthday, my first duo!”

May kasama rin itong pasasalamat, “Mahal na mahal kita palagi, Baby Xyxy (Xyriel). Salamat sa lahat ng ating mga alaala.”

Pahabol pa niya (as is), “Mahal ko ikaw!”

Ipinakita lang ni Shuvee na ang friendship nila ni Xyriel ay hindi pang-camera lang.

Unang nakilala si Xyriel Manabat sa mundo ng showbiz nang sumali siya sa Star Circle Quest: Search for the Next Kiddie Idol noong 2009 kung saan siya ay ginawaran ng ikatlong puwesto.

Ang dating child actress ay pinuri sa kanyang mga pagganap sa 100 Days to Heaven at Ikaw Ay Pag-ibig.

Si Shuvee Etrata naman ay tinaguriang ‘Island Ate ng Cebu’.

---

NAGPALIWANAG si Anne Curtis sa sagot niya sa basher na “‘Di ‘wag kang manood” na nag-viral sa social media.

Sa isang panayam ay natanong siya tungkol sa movie nila ni Jericho Rosales na The Loved One na may kinalaman sa ghosting.

Bago sumagot, sinabi ni Anne na baka raw makapagsalita na naman siya ng hindi maganda dahil baka masama ang kanyang gising.

Aniya, “Yeah, Taglish ang movie namin. May English-English-an at Tagalog. Pero kung ‘di n’yo type, ‘di ‘wag kayong manood. Ganu’n lang naman ‘yun.”

Nilinaw niyang wala siyang intensiyon na anupaman at hindi raw iyon sarcastic. 

Para sa kanya, malambing pa rin ang pagkakasabi niya, bagama’t na-misinterpret ng iba.

Sabi naman ni Echo, “Kung ako ‘yun, sasabihin ko rin, ‘‘Di ‘wag kang manood.’”

Umani ito ng sari-saring reaksiyon mula sa mga netizens, kabilang ang mga nagsabing mas pipiliin na lang nilang manood sa Netflix, habang may ilan namang nagtanggol kay Anne at sinabing natural lamang ang kanyang naging reaksiyon.

May nagsabi ring baka publicity lamang ito, samantalang ang iba ay nagsabing dapat asahan na ang ganitong backlash lalo na’t naghahanap ng mga manonood ang local films.

Ex-BFF, sangkot sa syndicated estafa… RITA: ‘DI NA KAMI FRIENDS NI KEN

ni Beth Gelena @Bulgary | January 28, 2026

Photo: FB Rita Daniela

Diretsahang sinabi ni Rita Daniela sa isang panayam na hindi na niya friend ang “aktor” na patungkol sa dati niyang ka-love team at teleserye partner na si Ken Chan.

Ayon sa Kapuso actress, wala na silang komunikasyon ngayon. Gayunman, umaasa pa rin siyang magiging maayos ang lahat at patuloy niya itong ipinagdarasal kasama ang pamilya nito.

“No, I don’t. We’re not friends anymore,” ani Rita nang tanungin kung may ugnayan pa sila.

Hindi itinanggi ni Rita ang lungkot sa pagkakasangkot ni Ken sa kasong syndicated estafa sa Quezon City Prosecutor’s Office.

“S’yempre naman. S’ya ang matalik kong kaibigan at napakaespesyal na tao para sa akin. I hope na maging okay din s’ya at ang buong pamilya n’ya. Ipagdarasal ko s’ya,” pahayag ng aktres.

Aminado rin si Rita na nasorpresa siya sa balitang kinasangkutan ni Ken.

“But I don’t know. Kahit malaman ko nang maaga, makakatulong ba ako? Kaya ang pinakamagandang magagawa ko ngayon ay ipagdasal s’ya,” aniya.

Nilinaw din ng aktres na hindi pa siya nakapag-invest sa negosyo ni Ken, bagama’t plano sana nilang maging business partners noon.

Hindi rin niya itinanggi na nagkaroon sila ng personal na ugnayan.

“Of course, I’m very sad about what happened to us. Ilang taon din ‘yun. Ilang taon naming pinaghirapan kung ano ang naabot namin together as RitKen,” saad niya.

---

GUEST ni Toni Gonzaga sina Luis Manzano at Bayani Agbayani sa kanyang YouTube (YT) channel na Toni Talks.

‘Kaaliw ang episode dahil sa pinaghalong kulitan at seryosong usapan tungkol sa isip, puso at kaluluwa gamit ang ‘roundtable’ question cards.

Habang walang tigil sa pagbibiruan, nagbahagi rin sina Luis at Bayani ng mga kuwento tungkol sa pamilya, pananampalataya at pasasalamat.

Ayon kay Luis, ang mga simpleng sandali sa bahay ang agad na nagpapasaya sa kanya. 

Si Bayani naman, sa kabila ng mga biro ay nagbigay-diin sa pagiging mapagpasalamat sa bawat paggising.

Nagbahagi rin si Toni ng mga personal na repleksiyon tungkol sa pamilya at pagtanggap sa sarili.

Sa huli, nagtapos ang usapan sa tawanan, asaran at paalala na pahalagahan ang buhay at ang mga mahal sa buhay.

---

Sapol sa patutsada ni Vice sa It’s Showtime…

JANELLA, TAMAD DAW MAG-PROMOTE NG PROJECT

USAP-USAPAN online ang akusasyon laban kay Janella Salvador na umano’y ‘tamad mag-promote’ ng mga proyekto.

Naging paksa ito matapos ang pahayag ni Vice Ganda sa It’s Showtime (IS) tungkol sa ilang artistang kulang umano sa effort sa pagpo-promote.

Pinuri ni Vice sina Beauty Gonzalez at Kris Bernal dahil sa aktibong paglalako ng kanilang teleserye, dahilan para may mga netizens na maghinalang si Janella ang tinutukoy ng Unkabogable Star.

Ikinuwento ng isang netizen ang nangyari noong Dinagyang Festival sa Iloilo kung saan naroon ang cast ng What Lies Beneath (WLB).

Ayon sa netizen, bumaba ang ibang cast para sa fan service, ngunit si Janella umano ay isang kanta lang ang inawit dahil wala raw siyang boses at hindi na bumaba dahil sira raw ang sapatos.

Bagama’t inamin ng netizen na valid ang mga dahilan, hindi niya naiwasang mapaisip, lalo’t masigla raw makihalubilo sina Jake Cuenca at JM de Guzman sa mga tagahanga.

Dahil dito, lalong umugong ang espekulasyon kaugnay sa pahayag ni Vice Ganda tungkol sa mga artistang ‘tamad’ mag-promote ng serye o movie.