Tunay na kuwento ng 2 nagwagi sa “pabangka ni El Kapitan” ng Bostik

ni Fely Ng @Bulgarific | August 29, 2025

Hello, Bulgarians! Noong Abril 11, 2025, inilunsad ng Bostik El Kapitan Marine Epoxy ang “Pabangka ni El Kapitan” promo giveaway sa kanilang opisyal na Facebook page para mabigyan ng pagkakataon na manalo ang mga mangingisda at bangkero sa Luzon ng bagong bangka. Kapalit nito ang pagpapadala ng personal na kuwento tungkol sa realidad ng buhay bilang mangingisda. 

Sa pagtatapos ng promo giveaway noong Hunyo 23, 2025, nag-anunsyo naman ang Bostik Philippines ng mga nanalo pagkatapos makatanggap ng daan-daang kuwentong ipinadala ng mga sumali. 

Sina Joe Frilles Gayta (Sorsogon) at Rodimer Jimenez (Zambales) ang opisyal na mag-uuwi ng bagong bangka at Bostik products sa “Pabangka ni El Kapitan” Luzon promo giveaway matapos ianunsyo ang dalawang nanalo sa harapan ng mga DTI representative noong June 27, 2025.

Sa isiniwalat ni Joe sa Bostik Philippines, ibinahagi niya ang kanyang istorya bilang anak ng isang mangingisda at kung paano sinusubukang itaguyod ng kanyang ama silang tatlong magkakapatid. Tinukoy niya na para sa kanyang ama, kailangan pa ring mangisda kahit masama ang panahon. Ang kuwento ni Joe ay isa sa mga realidad ng kabuhayan ng mga matatapang na mangingisda na lumalayag sa dagat araw-araw. Tinapos ni Joe ang kanyang istorya na hiling niyang ihandog ang bagong bangka sa kanyang ama dahil sa sakripisyo na ipinakita nito sa pamilya at sa patuloy na paggamit ng Bostik product na “El Kapitan” sa pagpapatibay ng kanilang bangka.

Ayon naman kay Rodimer, ang determinasyon niyang itaguyod ang kanyang pamilya ang pinakalayunin sa pagsali sa “Pabangka ni El Kapitan”. Inilahad niya ang iba’t ibang trabaho bilang pintor at taga-masilya na pandagdag-kita sa kanyang pangingisda. Sa patuloy niyang pagsisikap, aniya, hahawakan niya ang kanyang kapalaran para matustusan at maiahon ang pamilya sa kabila ng pagod. Para kay Rodimer, ang “Pabangka ni El Kapitan” ay sumisimbolo ng pag-asa para sa pangarap na gusto niyang matamo na magkaroon ng mas magandang buhay.

Ang kuwento ng dalawang nanalo ay isa lamang sa mga istoryang bumubuo sa libu-libong mangingisda na sumasalamin sa katotohanan ng pagiging manggagawa sa Pilipinas. Ito ang kadahilanan kung bakit patuloy na sinusuportahan ng Bostik Philippines ang mga manggagawa sa pamamagitan ng iba’t ibang programa at makabagong produkto na makakatulong sa kanila.

Sa pagwawakas ng “Pabangka ni El Kapitan” Luzon Promo giveaway, inihahanda na ng Bostik Philippines ang susunod na programa para naman sa mga taga-Visayas. 

Para sa mga gustong sumali, abangan ang anunsyo sa opisyal na Facebook page ng Bostik Philippines: BOSTIK | Facebook.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

PhilHealth GAMOT na worth P20K, bagong benefit package para sa lahat ng members

ni Fely Ng @Bulgarific | August 19, 2025

Hello, Bulgarians! Inilunsad ng Philippine Health Insurance Corporation (PhilHealth) ang pinahusay na PhilHealth Guaranteed and Accessible Medications for Outpatient Treatment o PhilHealth GAMOT, isang komprehensibong drug benefit package na sumasaklaw sa mga mahahalagang gamot para magamit ng lahat ng miyembro. Ito ay magiging epektibo sa Agosto 21, 2025, alinsunod sa PhilHealth Circular 2025-0013.

Ang PhilHealth GAMOT ay bahagi ng PhilHealth YAKAP na kamakailan ay inanunsyo ni Pangulong Ferdinand R. Marcos, Jr. sa kanyang State of the Nation Address, pahiwatig ng bisyon ng administrasyon para sa isang mas malusog na Pilipinas. 

Sa ilalim ng PhilHealth GAMOT, may 75 klase ng libreng gamot na puwedeng maireseta na aabot hanggang Php20,000 para sa bawat beneficiary. Ang mga gamot na ito ay karaniwang paggamot ng iba’t ibang kondisyon tulad ng impeksyon (anti-microbial), asthma at COPD, diabetes, mataas na kolesterol (dyslipidemia), altapresyon at kondisyon sa puso (cardiology), at nervous system disorders, kasama na ang iba pang supportive therapies.

