Magiging miyembro ng gabinete, kinikilatis pa ni Marcos

ni Lolet Abania | May 22, 2022

Ipinahayag ni presumptive President Ferdinand “Bongbong” Marcos, Jr. na kahit hindi pa naproklamang pangulo sinimulan na niyang buuin ang magiging bahagi ng kanyang gabinete.

Matatandaang unang nagkumpirma sa alok ni Marcos na miyembro ng kanyang gabinete si presumptive Vice President Sara Duterte bilang kalihim ng Department of Education (DepEd), kasunod si dating MMDA chairman at UniTeam campaign manager Benhur Abalos bilang kalihim ng Department of the Interior and Local Government (DILG).

Inalok ding maging secretary muli ng Department of Labor and Employment (DOLE) si Bienvenido Laguesma at ang migrant workers advocate na si Susan “Toots” Ople para maging secretary naman ng bagong itinatag na Department of Migrant Workers.

Ilang pangalan na rin ang lumilitaw sa social media na sinasabing bubuo ng kanyang gabinete, subalit ayon kay Marcos, pinag-aaralan pa niya itong mabuti at hindi dapat aniyang minamadali.

Sa ngayon, bukod sa mga nabanggit ay isinasapinal pa niya ang iba pang magiging miyembro ng kanyang gabinete.

“Bagaman wala pa namang napapag-usapang proklamasyon sa pagka-pangulo ay sinisimulan na natin ang proseso ng pagpili sa tingin natin ay may kakayahang mamuno sa ating mga departamento. Hindi ito madali dahil kailangan maging masusi ang ating pagkilatis, at lalong hindi naman dapat ito minamadali,” pahayag ni Marcos sa video blog niya sa YouTube nitong Sabado.

“May ilang pangalan na lumilitaw na hindi pa nakukumpirma, iyong iba nakumpirma na, pero marami dito ay espekulasyon pa lamang. Dadating din tayo sa tamang oras na ipapakilala ko na sa inyo sa sila isa-isa,” giit ni Marcos.

Aniya pa, patuloy naman ang paghahanda ng kanyang team para sa transition ng susunod na administrasyon, habang naghihintay ng kanyang proklamasyon.

“Marami siguro kami ipapahayag at ikukumpirma kapag dumating na ang tamang oras,” saad ni Marcos.

Sinalubong daw ng protesta.. Marcos at pamilya, lumipad patungong Australia — spox

ni Lolet Abania | May 17, 2022

Nasa Australia ngayon si presumptive President Ferdinand “Bongbong/BBM” Marcos Jr. para sa umano mas kinakailangang pahinga at bakasyon matapos ang nakapanghihinang kampanya.

Ayon sa spokesperson ni Marcos na si Atty. Vic Rodriguez, si BBM kasama ang kanyang pamilya ay babalik sa bansa sa Huwebes.

“It’s more of a private trip, a private visit for a much needed rest and vacation of President-elect Bongbong,” ani Rodriguez sa press briefing ngayong Martes, kung saan ang biyahe ni Marcos ay kinumpirma ni Philippine Ambassador to Australia na si Helen dela Vega.

“I think he just wants to enjoy the remaining few days before he assumes officially as the President of the Republic,” sabi ni Rodriguez. “Pinipilit na lang niyang i-enjoy momentarily ang kanyang pagiging citizen Bongbong.”

Kaugnay nito, isang report ng Reuters na batay sa Age newspaper, ang trip ni Marcos sa Australia ay sinalubong ng protesta.

Ang mga protesters, ayon sa report, nagtipun-tipon sa labas sa isang address sa central Melbourne.

Inilarawan naman ni Rodriguez ang protesta, na ginawa ng mga Pilipino sa Australia bilang aniya, nakakahiya o shameful, at sinabing ang Australian government ang dapat na magdetermina kung si Marcos ay welcome sa Australia at hindi ang mga Pilipinong naninirahan doon.

“Nakakahiya. Nakakahiya bilang Pilipino, nakakahiya... hindi ugali ng Pilipino na hiyain at pahiyain ang kapwa niya Pilipino sa isang bansa na hindi naman Pilipinas,” saad ni Rodriguez.

“I think the best authority or person to say whether he is welcome or not are the Australian government, not fellow Filipinos na nandoon lang din dahil punong-puno ng poot at pait ang puso. Uulitin ko wala sa kaugalian nating mga Pilipino ang hiyain ang kapwa mo Pilipino sa ibang bansa,” dagdag ni Rodriguez.

Una nang umapela ang dating senador na si Marcos sa buong mundo na aniya, hatulan siya hindi sa kanyang mga ninuno kundi sa kanyang mga gawa.

Nilatag ng Duterte administration... Paggamit ng nuclear energy, tuloy sa termino ni BBM – DOE

ni Zel Fernandez | May 14, 2022

Sa pagpasok ng bagong administrasyon, naniniwala ang Department of Energy na mas lalakas pa umano ang pagsasabuhay ng nuclear energy sa bansa, makaraang mailatag nang maayos ng Duterte administration ang planong paliwigin ang paggamit nito sa Pilipinas.

Sa pahayag ni Energy Undersecretary Gerardo Erguiza, Jr. sa naganap na Laging Handa briefing, inaasahan umano ng ahensiya na tututukan ng susunod na mamumuno sa bansa ang paggamit ng alternative energy sources, kabilang na ang nuclear energy.

Aniya, naging maganda ang paglalatag ni Pangulong Rodrigo Duterte sa balangkas ng nuclear energy at paniniyak ni Erquiza, magiging maganda pa ang tatahakin ng naturang inisyatibo sa nalalapit na pamamahala ni presumptive president Ferdinand “Bongbong” Marcos, Jr. sa anim na taong termino nito.

Gayundin, tiniyak ni Erquiza na pasok umano ang tinatawag na constant factors standards ng energy plan sa bansa batay sa security, reliability, at sustainability, maging ang affordability aniya nito.

Giit ni Erquiza, kaakibat din nito ang pagsunod sa global direction na clean energy at decarbonization.