2x Olympian bronze/silver boxer Petecio, magreretiro na?

ni Gerard Arce @Sports News | August 21, 2025

Photo: Nesthy Petecio

Tila nakabinbin muna ang pangarap na “Walang hinto, hangga’t walang ginto” na mantra ni two-time Olympian boxer Nesthy Petecio matapos muling pagmuni-munihan ang mga susunod na hakbang at plano sa kanyang matagumpay na karera sa pampalakasan.

Matapos maging kauna-unahang Pinoy boxer na nagbulsa ng ikalawang medalya sa Summer Olympic Games sa tansong medalya sa 2024 Paris Games, at ang makasaysayang silver medal finish noong 2020+1 Tokyo Olympics, bilang unang boksingera na nagwagi ng medalya, humiling ang Davaoena na magkaroon pansamantala ng panahon upang muling makapag-isip sa landas na tatahakin dahil 33-anyos na siya.

“She’s still contemplating whether she will continue with boxing,” pahayag ni Association of Boxing Alliances in the Philippines (ABAP) secretary-general Marcus Jarwin Manalo sa panayam ng Bulgar Sports. “Actually, she went back to training in Baguio, then nag-ask lang uli ng break.”

Inamin ni Manalo na patuloy na nasa line-up ng national team ang tubong Santa Cruz, Davao del Sur boxer, ngunit nakatakda pang pag-usapan ang sitwasyon na wala pa umanong eksaktong rason na hiniling sa national sports association (NSA).

“She's in the lineup, but we're giving her the space for now and that's what we will discuss soon,” sambit ni Manalo, na tanggap ang anumang magiging desisyon ng 2-time SEA Games at 2019 World Champion. “Wala namang nabanggit na reasons, but she has served the national team na din for more than a decade. May personal plans na din sya, I'm sure. Normal naman for an athlete her age, lalo na she has accomplished a lot already.”

Naghahanda ngayon ang national squad para sa  2025 SEA Games sa Bangkok, Thailand, kung saan nasa training camp sina Tokyo Olympics silver medalist Carlo Paalam, Paris Games bronze medalist Aira Villegas, Jay Bryan Baricuatro Junmilardo Ogayre, 2025 Asian Youth bronze medal winner Mark Ashley Fajardo, Ronald Chavez Jr., Ofelia Magno at beteranong si Riza Pasuit. 

Babanat sa bigating world title si Llover vs. Ngxeke

ni Gerard Arce @Sports News | August 20, 2025

Photo: Circulated image / Interview via Bulgar

Hindi  gagawing madali ni Filipino rising star Kenneth "The Lover Boy" Llover ang kanyang misyon na makamit ang inaasam na world title fight matapos ang kumbinsidong eight-round referee stoppage fight kay dating two-division champion Luis “El Nica” Concepcion ng Panama noong Linggo upang maagang makabalik sa ensayo bilang paghahanda sa world title eliminator sa Oktubre 26 sa Kyrgyzstan.

Paghahandaang maigi ng kampo ng undefeated Pinoy boxer ang makakaharap na si South African Landile “Mandown” Ngxeke, na napagwagian ang parehong bakanteng International Boxing Federation (IBF) International at World Boxing Organization (WBO) Inter-Continental Bantamweight belt kontra Eric “Pitbull” Gamboa ng Mexico sa bisa ng 10-round unanimous decision noong Hunyo 29 sa  South Africa. “Paghahandaan ko, mas pagte-trainingin ko pa, kumbaga sa 100% lalampasan ko pa,” pahayag ni Llover sa post-fight interview vs. Concepcion.

“Ang kailangan ko pang-iimprove dito is 'yung skills ko pa sa pakikipagsuntukan, then 'yung adjustments, nagawa ko na naman, hindi ako nagmadali, timing then, (pero) ang sure na sure kong tatama sa kanya 'yung straight ko, 'yung kaliwa ko kase talagang ‘di rin siya gumagalaw eh, kaya abangan na lang nila sa October 'yung laban ko,” dagdag ng reigning Orient and Pacific Boxing Federation (OPBF) 118-lbs champion. 

Aminado maging si dating two-division World champion at GerryPens Promotions head Gerry “Fearless” Penalosa na may mga dapat pang hasain sa mga kakayanan ng price-fighter bago muling isalang sa susunod na laban ang 25-anyos na tubong General Trias, Cavite. 

“Imperfect, siyempre may mga kulang pa, although needed, pero nu'ng nakita ko nu'ng tumama siya ng mga early rounds, at least dalawa, pero, siguro nag-iingat rin siya, palaban 'yung ano eh at alam niyang beterano kaya’t hindi agad-agad. So, but still, it’s a good experience na ipinakita niya na ready siya sa mga ganung level. So, I’m proud at masaya ako dun,” eksplika ni Penalosa sa harap ng mga manunulat kasama ang Bulgar na nagkober ng laban.

Llover tinibag ang tibay ng Panama sa 8th rnd TKO

ni Gerard Arce @Sports News | August 18, 2025

Photo: Kenneth Llover kontra El Nica ng Panama - Gerrypens Promotions

Nagpaulan ng sandamakmak na upak si Filipino rising star Kenneth "The Lover" Llover sa iba't ibang kombinasyon upang tuluyang masaktuhan ng banat si Panamanian boxer Luis "El Nica" Concepcion sa eight-round technical knockout, kagabi sa Mano-a-Mano main event bout ng 10-round non-title match sa Winford Hotel Resort and Casino sa Maynila. 

Napilitang pigilan ni referee Carlo Baluyot ang laban sa 2:27 ng eight round matapos masapol ng sangkaterbang kumbinasyon kabilang ang matinding body shots na nagpaluwag lalo sa depensa ni Concepcion.

"Masasabi kong ilang beses na akong bumitaw ng suntok pero napakatibay ng kalaban," pahayag ni Llover matapos ang laban na aminadong hindi nais madaliin ang panalo mula sa payo ni GerryPens Promotions head Gerry Penalosa at ng kanilang coaching staff. "Masasabi ko na 'wag magmamadali na makuha 'yung knockout kase 'di basta-basta makukuha iyon sa first round kaya kalmado lang ako sa laban." 

Dulot ng matagumpay na panalo ay sunod na puntirya nitong makatapat si South African Landi Ngxeke sa Oktubre 26 para sa isang world title eliminator sa International Boxing Federation (IBF) 118-pound division. Nagsilbing acid test ang laban ng 25-anyos na fighting pride ng General Trias, Cavite kontra sa dating two-division world champion na determinadong makaakyat sa world title fight sa ilalim ng pangangalaga ni Penalosa

at Kameda Promotions.  

Maagang nakabitaw ng banat si Llover mula sa kombinasyon sa katawan at ulo para masubukan kaagad ang katatagan ng katawan ng Panamanian boxer sa unang round. Natagpuan naman ni Llover ang magkasunod na knockdown sa second at third round, kasunod ng walang habas na kombinasyon.  

Mula sa panalo ay umangat sa 15 wins at 10 knockouts ang kartada ni Llover, habang bumagsak sa 40-12 (win-loss) rekord kasama ang 29 KOs si Concepcion na nalasap ang ikatlong sunod na pagkatalo.