Para magamit ang PhilHealth GAMOT, dapat magparehistro ang mga miyembro sa kanilang napiling PhilHealth YAKAP Clinic. Pagkatapos ng masusing medical assessment, magbibigay ang YAKAP Clinic doctor ng reseta na may Unique Prescription Security Code (UPSC) code, kung kinakailangan. Maaaring pumunta ang benepisyaryo sa alinmang GAMOT Facility at ipakita ang reseta, kasama ang anumang government-issued ID Card.

Sa kasalukuyan, ang mga accredited GAMOT Facilities ay ang mga sumusunod:

● Vidacure na may mga sangay sa Muntinlupa City at Quezon City

● Pharma Gen Ventures Corp (Generika Drugstore) na may mga sangay sa

Parañaque City, Navotas City, Quezon City at Taguig City

● CGD Medical Depot Inc. sa Vertis North

● Chinese General Hospital

Aktibong pinalalawak ng PhilHealth ang network nito upang madagdagan ang access points para sa mga benepisyaryo. Sa National Capital Region, dalawa pang pasilidad ang nagsumite ng kanilang letter of intent upang sumali sa programa.

“Noong 2023, nailunsad na natin ang PhilHealth GAMOT ngunit ito ay naisagawa lamang sa iilang probinsya. Kaya naman ngayon mas pinalawak na natin ito. Karapatan ng bawat Filipino na magkaroon ng access sa mga kinakailangang gamot nang hindi pinapasan ang mabigat na gastusin mula sa sariling bulsa,” pahayag ni Dr. Edwin M. Mercado, Acting President and CEO ng PhilHealth.

Pinapaalalahanan ng PhilHealth ang lahat ng miyembro nito na panatilihing updated ang kanilang records upang masiguro ang maayos na transaksyon sa pag-avail ng mga benepisyo.

Para sa karagdagang detalye tungkol sa PhilHealth GAMOT, maaaring tumawag ang mga miyembro sa 24/7 touch points ng PhilHealth sa (02) 866-225-88 o sa mga mobile number na (Smart) 0998-857-2957, 0968-865-4670, (Globe) 0917-1275987 o 0917-1109812.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Calamity Loan Program para sa mga Pag-IBIG Fund member na apektado ng bagyo

ni Fely Ng @Bulgarific | July 28, 2025

Hello, Bulgarians! Alinsunod sa direktiba ni Pangulong Ferdinand Marcos, Jr. na maghatid ng agarang suporta sa mga Pilipino sa mga lugar na sinalanta ng kalamidad, agarang pinakilos ng Pag-IBIG Fund ang Calamity Loan Program nito para tulungan ang mga miyembrong naapektuhan ng Typhoon Crising.

“We are ready to assist our members affected by Typhoon Crising through the Pag-IBIG Calamity Loan,” pahayag ni Secretary Jose Ramon P. Aliling, namumuno sa Department of Human Settlements and Urban Development at chairperson ng 11-member Pag-IBIG Fund Board of Trustees. “We continue to closely monitor developments and are prepared to provide immediate aid in areas that may be declared under a state of calamity in the coming days. This is part of our continuing effort in heeding the call of President Marcos to deliver timely relief and support to those in need,” aniya.

Sa ilalim ng Pag-IBIG Calamity Loan Program, ang mga kwalipikadong miyembro ay maaaring humiram ng hanggang 90% ng kanilang kabuuang Pag-IBIG Savings, na binubuo ng kanilang buwanang savings, employer counterpart contributions, at earned dividends. Ang loan ay may interest rate na 5.95% kada taon, ang pinakamababa para sa mga cash loan sa merkado, at babayaran sa loob ng hanggang tatlong taon, na may tatlong buwang palugit bago ang unang pagbabayad. Ang mga miyembro ay maaaring maghain ng kanilang loan application sa loob ng 90 araw mula sa pagdeklara ng state of calamity sa kanilang lugar.

Samantala, sinabi naman ni Pag-IBIG Fund Chief Executive Officer Marilene C. Acosta na ang mga sangay ng Pag-IBIG ay nakikipag-ugnayan na ngayon sa mga local government unit sa kani-kanilang lugar para sa deployment ng mobile branch ng ahensya, ang Lingkod Pag-IBIG On-Wheels, upang tumanggap ng mga loan application mula sa mga miyembro, gayundin ang insurance claims mula sa mga kasalukuyang Pag-IBIG Housing Loan borrower na ang mga ari-arian ay nasira dahil sa bagyo.

“When calamities strike, we at Pag-IBIG understand that our members in affected areas need immediate financial assistance. For this reason, we make sure that all our services and benefits remain accessible to our members. Even while our offices and personnel in typhoon-hit areas have also been affected, our branches remain open and are ready to receive loan applications and housing loan insurance claims. We are also set to deploy our Lingkod Pag-IBIG On-Wheels to initially go around these areas once roads are accessible, to further bring our services closer to our members who are most in need. And, for members who have internet access, the Virtual Pag-IBIG is ready to accept their Calamity Loan applications online. During these trying times, our members can continue to count on Lingkod Pag-IBIG,” saad ni Acosta.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.